Bhilali Bible
भजन सहीता 28
भगवान धड़े, मदत वाटे दुवा
दावुदेन भजन
ए यहोवा भगवान, मे तारेत धड़े आयड़ीन दुवा करो;
ए मारा जलम चापर्या;
मारी दुवा सामळीन बी हुगु मां हंय रवे,
नीते मे, तीनु मरला माणसेन तसु हंय जाय्स,
जे मसाण मां हुगा हय्न पड़ रया।
जत्यार मे, आयड़ीन दुवा करो,
ने जत्यार मे तारा चुखला मंदीर भीणी हात पाखरीन दुवा करो, तत्यार मारी दुवा सामळी ले।
गलत काम करन्या ने कुहर्या भेळ मेसेक मां घीसड़े;
चे आपसे आड़्ये-धड़्ये वाळा साते रवणेन वात ते करे,
बाकुन आपसा मन मां कुहराय्न वीच्यार करे।
तींद्रा कामेन साहरे,
तींद्रा भुंड्ला कामेन साहरे तींद्रे धड़े बदलु ले;
तींद्रात हातेन कामेन साहरे तीनुक डंड आप।1
चे कुहर्या माणसे, यहोवा भगवानेन काम पर;
तेरे हाते करला काम पर धीयान नी देय;
हेरेसी चु तीनुक हीट पाड़से
ने पछु उठणे नी देय।
मे, यहोवा भगवानुत काजे वारु कय्स;
काहाकी चु, मारी दुवा सामळी लेदु।
यहोवा भगवानुत मार वाटे ढाळ छे;
ने मारी ताकत छे।
मे तेरे पर भुरसु कर्यु ने चु मारी मदत कर्यु। हेरेसी मारो मन बेसको खुस छे;
ने मे, भगवान वारु छे असो गीत गाय्स।
यहोवा भगवान आपणा माणसेन ताकत छे;
चु आपणा नेवाड़ला राजा वाटे छुटकारु आपण्यु आसरु छे।
ए यहोवा भगवान, तारा माणसेक बचाड़,
ने जे तारी जाहगीरी छे तीनुक,
तु संयबरकत आप, ने तु गुवाळ्यान तसु, तींद्री गुवाळी कर,
ने तींद्री जलम राखवाळी कर।
Source notes (1)
- Cross-reference उजेंता बुले 22:12
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.