Bhilali Bible
भजन सहीता 60
छुटकारा वाटे दुवा
सीकापण वाटे, दावुदेन एक मीकताम भजन, भजन-गावण्यान डाहला वाटे: सुसान एदुत रेंगो मां गावजु। जो भजन तीनी टेमेन छे तीनी टेमे दावुद्यु राजु, अराम-नाहरायीम ने अराम-सोबा राजवाड़ा साते लड़ाय कर्यु, ने दावुदेन सीपायड़ान डाहलु योआब पछु आय्न नणेन खुबारामां बारे हजार एदोम्या जातीन माणसेक मार नाख्यु।
ए भगवान, तु ते हामरे पर रीसवाय गुयु, ने हामुक छुड़ देदु, ने हामरे पर रीसवाय गुयु,
तेरेमां हामरे पर दया करीन हामरा दाहड़ा जसा हतला तसात कर दे।
तु ते धरतीक कापाड़ देदु, ने ची ते हालने बाजी गुय।
तु ते धरतीक फाड़ देदु; हंय तु धरतीन दराड़ाक भर दे।
ए भगवान, तु ते तारा माणसे काजे काठला दाहड़ा देखाड़लु,
ने तु हामुक छाकाड़ देदु।
तु तारा बीहण्या माणसे काजे एक झंडु आप्लु छे,
की चु जीतेन वजे सी टांगी देय।
तु तारा जेवड़्या हात सी हामुक बचाड़,
ने हामरी सामळ की तारा लाटेकला बची जाय।
भगवान, आपसा चुखला मंदीरेम रय्न कयु,
“मे खुस हय्न सेकेम जागा काजे वाट लीस,
ने सुक्कोत खुयारा काजे मारा माणसे वाटे नापी दीस।
गीलाद देस ते मारोत छे, मनस्से कुळी बी, मारीत छे;
ने एप्रेम कुळीन माणसे मारा मुणकान टुपु छे;
यहुदा कुळीन माणसे मारा राजेन डेंगु छे।
मोआब देस मारा पाय धुवणेन ठाहरु छे,
एदोम देस पर मे मारो खासड़ो उराटीन नाखीस;
ए पलीस्ती राजेन माणसे,
मारी जीतेन साहरे तुहुंं आयड़ीन मारी बड़ाय करु।”
अवारकुट वाळा सहरेम आपणुक कुण पुगाड़से?
एदोम सहर लग आपणुक कुण ली जासे?
जु भगवान आपणुक छुड़ देदु, जु भगवान आपणा सीपायड़ान सात छुड़ देदु,
चु भगवान आपणुक ली जासे।
ए भगवान, वेरी साते लड़ायणे मां हामरी मदत कर;
काहाकी माणसेन मदत करनु ते फालतु छे।
भगवानुत आपणा वेरीक रंदळी देसे;
काहाकी आपणु भगवानेन मदतेन साहरे हिम्मत देखाड़सु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.