Bhilali Bible
भजन सहीता 44
छुटकारा वाटे दुवा
भजन-गावण्यान डाहला वाटे: कोरह अवल्यातेन एक मसकील
ए भगवान, हामु हामरा डाहा-डाहान मुंहडे,
उजेंता सामळी रया की,
तु तींद्रा वीत्या दाहड़ा मां
काय-काय काम करलु।
तु तारे हाते करीन जी जागा,
दीसरा राजेन माणसे धड़े सी हापकीन तीनुक नीकाळ देदु।
तु दीसरा देसेन माणसेक वेला पाड़ीन तीनुक जां सी ढासाड़ देदु,
ने जां हामरा माणसेक च्यारुमेर वसाड़ देदु।
काहाकी चे तलवारेन भुरसे ईना देसेम नी वस्या,
चे आपसा ताकतेन भुरसे नी जीत्या;
चे ते तारा जेवड़्या हाते ने तारा ताकुतेन हाते,
ने तारा खुसीन सेकेन साहरेत जीत हात कर्या,
काहाकी चे तुसेक चाहतेला।
ए भगवान, तुत मारु राजु छे;
तुत याकुबेन अवल्यातेन भलाय वाटे जीतेन हुकुम आप।
तार साहरे, हामु हामरा वेरीक ढासाड़ देसुन, तार नावेन ताकत हामु हामरा वेरीक कुचरसुन।
काहाकी मे मारी धंद्ली पर भुरसु नी करो,
ने नी मारी तलवार मारी राखवाळी कर सके।
बाकुन तुत हामुक हामरा वेरी पर जीत हात करनेन जुर आप्यु।
ने हामरे पर रीस करन्याक कमजुर ने लाजवाड़ देदु।
ए भगवान, हामु आखु दाहड़ु तारीत बड़ाय करसुन,
ने जलम तार नावेन गुण गावता रवसु।
बाकुन हय, तु हामुक छुड़ देदु ने हामरी नाव-बद्दी हवणे देदु।
ने वेरी साते लड़ाय करनेन टेमे, तु हामरी सात नी देदु।
तु हामुक वेरी अगळ सी पछा कर देदु,
ने हामरा वेरीक हामरे धड़े सी हापकी लेदु।
तु हामुक खटक्याक आपला गाडरान तसु कर देदु,
ने हामुक दीसरा राजेन माणसे मां रावण्या-तीवण्या कर देदु।
तु तारा माणसेक सस्तु-सट वेच देदु;
हामुक आखा माणसेन हात मां वेच्यु, ती तु पयस्या वाळु नी हयु?
तु ते हामरे धड़े वाळान साहरे हामरी नाव-बद्दी कराय रयु,
ने हामरे च्यारु-मेर रवण्या हामरी हासी उडाड़े।
तु हामुक राज-राजेन माणसे मां हासणेन कवाड़ु बणाय रयु,
ने देस-देसेन माणसे मुणको डुलाड़ी-डुलाड़ीन हासे।
आखु दाहड़ु मारु वाक मार अगळ रवे,
ने मे आखु दाहड़ु लाजवायतु रवो।
कुहर्यान ने बदलु लेण्यान साहरे ने वाक नीकाळन्यान साहरे,
ने हासी उडाड़न्यान साहरे।
जो आखो हामरे साते वीत्यो,
तेबी हामु तुसेक नी ईसर्या।
ने हामु तारी बुली काजे तुड़ीन तुसेक धुकु नी देदा।
हामरो मन पछो नी वळ्यो,
हामरा पाय तार वाट्ये सी टळ्या नी।
तेबी तु हामुक लेंड्यान जागा मां रंदळी देदु,
असो लागे की तु हामुक आंदाराडुब खुयारा मां ढाक देदु।
कदी हामु हामरा भगवान काजे छुड़ीन,
दीसरा देव-धाणीन्चां जाय्न हात जुड़ीन दुवा करजे;
ती भगवान ईनी वात काजे नी जाणे काय?
चु ते मन मां सातायली वातेक बी जाणन्यु छे।
ए भगवान, तारा वेरी हामु काजे बादान गाडरान तसा समजे;
ने हामु तारा असामी छे करीन चे दाहड़ीत हामुक मारनेन कर्या करे।
ए भगवान-मालीक, जाग जा! तु काहा सुवे?
उठ! हामुक जलमकुत मां छुड़े।
तु काहा आड़ु भाळ रयु?
ने हामरो दुख ने हीड़ा-पीड़ा काहा वीसरी गुयु।
काहाकी हामरु जीव धुळा मां भेसकाय ज्यु,
ने हामरो पेट धरत्ये रगड़ाय रयो।
हामरी मदत करने करीन उबु हव,
ने तु तारी दयान साहरे हामुक बचाड़।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.