Bhilali Bible
भजन सहीता 57
छुटकारा वाटे दुवा
दावुदेन एक मीकताम भजन, भजन-गावण्यान डाहला आल-तासहेत रेंगो मां गावजु। जो भजन तीने टेमेन छे तीने टेमे, दावुद्यु, सावुल्यान धाके ढासीन ढाटान मटला दरेम भराय्न साताय गुयलु।
ए भगवान, मे ते तारेत आसरे आवलु छे,
हेरेसी मार पर दया कर।
जत्यार लग गरा छेटी नी हवे,
तत्यार लग मे, तारात पाखड़ा तळे रवीस।
मे, आखाम उचे रवण्या भगवान धड़े दुवा कर्या करीस;
तीना भगवान धड़े दुवा कर्या करीस, जु मार वाटे आखो काय पुरो करन्यु छे।
चु सरग सी, मारी मदत करीन मेसेक बचाड़ लेसे;
बाकुन मेसेक वेला पाड़न्याक लड़से।
भगवान ते आपसी दया ने छाचाय मार पर उजेंती करसे।
मारु जीव फाड़-खाण्या नाहरेन ईचमां छे;
ने मेसेक तीनु माणसेन ईचमां सुवणु पड़ रयो,
तींद्रा दात भालान ने बीलखीन तसा तीखा छे,
ने तींद्री जीप तलवारेन तसी छर-छर छे।
ए भगवान, तु सरग मां सेक-सींगार भर्यु छे। तारु सेक-सींगार,
ने धाक आखी धरती पर बी छावाय जाणु चाहजे।
मारा वेरी ते, मारा पाय वाटे फांद मेक रवला;
ती मारु जीव घाबराय गुयलु,
चे मार अगळुत खाडु खुद रवला,
बाकुन चे, आपसात तीना खाडाम हीट पड़्या।
ए यहोवा भगवान, मारो मन तारेत मां काठो छे; मे मारा मनेम ठाणीत लेदलु छे;
मे गाय्स, मे तारा गुण गाय्स।
ए मारा जीव-आत्मा जाग जा।
ए पावळी ने झुणगा, तुहुंं बी जाग जावु।
मे वीजाळो हवणेन पेहलेत जागीन गीत गाय्स।
ए मालीक भगवान, मे राज-राजेन माणसे मां तुसेक बेसकु वारु कय्स;
ने देस-देसेन माणसेन ईचमां तारा गुण गाय्स।
तारी दया ने परम ते सरग लग उचो छे,
ने तारी छाचाय सरग मंडळी लग उची छे;
ए भगवान, तु सरग मां आखाम सी मटु छे।
तारु सेक-सींगार ने धाक आखी धरती पर बी छावाय जाणु चाहजे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.