Bhilali Bible
भजन सहीता 46
भगवान हामरु आसरु छे
कोरह अवल्यातेन लिखलो एक गीत भजन-गावण्यान डाहला वाटे अगवायन-बुल: अलामथ रेंगो मां गावजु।
भगवानुत हामरु आसरु ने ताकत छे।
हामरे पर गरा आवे, ती चु छाटुस मदत करने आवे।
हेरेसी हामु नी बीहजे, भले आखी धरती उथली जाय;
भले आखा बयड़ा डुबीन दरीयान बुंदे जात रवे;
भले दरीया-समुंदरेन झलक वाजती जाय्न आवे,
ने तेरु फेस्टु आवे; ने बयड़ा तीना आंधी तुफान सी कापे।
एक नदी छे; तीनी नदीन पाखड़ान सुवा भगवानेन सहरेक खुस कर देय।
ने चे सुवा आखाम उचे रवण्या भगवानेन चुखला मंदीर काजे खुस कर देय।
भगवान तीना चुखला सहरेन ईचमां छे, जो कदी नी टळे;
वीजाळो हवतेत भगवान तेरी मदत करसे।
चु बुल पड़्यु ने धरती पीघळी गुय; देस देसेन माणसे बीहीन कचाटु कर रया;
ने राज-राजेन माणसे लथड़ी पड़्या।
सरगेन सीपायड़ान यहोवा भगवान, हामरे पुठे छे;
याकुब्यान भगवान हामरु आसरान कीलु छे।
आवु, यहोवा भगवानेन कामेक देखु,
ने चु धरती पर कसु-कसु उजाड़ करलु छे।
चु धरतीन ईना खुणाम सी पला खुणाम लग लड़ाय सार देय।
चु धंद्लीक भांज देय ने भालान दुय टुकड़ा कर देय।
ने लड़ाय्न घुड़ा-गाडी काजे आक्ठा मां धपाड़ देये।
“आखा राजेन माणसे, हुगा हंय जावु, ने जो जाण लेवु की, मेत भगवान छे;
आखा राजो मां मारात गुणे गावायसे।
आखी धरती पर मारीत बड़ाय हवसे।”
सरगेन सीपायड़ान यहोवा भगवान, हामरे पुठे छे;
याकुब्यान भगवान हामरु आसरान कीलु छे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.