Bhilali Bible
भजन सहीता 55
धुकु खादलु माणुस दुवा करे
दावुदेन लिखलो एक मसकील, भजन; गावण्यान डाहला वाटे: दस तार वाळा वाजा पुठे गावजु।
ए भगवान, मारी दुवा सामळ;
मारी लीलघाय सामळीन अथु मां भाळे।
मार भीणी धीयान दीन, मेसेक जपाप आप दे:
मे फीकुरेम पड़ीन अथुन अथु डंडवायतु फीरो, ने उदास रवो।
काहाकी वेरी ते कुर्राट रया,
ने कुहर्या जबराण मेसेक,
वेला पाड़ रया,
ने रीसवाय्न मारी वीरुद कर रया।
मारो मन मांहे की मांहे दुखी छे,
ने मुतेन बीहाणो मारेम भराय गुयलो छे।
बीहाणो ने कापणी मारेम भराय गुयलो छे,
ने थर-थर कापीन मारा कान्या उबा हय-ज्या।
तत्यार मे कयु, “पेरवान तसा मारा पाखड़ा रवता, ती बेसको वारु हंय जातो,
ने मे लांबेत उड़ीन जात रवतु ने सुक सी रवतु।
ने मे लांबेत उड़ीन जात रवतु,
ने उजाड़्या बयड़ाम जाय्न वस जातु।
मे वाहळान आपठा सी, ने आंधीन झापटा सी बचणे करीन,
ने आसरान जागे जाती रवतु।”
ए मालीक-भगवान, तींद्रेम भाती-भातीन बुली वाटीन, तीनुक बरबाद कर देय,
काहाकी मे तींद्रा सहर मां खुन-खराबु, ने लड़ाय हवतेली देखलु छे।
रात-दाहड़ु चे सहरेन अवारकुट पर चहड़ीन च्यारेमेर फीर्या करे,
ने तींद्रे मां कुहराय ने लड़ाय करे।
तींद्रा सहरेम कुराय्त भरायली छे,
ने रुड़, परेसानी ने धुका सी भरायलु छे।
जु मारी नाव-बद्दी करे, चु मारु वेरी नी हतलु;
कदी चु वेरी रवतु, ती मे वेठ लेतु।
जु मार वीरुद मटाय करे,
चु वेरी नी हतलु; नीते मे डुकाय जातु।
बाकुन चु ते, मारेन तसुत हतलु,
ने मारु खास दुसतीदार ने उळखायतु हतलु।
हामु भेळा हय्न बेसकी सुवाणी-सुवाणी वात करतेला,
ने भगवानेन मंदीर मां भेळा-भेळा जातला।
तीनु वेरीक मुत उचकाणुन आय्न दड़बी देणु चाहजे;
चे जीवतेलात मसाणेम जात रवणु चाहजे,
काहाकी तींद्रा मनेम ने घरेम कुहराय्त छे।
बाकुन मे ते आयड़ीन भगवान धड़े दुवा करीस,
ने चु यहोवा भगवान मेसेक बचाड़ लेसे।
मे ते सांतु-संदारे,
ने मांझणीक वेळाय आयड़ीन दुवा करीस।
ने चु मारी दुवा काजे सामळी लेसे।
मार साते लड़ाय करन्या बेसका छे।
तेबी मारु भगवान मेसेक,
बचाड़ीन सुक-सांती आपसे।
भगवान, जु कळ-जुग घड़ायणेन पेहले सीत आपसी राजगादी पर बठ रयु,
चु मारी सामळीन तींद्रु नीयाव करसे।
चु तींद्रु आखान नीयाव करसे, तींद्री जीवाय ईतरीक बी नी बदले।
ने तींद्रेम भगवानेन बीहाणो नी हय।
चु मारु खास दुसतीदार ते आपसी दुस्तीन बुली तुड़ देदु।
चु ते आपसा दुसतीदार्यात काजे धुकु देदु।
तेरी वात ते नोणीन तसी सुवाळी हतली,
बाकुन मन मां लड़ायणेन वीच्यार हतलु।
तेरी वात तेलेन तसी चुपड़ी ते हतली,
बाकुन नांगेरली तलवारेन तसी छर-छर बी हतली।
आपसु भार यहोवा भगवान पर नाख दे,
चु तारी राखवाळी करसे;
चु धरमी काजे जलम पड़ने नी देये।
बाकुन ए भगवान, तु तीनु वेरीक नास करन्या उंड्ला खाडा मां नाख देजी; हत्यारा ने धुकु करन्या,
आदी उमर हवते-हवतेत मर जासे।
बाकुन मे ते तारेत पर भुरसु करतु रय्स।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.