Bhilali Bible
भजन सहीता 58
वेरी काजे डंड आपाड़ने वाटे भगवान धड़े दुवा
दावुदेन एक मीकताम भजन, भजन-गावण्यान डाहला वाटे: आल-तासहेत रेंगो मां गावजु।
ए नीयाव-करन्या माणसे, तुहुंं छाचलीन नीयावेन वात करु काय?
ए हकदार्या माणसे, तुहुंं छाचलीन खरली वात करु काय?
नी, तुहुंं ते लुच्चाय्न वीच्यार करु;
ने नीयाव टाळीन लड़ाय झगड़ु वदाड़ु ने धरतीन भार बणु।
कुहर्या माणसे ते, पयदावारी सीत भगवान सी छेटे रवे;
जे कुखेम सी नीकेळतात झुट मेके।
हींद्रु जहर घड़सान जहरेन तसु छे,
जे बेहरा घड़सान तसा छे, जे आपसा कांटा बंद कर लेय।
बेहरा घड़सा ते, काळवेल्यान नी सामळे, भले चे मंतर बुलनेम,
ने फुंगी वाजाड़नेम बेसका हुस्यार रवे।
ए यहोवा भगवान, हीनु वेरी दात तुड़ दे! ने हीनु जुवान नाहारेन घाड़चावण्या उखाळ दे!
चे घुळाय्न उहतेला पाणीन तसा हंय जाणु चाहजे,
जे रंदेळ्ळा सुकला चारान तसा चीमाय जाणु चाहजे।
जे दळ घट्टीन तसा हंय जाणु चाहजे, जी चालती-चालती गळीन सर जाय। ने जे, तीना पुर्यान तसा हंय जाणु चाहजे,
जो अदरलो हंय गुयो हय; तीनाक दाहड़ान वीजाळो देखणेन मुखु नी जड़े।
ए वेरी माणसे, हांडा तळे नाखला काटाम आच लागाड़नेन पेहलुत,
जसी आंधी नीळ्ळा ने सुकला काटा उडाड़ीन ली जात रवे,
तसुत भगवान तुहुंक बी उडाड़ीन ली जात रवसे।
भगवानेक असु बदलु लेत्लु देखीन, धरमी खुस हवसे;
धरमी वेरीन खुन वाटे पाय धुवसे।
तत्यार माणसे कवणे बाजी जासे, “छाचलीन धरती पर नीयाव करन्यु भगवान छे;
चु, छाचलीन, धरमी काजे ईनाम आपे।”
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.