Bhilali Bible
भजन सहीता 48
भगवानेन सहर सीयोन
कोरह अवल्यातेन लिखलो भजन, जो एक खास गीत बी छे
आपणु यहोवा भगवान आपसा सहर मां,
आपसा चुखला बयड़ा पर, मटु ने बड़ाय करे असु छे।
ने तेरु सीयोन बयड़ु उचली जागा पर बेसकु वारु छे,
ने जु बयड़ु आखी धरती वाटे खुसीन झीर छे। चां मटला राजान सहर छे।1
तीना सहर मां भगवान उचु कीलु मानाये।
बेसका राजा, हीना भगवानेन सहरेन वीरुद भेळा हया;
ने सीयोन बयड़ा भीणी चाल पड़्या।
चे सहरेम भगवानेन सेक देखतात चकराय गुया,
ने चे घाबराय्न ढास पड़्या।
ने चे बीहीन कापणे बाजी गुया, ने तीनुक भारलीस बायरीन पुर्यो हवे,
ने दुखे तसो दुख हात लाग गुयो।
ए भगवान, तु उगन्ली वाहळे करीन तरसीस सहरेम बणावला मटला ढंड्याक बी तुड़ नाखे।
जसो सामळ्या, तसोत आपणु सरगेन सीपायड़ान,
मटला यहोवा भगवानेन सहर मां हवतेलो देखला,
आपणा भगवानेन सहर मां तसोन-तसो हवतेलो देखला छे;
भगवान सहरेक जलम काठो राखसे।
ए भगवान, हामु तारा मंदीर मां
तारी दया पर वीच्यार करला छे।
ए भगवान जसो तारो नाव छे,
तसात तारा गुण धरतीन खुणे लग गावायता रवे;
तारा जेवड़्या हातेम नीयाव भरलु छे।
तारा नीयावेन काम सी सीयोन बयड़ा पर रवण्या खुस रवे;
यहुद्या सहरेन आखा माणसे जां
“यहुदान पुरे” बी खुस रवे।
ए मारा ईस्रायली माणसे, सीयोन सहरेन ने यरुसलेम सहरेन च्यारु-मेर चालीन फीरु, ने तेरा माळावाळा मीनार काजे एकेक करीन गीणु।
तेरा कीलान अवारकुट पर नींगा नाखु, तेरी हवेली काजे धीयान दीन देखु;
काहाकी तुहुंं आवती पीड़ी काजे ईनी वातेन बारामां देखाड़ सकु।
छाचलीन जुत भगवान छे, जु आपणु जलमकु भगवान छे।
आपणुक मरता लग चु आपणी अगवाय करसे।
Source notes (1)
- Cross-reference मत्ती 5:35
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.