Bhilali Bible
भजन सहीता 50
भगवानेन खरली भक्ती
आसापेन मीसमर भजन
भगवान, आखाम ताकतवाळु यहोवा भगवानुत कवे- उगुण,
ने बुडुण सी धरतीन छेव सी, आखी धरतीन माणसेक बुलावु।
आखाम वारु सीयोन बयड़ा पर सी,
यहोवा भगवान आपसु सेक देखाड़लु छे।
आपणु भगवान आवसे ने हुगु नी रवे,
बाळी-चुळीन भसम करन्यो आक्ठो तेरे अगळ-अगळ धपतो आवसे।
ने तेरे च्यारेमेर मटली आंधी घुळ्ळायती आवसे।
भगवान ते आपणा माणसेन नीयाव करने करीन आवे;
हेरेसी चु उपरना सरग काजे ने नेचली धरती काजे आपसा गवा बणावणे करीन आयड़ीन असु कय्न बुलावे।
“मार पर भुरसु करे तीनु माणसेक मारेन्चां भेळा करु,
जे बादा चड़ाय्न मार साते बुली करला छे।”
सरग भगवानेन धरमी हवणेन वात देखाड़े,
“भगवानुत नीयाव करन्यु छे, ने चु जलम छाचु छे।”
ए मारा माणसे, सामळु, मे भगवान कहो;
ए ईस्रायल, तारु भगवान मेत छे;
मे तारा बाराम गवाय दम।
मे तारा बादान जनवारेन तसु ते नी लड़तु,
काहाकी तारा आक्ठान बादान जनवार्या ते जलम मार अगळ रवे।
बादा छुटणे करीन मेसेक तारा घरेन बेल नी चाहता,
ने मेसेक तारा कुड़झ्यान बुकड़ा बी नी चाहता।
काहाकी जंगल मां रवण्या एकेक जीव-जनवार्या,
ने हजारु बयड़ा मां रवण्या आखा जनवार्या मारात छे।
मे बयड़ान आखा चिरलाक जाणो,
ने धरती पर चालन्या-फीरन्या जीव-जंतु मारात छे।
कदी मे भुकलु रवो तत्यार मे तुसेक नी कवतु,
काहाकी धरती ने तेरेम जो कांय छे चो आखो मारोत छे।
काय मे बेलेन सीकार खाम काय?
नीते बुकड़ान लुहीं पीवो काय?
मे आखाम उचे रवण्यु भगवान छे! तार धड़े सी मे जी बादा मांगो की,
तु ईनी आखी चीजेन बदले मेसेक बेसकु वारु कव; ने मार अगळ लेदली मान्ता पुरी कर।
ती, गरान टेमे, जत्यार तु मार धड़े दुवा करसी,
ती मे तुसेक छुड़ाय्स,
ने तु मारी बड़ाय करसी।
बाकुन कुहर्या काजे भगवान कवे,
मारा नेम-कायदा काजे हेर करीन कवणेन तारो काय काम छे?
तु मारी वायदान बुलीन वात काहा करे?
जत्यार मे सुदारने करीन लड़ो, ती तु काहा कीचवाये?
तु ते मारा बुलेक फालतु समजे।
तु चुट्टाक देखीन तेरे साते दुसती करने मां खुस हवे,
ने छींनाळ्यान साजल्यु बणे।
तु कुहराय्न वात कवणेत तारो मुंहडो उगाड़े,
ने तारी जीप नीस्ती लुच्चाय्न वात करे।
तु बठीन आपसा भास्येन वीरुद मां बुले,
आपसा सगा-भास्येन चुगली करे।
तु जो आखो काम कर्यु, ने मे हुगु हंय रयु;
हेरेसी तु समज्यु की, मे तारेन तसुत छे।
मे तुसेक ईनी वातेन बदलाम,
ने तारा डुळा अगळ आखो अलग-अलग उजेंतो देखाड़ीस।
ए भगवान काजे इसरन्या, जी वात समजी लेवु, कांखुर माय्न असो नी हंय जाय की,
मे तुहुंंक फाड़ीन टुकड़ा-टुकड़ा कर दम,
ने तुहुंक काहनुक छुड़ावण्यु नी जड़े।
आखी वातेन बदले मेसेक बेसकु वारु कवण्यु, छाचलीन मेसेक बादात चड़ावे, ने असो कय्न मारी ईज्जत करे।
ने जु मारी वात मानीन आपसी जीवाय्न वाट सुदारे, तीनाक मे छुड़वीन मारा छुटकारान ताकत देखाड़ीस।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.