Bhilali Bible
भजन सहीता 27
भगवानेन वीजाळो ने भुरसु
दावुदेन भजन
यहोवा भगवान मारो वीजाळो ने मेसेक बचाड़न्यु छे;
ती मे कुणीक देखीन बीहो?
यहोवा भगवान मारी जीवाय्न आसरु छे,
ती मे, कुणीक देखीन बीहो?
जत्यार वेरी माणसे, मार पर लड़ाय करे, ने मेसेक मारनेन कुसीत करे,
ती चे झटवाय्न हीट पड़से।
भले सीपायड़ान टुळु बी, मेसेक घेरवी लेय,
तेबी मे, नी बीहो; भले चे,
मारी वीरुद करीन लड़ाय करने आवे,
तेबी मे, बेफीकर्यु रय्स।
मे, यहोवा भगवान धड़े जु वाटु मांग रयु की,
मे जीवीस तीं लग, यहोवा भगवानेन घर मां रहो,
ने यहोवा भगवानेन वारलु सीकु देखतु रहो,
ने तेरा मंदीरेम रय्न,
तेरी राय लेतु रहो।
काहाकी गरान टेमे, यहोवा भगवान, मेसेक आसरु आपसे।
चु मेसेक आपसा तम्बुन बन्नला मंदीर मां डुकाड़ लेसे,
ने मेसेक मटला ढाटा पर चड़ाय्न बचाड़ लेसे।
हंय मे, तीनु वेरीक जीत लीस, जे मेसेक घेरवी रया।
ने मे, भगवानेन मंदीर मां जुर सी, जीतेन गीत गावतु जाय्न बादा चड़ाय्स;
ने वाजा-गाजा भेळ तेरा भजन गाय्स।
ए यहोवा भगवान, जत्यार मे, तार धड़े दुवा करो, तत्यार तु, मारी दुवा सामळ;
मार पर दया कर ने मेसेक जपाप आप।
जत्यार तु मेसेक कयु, “मारा मुंहडाक देखणेन हेर कर।”
तत्यार मारो मन तुसेक कयो “ए यहोवा भगवान, मे तारा मुंहडाक देखणेन हेर करीस।”
तु मेसेक देखीन आड़ु मां भाळे।
मे तारु चाकर्यु छे,
ने तु मारी मदत करतु आय रयु।
हेरेसी मार पर कीचवाय्न मेसेक मां ढासाड़े।
ए मेसेक बचाड़न्या भगवान,
तु मेसेक छेटु मां करे ने मेसेक मां छुड़े।
ए यहोवा भगवान, भले मारा माय बास बी, मेसेक छुड़ देसे;
तेबी तु मेसेक समाळसी।
ए यहोवा भगवान, मेसेक सीकाड़, ने मारी अगवाय करीन तार वाट्ये चालाड़;
मारा वेरीन साहरे मेसेक मोकळा,
ने सोवताळा जागा मां ली जा।
ने झुटा गवा जे खुन खराबु करनेन ताक मां छे, चे मारी वीरुद करने करीन, उबा हंय रया।
हेरेसी मेसेक तीनु वेरीन हातेम घुण आपे।
मे, ईनी धरती पर जीवतेलु रय्न, यहोवा भगवानेन भलाय देखीस कदी तेरे पर असु भुरसु नी रवतु,
तत्यार ते मे बेसकु फीकुर मां पड़ जातु।
हेरेसी यहोवा भगवानेन वाट देख;
ने काठु-जीव करीन दम धर;
ने यहोवा भगवानेन वाट देखतु रव।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.