Bhilali Bible
भजन सहीता 54
गुवाळी वाटे भगवान धड़े दुवा
दावुद राजान लिखलो एक मसकील भजन, भजन-गावण्यान डाहला वाटे: तार वाळा झुणगान वाजा भेळ गावजु। जीफ नावेन उजाड़ीन माणसे जाय्न सावुल काजे कया, “दावुद ते हामरे ईचमां साताय रयु”। तीने टेमे दावुद जो मसकील भजन लिखलु।
ए भगवान, मेसेक माणसेम सी बचाड़ तारी ताकतेन अनसारे,
तारा सेकेन साहरे हामरे ईचमां खरलु नीयाव कर।
ए भगवान, मारी दुवा सामळ,
मे जो कहो चो मन लागाड़ीन सामळ।
काहाकी दीसरा माणसे मारी वीरुद कर्या,
चे नी-दयाळा माणसे मारु जीव लेणे हींड रया।
चे ते भगवानेन परवाय बी नी करे।
देखु, भगवानुत मारी मदत करन्यु छे,
भगवान-मालीक मारा सात-देण्या पुठेत छे।
चु, मारा वेरीन कुहराय काजे तींद्रेत पर नाख देसे;
ए भगवान, तु आपसी छाचाय्न साहरे तीनुक खत्तम कर।
तत्यार मे मारी मरजी सी बादा चहड़ावीस!
ए यहोवा भगवान तु ते वारलु छे।
हेरेसी मे तार नावेन गुण असु गाय्स की जो वारु छे।
भगवान मेसेक आखी गराम सी ने हीड़ा-पीड़ाम सी छुड़ाय लेदु,
ने मे मारा वेरीक जीत लेदलु छे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.