Bhilali Bible
भजन सहीता 30
भगवान काजे बेसकु वारु कवणु
मंदीर काजे भगवानेन हातेम सुपरुत करनेन टेमे दावुदेन बणावलो मीसमर भजन
ए यहोवा भगवान, मे तारी बड़ाय करीस; काहाकी तु मेसेक मोतेन खुयाराम सी बचाड़्यु;
ने मारा वेरीक, मार पर हासणे नी देदु।
ए मारा यहोवा भगवान, मे मदत वाटे तार धड़े दुवा कर्यु;
ने तु मेसेक वारु कर देदु।
ए यहोवा भगवान, तु मार जीव काजे पाताळेम सी नीकाळ लेदु;
ने तु मेसेक मरने नी देदु,
बाकुन जीवतेलु राख्यु।
ए यहोवा भगवान पर भुरसु करन्या माणसे,
तेरो भजन गावु;
ने यहोवा भगवान बेसकु चुखु छे
जो हेर करता जाय्न तीनाक बेसकु वारु कवु।
काहाकी तेरी रीस ते ईतरीक वार लग रवे;
बाकुन तेरी दया जलमकीत रवे।
भले तुहुंक आखी रात रड़नु पड़े,
तेबी तुहुंं संदारे खुस हय्न गखळाय्सु।
मे ते मारा सुक मां रवतेलु ती मे कयु,
“मे जलमकु बणीन रय्स।”
ए यहोवा भगवान तु ते दया करीन मटला,
बयड़ान तसु काठु ढुस उबु राख्यु;
जत्यार तु अथु भाळ लेदु;
तत्यार मे घाबराय गुयु।
तत्यार ए यहोवा भगवान, ए मारा मालीक,
मे तार धड़े लीलघाय करीन असु दुवा करलु,
“जत्यार मे मर जाय्स ने मेसेक मसाण मां गाड़ देसे ती,
ए भगवान! तुसेक नफु जड़से काय?
ए भगवान! धुळाम भेसकायलो मारो डील तारी बड़ाय करसे काय?
चो तारी छाचाय्न बारामां जुर सी कवसे काय?
ए यहोवा भगवान, मार पर दया कर, ए भगवान,
तु मारी सामळीन मदत कर!”
तेरेमां तु मारो रड़नु-कलपणु,
नाचणे मां बदली देदु;
तु मारा दुखेन पुथल्या उतारीन खुसीन पुथल्या पेहरायु।
काहाकी मारु जीव तारो भजन गावतु रवे;
ने कदी हुगु नी रवे।
ए मारा यहोवा भगवान,
मे जलम तारा गुण गाय्न तारीत बड़ाय करतु रय्स।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.