Bhilali Bible
भजन सहीता 45
राजा वाटे ईयावेन गीत
कोरह अवल्यातेन एक मसकील भजन, जो एक परमेन गीत छे। भजन-गावण्यान डाहला वाटे: सोसनीम रेंग मां गावजु।
मारा मन मां, मारा राजा वाटे एक बेसकु वारु वीच्यार उगळीन आय रयु;
जो गीत मे राजान बाराम बणावलु छे,
चो गावणे करीन मारी जीप उछळी रय;
ने मारी जीप वारलु लिखारान पेनेन तसी बण गुय।
माणसेन अवल्यात मां, तु आखाम घाटाळु छे,
तारा हुटड़ाम सी दयान वात उही रय।
हेरेसी भगवान तुसेक जलम संयबरकत आपलु छे।
ए मुखी राजा, तारो मटलो नाव;
ने ताकत तारी तलवार कमर मां बांद!
छाचला, नीचळा, ने धरमी माणसेन सात देणे करीन,
तु आपसा सेक सी घुड़ा-गाड़ी पर बसीन जीततु जाय्न अगु जातु रव।
तारा जेवड़्या हातेन साहरे चकराड़न्या वारु काम उजेंता हवणु चाहजे।
ए राजा, तारा बीलखा ते तीखा छे;
चे तारा वेरीन छाती मां छरकी जासे;
तार अगळ राज-राजेन माणसे हीट पड़से।
ए भगवान, तारी राजगादी पीड़ी-डीट
जलम टेकली रवसे,
तारा राजेन डेंगु नीयावेन डेंगु छे।
तु धरमेक परम करे, ने कुहराय भीणी रीस करे।
हेरेसी भगवान, तारु भगवान,
तुसेक तारा साती सी वदु
खुसीन तेल रेचवीन नेवाड़ लेदलु छे।
तारा आखा पुथल्या भाती-भातीन ईत्तर सी वारु गंदाये;
हातीन दात सी सींगारली तारी हवेली मां तारवाळा झुणगान सुर सामळीन तु खुस हवे।
ए राजा, तारा राजवाड़ा मां ईज्जत करे असा रेट बायरा छे,
तींद्रेम राजान पुरे बी छे। राणी बन्नली राजान-पुराय ते तारे जेवड़्ये आंगे,
ओपीर देसेम वाळा आखाम वारलु सोना सी सींगराय्न उबी हंय रय।
ओ राणी बन्ली राजान-पुरे, सामळ! वारु मन लागाड़ीन सामळ;
तारा माणसेक ने आपसा बासेन घराणाक वीसरी जा।
तत्यार राजु, तारा घाटाळा सीकान हर करसे;
ने तु तेरीत ईज्जत करीन तेरी सेवा-चाकरी कर्या कर।
सोर सहरेन पुरे मतलब चां वाळा;
मातला माणसे तुसेक भेट करीन खुस करनेन करसे।
राणी बंन्ली राजान-पुरे बंगला मां बेसकी सींगार करली छे;
तेरा पुथल्या मां सोनान झालर लागली छे।
सोनान झालर लागला चकराड़न्या पुथल्या भेळ तीनीक राजान्चां मेकी आवसे;
ने तेरा साती कुवारली पुरे काजे बी राजान्चां मेकी आवसे,
जे वरात्या हय्न तेरे पछळ-पछळ चाले।
तीनु पुरेक हास्ता-नाच्ता जाय्न पुगाड़ देसे;
चे खुसी-खुसी राजान हवेलीम भराय जासे।
तारा डाहला बासेन जागा पर तारा पुर्या राज करसे;
तीनुक तु आखी धरती पर राजु बन्नेन हक आपसे।
मे असु करीस की, तार नावेन वात-वीच्यार पीड़ी-डीट हवती रवसे,
तेरेमां राज-राजेन माणसे जलम तुसेक बेसकु वारु कवता रवसे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.