Bhilali Bible
भजन सहीता 31
यहोवा भगवान मां भुरसा वाटे दुवा
वाजाड़न्यान डाहला गावण्या वाटे, दावुदेन एक मीसमर भजन
ए यहोवा भगवान,
मारु भुरसु तारेत पर छे
मेसेक कदी बी लाजवायणे घुण देय।
तु तारा खरला-धरमेन अनसारे मेसेक बचाय ले।
ए यहोवा भगवान मारी दुवा सामळ,
ने मेसेक छाटुस बचाड़ ले!1
तुत मार वाटे चापर्यान तसु छे, तेरेमां चापर्यान तसु रय्न मारु आडु आव,
ने भीतड़ान तसु मार चारेमेर रय्न मेसेक साती ले, ने तार नाव सी तु मेसेक वाट देखाड़ ने अघु लीन चाल।
तु मेसेक तीनी जाळेम सी नीकाळ, तीनी जाळेम,
वेरी मेसेक मनेम घेरवी लेदला छे।
मे मारु जीव, तारा हातेम आप दम;
ए यहोवा भगवान, ए खरला भगवान,
तु मेसेक मुल लीन छुड़ाय लेदु।2
जे, लुच्चाय ने मटाय्न चीज पर मन लगाड़े, तीनु माणसे सी मे रीस करो।
मारु भुरसु ते यहोवा भगवानुत पर छे।
मे तारी दया सी,
खुस हय्न गखळायस ने मजाम रय्स;
काहाकी तु मारा दुख काजे देख रयु,
मे वेला कर रयु चो तु जाण रयु।
ने तु मेसेक, मारा वेरीन हातेम जाणे नी देदु, बाकीन तु मेसेक बचाड़ीन,
मोकळा जागा मां उबु करलु।
ए यहोवा भगवान, मार पर दया कर;
काहाकी मे गरा मां छे;
मारा डुळा, ने मारु जीव ने मारो डील
दुख मां पड़ रयो।
दुख मां मारी जीवाय, खत्तम हवणे बाजी रय;
ने मारी उमर बी, कमती हवणे बाजी रय;
पापेन साहरे मारी ताकत बी, कमती हंय गुय,
ने मारा हाटका बी गळ-गुया।
मारा आखा वेरीन साहरेत, मारी नाव-बद्दी, आड़्ये-धड़्ये वाळा आखा माणसेन ईचमां हंय रय,
जतरा बी मारा उळखायता छे, चे मेसेक देखीन बीहे;
जतरा बी मेसेक रुड़े चालतेलु देखे,
चे मेसेक देखीन छेटेत ढास जाय।
जसा माणसे, मरला माणसेक वीसरी जाय; तसात माणसे, मेसेक वीसरी गुया;
मे फुट्ला ठाहरान तसु हंय गुयु।
मे, बेसका माणसेक मारी बुराय करतेला सामळी रयु;
मार च्यारे मेर बीहाणोत बीहाणो छे;
चे, मार वीरुद भेळा हय्न,
मेसेक मारने करीन मुजगी करे।
बाकुन ए यहोवा भगवान, मे तारेत पर भुरसु करो; मे तुसेक कहो,
“तुत मारु भगवान छे।”
ए भगवान! मारी जीवाय तारा हातेम छे;
मेसेक मारा वेरीन हातेम सी छुड़ाव,
ने मेसेक वेला पाड़न्यान हातेम सी छुड़ाव।
तारा ईना चाकर्या पर, तारा मुंहडान वीजाळो भबळाव।
तारी दयान साहरे मेसेक बचाड़।
ए यहोवा भगवान, मेसेक लाजे घुण पड़ने देय;
काहाकी मे तार धड़े दुवा करलु छे;
मारा वेरीत काजे लाजवाड़ दे;
तेरमां चे हुगा हय्न मोतन कळ मां पड़ रवे।
जे मटाय मां धरमी माणसेन वात काटीन,
तींद्री ईज्जत हळकी करे,
तीनु लुच्चाय करन्या माणसेक गुंगा बणाय दे।
ए भगवान! तारी भलाय बेसकी मटी छे,
जे तारो बीहाणो माने ने तींद्रे वाटे,
तु जी भलाय भेळी करीन मेल रयु,
ने तींद्रे वाटे माणसे अगळ जी भलाय करी-करीन उजेंती बी देखाड़्यु।
ए भगवान, तु ते तारा माणसे काजे, कुहर्या माणसेन आखी गलत मुजगीम सी बचाड़ीन,
तारी हजरी मां सातीन राखे;
तुत तारा माणसेक, तारा खुळाम लीन,
लड़ाय झगड़ा सी बचाय लेय।
यहोवा भगवान वारु छे,
काहाकी चु मेसेक कीलावाळा सहर मां राखीन,
मार पर बेसकु दया कर्यु।
ने मे घाबरातुत कयु,
मे यहोवा भगवानेन नींगाम सी छेटे हंय गुयु।
तेबी मे जत्यार आयड़ीन दुवा कर्यु,
तत्यार तु मारी दुवा सामळी लेदु।
ए यहोवा भगवानेन खरला भगत, तीनाक परम करु!
यहोवा भगवान आपसा खरला माणसेन राखवाळी करे,
बाकुन मटाय करन्या काजे चु वारुत डंड आपे।
ए यहोवा भगवानेन आस करन्या,
आपणु जीव काठु करीन हिम्मत राखु।
Source notes (2)
- Cross-reference भजन सहीता 71:2
- Cross-reference लुका 23:46
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.