Bhilali Bible
भजन सहीता 59
बचाड़ने करीन दुवा
दावुदेन एक मीकताम भजन, भजन-गावण्यान डाहला वाटे: आल-तासहेत रेंगो मां गावजु। जो भजन तीनी टेमेन छे, तीनी टेमे, सावुल माणसेक मकल्यु ने चे, दावुद काजे मारने करीन तेरा घरेक घेरवी लेदा।
ए मारा भगवान, मेसेक, मारा वीरुद करन्या सी बचाड़;
मेसेक उचला जागाम ली जाय्न, मारा वेरी सी बचाड़।
मेसेक कुहराय करन्यान हातेम सी बचाड़;
खुनी माणसे सी बचाड़।
देख, चे ते मेसेक मारने करीन ताक मां बस रया;
चे ताकतवाळा माणसे मार वीरुद भेळा हंय रया।
बाकुन ए यहोवा भगवान, मारु कांय बी पाप ने गुनु नी हय।
मे गुनाळु नी हय, तेबी चे दवड़ीन मार साते लड़ायणे आवे।
मेसेक बचाड़ने करीन उठ ने मारी हालत पर धीयान दे!
ए सरगेन सीपायड़ान यहोवा भगवान,
ए ईस्रायली माणसेन भगवान,
राज-राजेन माणसे आखा वीन-भुरस्याक डंड आपणे करीन उठ!
काहना बी धुकु देण्या कुहर्या पर बी दया मां करे।
चे सांतलो हवतेत पछा आवे,
ने कुतरान तसा हड़सी-हड़सीन सहरेन च्यारेमेर फीरे।
सामळ! चे डखारे, तींद्रा मुंहडाम सी तलवार्या सांय बुल नीकळे;
तेबी चे बेफीकर्या हय्न आपसा-आपसा कवे,
“आपणी वात ते काहनाक नी सामळायती।”
बाकुन ए यहोवा भगवान, तु तींद्रे पर हासे;
तु राज-राजेन माणसे सांय आखा भुरसु नी करे तींद्रे पर हासी-ठट्टा करे।
ए भगवान तुत मारु ताकत छे;
तु आसरान कीलु छे। हेरेसी मे तारीत आस करीस।
भगवान, तु दया ने परम सी मेसेक भेटसी।
तु ते मेसेक मारा वेरीक हागेरला देखणेन मुखु आपसी।
तीनुक उचकाणुन मां मारे; नीते मारा असामी तु डंड कसु आपे ईनी वातेक वीसरी जासे।
ए मालीक, तुत मारी आडु-आवणी ढाळ छे!
तारी ताकतेन साहरे वेरीक रावण्या-तीवण्या कर देय।
चे तींद्रा मुंहडान पापेन वजे सी, ने हुटड़ान बुलेन वजे सी,
चे मटाये सराप देदा करीन,
ने लुच्चाय कर्या करीन धराय जाणु चाहजे।
तु तीनुक रीसवाय्न खत्तम कर,
ने चे आखान-आखा सर जाणु चाहजे,
तत्यार धरतीन खुणे-कुपरे लग, माणसे जाण लेसे की,
भगवान याकुब्यान अवल्यात पर राज कर रयु।
चे वेरी सांतेलो हवतेत पछा आवे,
ने कुतरान तसा हड़सी-हड़सीन सहरेन च्यारेमेर फीरे।
चे खाणान बदले अथान-अथा डंडवाये,
ने खाणो नी जड़े ती कुतरान तसा आखी रात हड़स्या करे।
बाकुन ए भगवान, मे ते, तारी ताकतेन बड़ाय करतु जाय्न गीत गाय्स,
मे संदारे-संदारे तारी दया सी खुसीन गीत गाय्स,
काहाकी मारी गरान टेम तुत मारु आसरु हतलु;
तुत मारु आसरान कीलु रयु।
ए मारा जुर, मे तारो असु भजन गाय्स,
“भगवानुत मारु आसरान कीलु छे;
ने चु मार पर दया करन्यु छे।”
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.