Bhilali Bible
भजन सहीता 47
आखा सी मटु राजु
भजन गावण्यान डाहला वाटे कोरह अवल्यातेन लिखलो मीसमर भजन
ए राज-राजेन आखा माणसे, तेर वाटे थापड़्या आजाड़ु।
खुस हय्न जुरेत आयड़ीन तेरे वाटे जीतेन गीत गावु।
यहोवा भगवान आखाम मटु रवण्यु भगवान छे, चु आखी धरतीन राजान राजु छे,
हेरेसी आखा तीनाक बीहु।
चु राज-राजेन माणसे काजे हामरा हक मां कर देदु,
ने आखा राजेन माणसे काजे हामरा पांय तळे कर देदु।
चु हामरे वाटे धरतीन जागु नेवाड़ लेय;
जु जागु तेरा लाटेकला याकुब्यान अवल्यात वाटे परम करे असु छे।
यहोवा भगवान, जीतेन गीत भेळ,
ने नरसींगान वाजा भेळ,
सरग मां तेरी राजगादीन्चां जाणे बाजी रयु।
भजन गावु, यहोवा भगवानेन भजन गावु! भजन गावु,
हामरा राजान भजन गावु।
काहाकी भगवान आखी धरतीन राजु छे,
ने एक अळी वारु भजन बणायन गावु।
भगवान आपसी चुखली राजगादी पर;
बठीन आखा राजेन माणसे पर राज करे।
दीसरा राजेन माणसेन राज-करन्या बी,
अब्राहमेन भगवान बणने करीन भेळा हंय रया। छाचलीन चे बी जाण लेदा की,
जु भगवानुत आखा पर राज-करन्यु मालीक छे;
ने धरती पर रवण्या आखान सुक-सांती हीना भगवानेन हातेम छे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.