Bhilali Bible
भजन सहीता 29
आधी तुफान मां यहोवा भगवानेन अवाज
दावुदेन एक भजन
ए भगवानेन पुर्या-पारी, तुहुंं यहोवा भगवानेन गुण गावु;
जुरभर्या ने सेक-सींगार भर्या भगवानेन बड़ाय करता रवु।
यहोवा भगवानेन बड़ाय करु;
चुखला रय्न यहोवा भगवानेक ढंगा वळीन जलम वांद्ता रवु।1
यहोवा भगवानेन बुल बेसका पाणी पर फीरे;
यहोवा भगवानेन बुल,
बेसका पाणी पर गाजीन सामळाये।
यहोवा भगवानेन बुल, बेसको ताकतवाळो छे,
ने यहोवा भगवानेन बुल बेसकु सेकवाळु छे।
यहोवा भगवानेन बुल आंधीन तसी देवदार नावेन झाड़काक भांज देय;
यहोवा भगवानेन अवाज, लबानोन नावेन बयड़ा मां, जे देवदारेन बेसका मटा झाड़का छे, तीनुक बी भांजीन रावण्या-तीवण्या कर देय।
भगवान मटा-मटा बयड़ाक केवड़ान तसु कुदाड़े;
लबानोन बयड़ा काजे ने सीरीयोन बयड़ा काजे जंगली केवड़ान तसु गदो-गदो कुदाड़े।
यहोवा भगवानेन बुल वादळान इजळ्ये आपटाये, ने तीनीक च्यार-चीर्या कर देय।
यहोवा भगवानेन बुल उजाड़्या बयड़ा काजे थरो-थरो कापाड़ देय।
यहोवा भगवान कादेसेन उजाड़ी बयड़ाक बी कापाड़े।
यहोवा भगवानेन अवाज सी हरनी दवड़ी जाय; ने तेरे अवाज बयड़ान आखा झाड़कान पान्टा बी झड़ीन पड़ जाय।
तत्यार बी तेरा मंदीर मां आखान-आखा जोत कह्या करे।
“सेक-सींगार भर्या भगवानेन बड़ाय हवती रवणु चाहजे।”
यहोवा भगवान ते मुसळ-धार्या पाणीन टेमे बी आपसी राजगादी पर बस रवलु;
यहोवा भगवान जलमकुत राजा बणीन बस रयु।
हेरेसी यहोवा भगवान आपसा माणसेक ताकत आप्या करे;
ने यहोवा भगवान आपसा माणसे काजे सांतीन संयबरकत आप्या करसे।
Source notes (1)
- Cross-reference भजन सहीता 96:7-9
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.