Bhilali Bible
भजन सहीता 49
धन पर भुरसु करनेन गांडाय
भजन-गावण्यान डाहला वाटे, कोरह अवल्यातेन लिखलो मीसमर भजन
ए आखा देसेन माणसे, जो सामळु!
ए धरतीन आखा रवण्या माणसे, मन लागाड़ीन सामळु!
भले नेची जातीन हय, भले उची जातीन,
भले मातला हंय तेने गरीब हंय ते, तुहुंं सामळु!
काहाकी मारा मनेन वीच्यार चुखोझण छे,
ने मारा मुंहडाम सी अकलेन वातुत नीकळसे।
तीना नीतीन बुलेक मे कवणेवाळु छे, तीना बुल पर अळी-अळीन वीच्यार करने बाजी रयु;
ने झुणगु वजाड़तु जाय्न तीना बुलेन मतलब बताड़ीस।
गरान काठला दाहड़ा मां मे काहा बीहो?
भले वेरी मेसेक च्यारे मेर घेरवी रवे ने मे मरे असु हंय जाम।
चे वेरी ते आपसा धन पर भुरसु करे,
ने धनेन ढेर पर मटाय करे।
तींद्रेम सी काहनुक आपसा भायसेक काहने बी भात्ये चु छुड़ाय नी सके,
ने नी भगवानेक तेर बदले मां काय दी सके।1
काहाकी माणसेन जीवेन कीमत ते बेसकी महंगी छे,
तेरा छुटकारान कीमत ते माणसेक कदी नी आपाये।
काहनुक बी माणुस असु मरीन जलम जीवतेलु रहे,
ने मसाणेम नी जाय।
आपणु देखजे की, अकलवाळु बी मरे,
ने गांडु ने ढुरे सारकु माणुस बी मरे।
चे आपसो धन दीसरा वाटे रहणीदीन मर जाय।2
चे मनेम असा वीच्यारे की, हामरो घर जलमको रवसे,
ने हामरु रवणेन जागु पीड़ी-डीट रवसे
हेरेसी चे आपसेत नावे आपसी जागान नाव पाड़े।
बाकुन माणसेन धनेन ईज्जत जलम बन्ली नी रवे;
चु तीनु ढुरेन तसु छे, जे मरीन सर जाय।
जे आपणे पर भुरसु करे, तींद्रे वाटे असोत हवे;
ने तींद्रे वाटे बी असोत हवसे, जे तींद्री गांडवायली वातेक मानीन खुस हवे।
तींद्रु गुवाळ्यु मोतेनकळो मां,
तीनुक मसाण्या भीणी गाडरा-बुकड़ान तसु गेरीन ली जाय रयु,
ने चे तींद्रा बंगला सी छेटेत हंय जासे,
ने तींद्रा वारु डीलेक मसाण्यो खाय जासे,
बाकुन नवली कळी मां खरला माणसे तींद्रे पर राज करसे।
बाकुन भगवान मारा जीव काजे पाताळेन हातेम सी छुड़ाय लेसे।
काहाकी चु मेसेक आपसा वाटे छाचलीन अवरसे।
जत्यार काहनुक मालदार हंय जाय,
ने तेरा घरेन ईज्जत वद जाय, तत्यार तु बीहे घुण।
काहाकी चु मरसे, ती कांय बी पुठे नी ली जाय;
ने तेरी ईज्जत तेरे पुठे मसाण मां नी जाय।3
भले तेरा जीवतेला दाहड़ा मां आपसाक भागवाळु समज्यु हय,
जत्यार तु तारी भलाय करे तत्यार माणसे तारी बड़ाय करसे।
तेबी चु मरीन तेरा मर्या-सर्या डाहा-बुड़ाम भेसकाय जासे,
जे कदी वीजाळाक नी देखे।
धनेन ईज्जत हात करलु माणुस तेरेम समज नी हय,
चु तीनु ढुरेन तसु छे, जे मरीन सर जाय।
Source notes (3)
- Cross-reference मत्ती 16:26
- Cross-reference उजेंता बुले 11:19
- Cross-reference 1 तीमुथीयुस 6:7
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.