Bhilali Bible
भजन सहीता 53
माणसेन गांडाय ने कुहराय
(भजन सहीता 14)
दावुदेन लिखलो एक मस्कील भजन, भजन गावण्यान डाहला वाटे “महलात” रंगो मां गावजु।
डेड़ अकल्या माणसे,
आपसात मनेम कया,
“भगवान हय्त नी”।
चे आखा बीगड़ी गुया, चे रीस आवे तसा पाप करे।
तींद्रे मां भलाय करन्यु काहनु नी हय।1
भगवानेक जाणने करीन पुछणे वाळा अकलवाळु माणुस हंय की,
नी हंय जो देखणे करीन भगवान,
सरगेम सी आखी माणुस जात पर नींगा नाख्यु।
बाकुन आखा माणसे भगवानेन खरली वाट छुड़ देदा,
चे आखा एक सारका बीगड़ी गुया;
भलाय करन्या काहनु नी हय,
एक बी नी हय।
कुहर्याम, इतरीक बी अक्कल नी हंय काय?
जसा रुटु सेट्लात खाय लेय;
तसात जे, भगवानेन माणसेक सेट्लात लुटीन खाय रया।
ने जे भगवानेन नाव लग नी लेय।
तीनु कुहर्या वेरीम ते बीहाणो नी हतलो;
बाकुन उचकाणुन चे बेसका बीही जासे।
जु तीनुक छुड़ीत देसे; हेरेसी भगवानेन माणसे तीनुक लाजे पाड़ देसे।
चे ते भगवानेन माणसेन वीरुद डेरु ते नाखला;
बाकुन तेबी भगवान, तीनु वेरीन हाटका रावण्या तीवण्या कर देसे।
ईस्रायली माणसेक छुड़ावणे करीन,
सीयोन सी भगवान हंय आय जासे, ती बेसको वारु हंय जाय!
जत्यार भगवान आपसा माणसेन दाहड़ा वाळसे,
तत्यार याकुब्यान अवल्यात, ईस्रायली माणसे बेसका खुस हवसे।
Source notes (1)
- Cross-reference रोमीयो 3:10-12
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.