Bhilali Bible
भजन सहीता 26
खरला माणसेन दुवा
दावुदेन भजन
ए यहोवा भगवान, मारु भुरसु ते, तारेत पर छे,
तारी खरली वाट्ये चालतु आय रयु;
तेरेमां तु मेसेक नी-गुनाळु ठहराव।
ए यहोवा भगवान, मेसेक देखीन पारखी ले;
मारा मनेन वात काजे चुखी कर ले;
काहाकी मे तारी खरली वाट्ये चालतु आय रयु; ने तारी दया ने परम काजे,
मे उजेंतु कर रयु, ने मे जलम ईना परमेक हेर करो।
मे लुच्चाय करन्या माणसे पुठे नी बठो;
ने धुकु करन्या पुठे कांखुर नी जाम।
मे गलत काम करन्यान टुळा सी मे रीस करो;
ने पापी माणसे साते नी बठो।
मे मारा हात धुय्न नी-गुनाळु देखाड़ीस;
ने मंदीर मां जाय्स, तत्यार मे तारु कदर राखीन बादान वेदीन च्यारुमेर फीरीस,
ने तुसेक बेसकु वारु कय्न जुर्येत गीत गाय्स;
मे तारा चकराड़न्या वारु-कानेन बारामां वात करों।
ए यहोवा भगवान, तारा मंदीरेन आंगणो;
तारो सेक-सींगार भर्यो घर मेसेक बेसको-वारु लागे।
जत्यार तु पापी माणसेन जीव लेसी, तत्यार मेसेक तींद्रे भेळतु घुण मारे।
मारी जीवाय काजे खुनी माणसे भेळे घुण करे।
पापी ने खुनी माणसेन हात कुहराय करता रवे,
ने चे जेवड़्ये हाते पयस्या ठगीन खाणे तीयार रवे।
बाकुन मे ते छाचाय्न वाट्ये चालतु रय्स: तेरेमां ए भगवान,
मार पर दया करीन मेसेक बचाड़ ले।
मे ते, सोवताळ जागा मां उबु हंय रयु; हेरेसी मे नी पड़ो।
मे यहोवा भगवान काजे तेरा माणसेन मंडळी मां वारु कह्या करीस।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.