Bhilali Bible
भजन सहीता 56
भगवान मां भुरसा वाटे दुवा
दावुदेन मीकताम भजन, भजन-गावण्यान डाहला वाटे: योनात-एलेम राहोकीम रेंगो मां गावजु। पलीस्ती जातीन माणसे तीनाक गात नावेन सहर मां धर पाड़्या तीने टेमे दावुद्यु जो भजन लिख्यु।
ए भगवान, मार पर दया कर,
काहाकी वेरी मेसेक दम्या करे,
ने आखु दाहड़ु मार साते लड़ाय्न मेसेक वेला पाड़े।
वेरी आखु दाहड़ु मेसेक दम्या करे,
मार साते लड़ाय करन्या ते बेसका सावटा छे।
ने तत्यार बी मेसेक बीहाणो लागे,
तत्यार मे तारेत आसरे आवो।
मे यहोवा भगवानेन भुरसेत जीवो;
मे भगवानेन हजेरीत मां रय्न तेरा बुलेन गुण गावीस;
मे हाड़-मासेन बन्ला माणसेक नी बीहो, चे मारो काय बीगाड़ लेसे।
भले चे वेरी, आखु दाहड़ु मारा बुलेन गलत सार नीकाळे,
भले चे मारी कुहराय करने करीन आखु दाहड़ु वीच्यार कर्या करे।
छाचलीन, चे आखा भेळा हय्न,
मेसेक मारने करीन ताक मां बस रवे;
ने मारा चालना-फीरनान चुकसी करे।
जे कुहर्या, असी कुहराय करीन बी बच जासे काय?
ए भगवान, रीसवाय्न माणसेन ईनु टुळाक हीट पाड़।
मारा डंडवायणान हीसाब ते तार धड़े छे;
तु ते मारा आसळा तारी सीसी1 मां मेल रयु;
मारी वेलान बारामां आखु हीसाब तारी किताप मां लिखलुत ते छे।
जत्यार मे मारा भगवान धड़े दुवा करीस,
तत्यार मारा वेरी पछा वळीन ढास्से।
मे जो जाणो की, भगवान मार पुठे छे।
मे, भगवानेन हजरी मां रय्न तेरा बुलेन गुण गाय्स; मे, यहोवा भगवानेन हजरी मां रय्न तेरा बुलेन गुण गावीस।
मे ते यहोवा भगवानेन भुरसे जीवो, मे हाड़-मासेन बन्ला माणसेक नी बीहो,
चे माणसे मारो काय बीगाड़ लेसे?
मे जी-जी मानता तार अगळ लेदलु छे, ची-ची पुरी करीस;
मे तुसेक अळी-अळीन बेसकु वारु कय्स। तुसेक बेसकु वारु कवणुत मारी मानतान बादा छुटणु छे।
ए भगवान, तु ते मेसेक,
खीसलीन पड़ने नी देदु;
ने आज लग मारा जीव काजे मोत सी बचाड़लु छे।
हेरसी की मे तार अगळ जीवाय-आपण्या वीजाळा मां जीवो।
Source notes (1)
- Footnote कुप्पी, पेहला जमानान चामड़ान बणावली सीसी छे
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.