Bhilali Bible
भजन सहीता 51
पापेन माफी वाटे दुवा
भजन-गावण्यान डाहला वाटे दावुदेन लिखलो मीसमर भजन। दावुद राजु, बेतसेबा साते छीनाळो कर्यु ने अळतेन भगवानेन अघली वात बताड़न्यु नातान, तीनाक लड़ीन सुदारने करीन तेरेन्चां आयु, तीनी टेमे दावुद्यु जो भजन लिखलु।
ए भगवान, तारी दयान साहरे
मार पर दया कर:
तारी मटली दयान साहरे
मेसेक माफ कर दे।
मेसेक वारु धुय्न मारा नी-धरम छेटा कर दे,
मारा पापेन मयळ छेटे करीन मेसेक चुखु कर।
काहाकी मे मारा गुना कबली लम,
रात-दाहड़ु मारा पापेन भार मेसेक दड़पी रयु।
मे तारेत वीरुद पाप करलु,
ने जो तारी नींगा मां वारु नी हंय चत करलु छे;
हेरेसी जत्यार तु मारु नीयाव करसी,
तत्यार तु आपसी वातो मां खरलु रवसी।1
मे पयदा हयु तीं सीत पापी छे,
ने मे आय्सीन कुख मां पड़्यु तीहींन पापी छे।
देख, तु मारा मन मां छाचाय देखणेन हेर करे;
हेरेसी तु मन मां मेसेक अक्कल सीकाड़े।
जुफान झीकरे करीन मेसेक चुखु कर,
ती मे चुखु हंय जाय्स; मेसेक धुव ने मे बरफ सी बी वदु धवळु हंय जाय्स।
मेसेक खुसीन ने मजान वात सामळाव;
तेरेसी मारा जे हाटका तु अळगा कर देद्लु,
चे हाटका खुस हंय जाय।
तु मारा मुंहडो पाप भीणी मां भाळे,
बाकीन मेसेक वारु धुय्न मारा आखा गुना छेटे कर।
ए भगवान, मारेम चुखलो मन पयदा कर,
ने तारी जीव-आत्मान साहरे मारा हसतायला जीव-आत्मा काजे डंडवाये नी तसु कर दे।
मेसेक तारी हजेरीम सी छेटु मां करे,
ने तारा चुखला जीव-आत्मा काजे मारेन्चां सी छेटे मां करे।
तार साहरे जड़न्या छुटकारान खुसी मेसेक अळी पछी आप दे,
मारा छुटकारान जीव-आत्मा काजे मानन्यु बणाय्न मारी राखवाळी कर।
तत्यार मे, गुनाळा माणसेक तार वाट्ये चालने सीकाड़ीस,
ने चे पापी माणसे तारेन्चा पछा आवसे।
ए भगवान, ए मारा बचाड़न्या भगवान, मे खुनी छे,
हीना गुनान डंडेम मेसेक बचाड़ ले। तत्यार मे तारा धरमेन बड़ाय करतु जाय्न खुसीन गीत गाय्स।
ए मारा भगवान-मालीक, मारो मुंहडो उघाड़ दे,
तत्यार मे हुटड़ा सी तारा गुण गाय्स।
काहाकी तु ते, मेल बादा सी खुस नी हये।
नीते मे बादा छुटतु;
ने तु आकठान बादा सी बी खुस नी हवे।
पाप भीणी सी, भगवान भीणी वळन्यो मनुत, भगवानेन नींगाम वारलु बादा छे;
ए भगवान, तु ते पाप भीणी सी तार भीणी वळन्या मनेक, ने नीचळा मनेक फालतु नी समजे।
तु दया करीन सीयोन सहरेन भलाय कर,
यरुसलेम सहरेन अवारकुट बांदाड़।
तत्यार तु धरम भेळ चड़ावणी बादा सी मतलब आखा जनवार्या,
ने आक्ठान बादा सी खुस हवसी,
ने तत्यार माणसे तारी बेदी पर, केवड़्यान बादा चड़ावसे।
Source notes (1)
- Cross-reference रोमीयो 3:4
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.