Bhilali Bible
भजन सहीता 52
भगवानेन नीयाव ने गीणदया
भजन-गावण्यान डाहला वाटे: दावुदेन लिखलो एक मसकील भजन; जत्यार वेरी दोएग, जु एक एदोम हतलु, राजा सावुल जाय्न कह्यु, “मे, दावुद काजे अबीमेलेकेन घर देखलु”!
ए मुखी, तु कुहराय करीन मटाय काहा करे? ने मे असु वीच्यार कर सको की, भगवानेन दया जलम मार पर रवे? तारी जीप ते कुहराय्न वात करे; तारी जीप ते नीसाणला दातळान तसी काम करे।1 तुसेक भलाय सी बी वदु कुहराय करनु वारु लागे, ने छाचाय सी बी वदु झुट मेकणु वारु लागे। ए ठगणी जीप, तुसेक ते बरबाद करनी वातुत वारु लागे। बाकुन भगवान तुसेक जलमकुत सार देसे: ने चु तुसेक धरीन, तारा घरेम सी नीकाळ देसे; ने जीवतेला देसेम सी तुसेक मुळ भेळ उखाळीन नाख देसे। तत्यार धरमी जो देखीन चकराय जासे, ने असा कवता जाय्न तुसेक हास्से: “देखु, जु हयुत माणुस छे, जु, भगवान काजे आपसु आसरु नी मान्यु; बाकुन आपसा बेसका धन पर भुरसु कर्यु, ने आपसी बुरफायत मां काठु हवतु गुयु।” बाकुन मे ते भगवानेन मंदीरेन्चां नीळ्ळा जेतुनेन2 झाड़कान तसु छे; मे भगवानेन दया पर जलम भुरसु करो।3 ए भगवान, मे जलमकुत तारी बड़ाय करतु रय्स, काहाकी तुत जो काम करलु छे, ने मे तारात नावेन वाट देखतु रय्स, जो तारा चुखला माणसे अगळ वारु छे।
Source notes (3)
- Cross-reference यीरम्या 9:5,6
- Footnote भगवानेन चुखला जागान आंगणाम लगाड़लो जाड़को
- Cross-reference भजन सहीता 92:13; यीरम्या 11:16
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.