Bhilali Bible
भजन सहीता 25
राखवाळी ने अगवाय वाटे दुवा
दावुदेन भजन
ए यहोवा भगवान! मे तारेत पर मन लागाड़ो। ने मे तारेत पर भुरसु कर रयु।
ए भगवान, मे तारेत पर भुरसु कर रयु,
मारा वेरी मेसेक जीतणु नी चाहजे;
मेसेक माणसे मां लाजे घुण पड़ने देय।
बाकुन, ए भगवान! जे तारी वाट देखे; चे कदी नी लाजे पड़े,
बाकुन जे असलात धुकु देय चे लाजे पड़ जासे।
ए यहोवा भगवान, मेसेक तारी वाट देखाड़; जी वाट तु मेसेक देखाड़े,
तेरेम कसो चालनु चो मेसेक सीकाड़।
मेसेक तारी छाचाय्न वाट्ये चालाड़, ने तेरेम कसो चालनु चो सीकाड़तु रव।
काहाकी मेसेक बचाड़न्यु भगवान तुत छे,
मे आखु दाहड़ु तारीत वाट देखतु रवो।
ए यहोवा भगवान, तारी दया ने परमेन कामेक हेर कर,
काहाकी असला कामेक ते तु ठेटनुन करतु आय रयु।
ए यहोवा भगवान, मे, जो पाप ने गुना जुवानी मां करलु, तीनु पाप काजे तु पछु हेर मां करे;
बाकुन तार सी वायदु करला परमेन,
ने भलाय्न अनसारे मेसेक हेर कर।
यहोवा भगवान, भलास्यु ने खरलु छे,
हेरेसी चु पापी माणसेक आपसे वाट्ये चालनु सीकाड़से।
जे नीचळा माणसे छे, तीनुक चु सय वाट्ये चालाड़से,
ने चु भगवान तीनुक आपसे वाट्ये चालने सीकाड़से।
जे बी यहोवा भगवानेन वायदा काजे ने तेरा हुकुम काजे पाळे;
तींद्रे साते भगवान बी जलम छाचलु रय्न, आपसीत ताकत सी दया ने परम देखाड़े।
मे बेसका पाप करलु छे; तेबी, ए यहोवा भगवान!
तार नावेन साहरे तु मेसेक माफ कर दे।
जु काहनुक यहोवा भगवानेन बीहाणो माने,
यहोवा भगवान तीने वाट्ये खुस रवे; तीनेत वाट्ये तीनाक चालाड़से।
भगवानेन बीहाणो मानन्यान जीव वारु रवसे,
ने तेरी अवल्यात वायदान देस पर जलम हक जमाड़ीन रवसे।
जे यहोवा भगवानेन बीहाणो माने, तीनुत काजे चु एक दुसतीदारेन तसु वारलु राय आपे।
ने चु तींद्रेत पर आपसु वायदु उजेंतु करसे।
मे जलम यहोवा भगवान भीणी एक-हेट्यु भाळ रय्स;
काहाकी हयुत मेसेक गरा मां सी बचाड़से।
ए यहोवा भगवान, मार भीणी वळीन मार पर दया कर;
काहाकी मे एखलु ने एला पाड़ायलु छे।
मारो मन बेसको घाबराय रयो;
तु मेसेक मारा दुखेम सी बचाड़ ले।
तु मारा दुखेक ने मारी वेलाक देख,
ने मारा आखा पापेक माफ कर दे।
मारा वेरी बेसका सावटा हंय गुयला, चे बेसका रीस करे की,
चे मेसेक झाटकाय्न मार देय असा हंय रया।
तु मारी राखवाळी कर,
ने मेसेक बचाड़; मेसेक लाजे घुण पड़ने देय,
काहाकी मे तारेत आसरे आवलु छे।
ए भगवान! मे तारी छाचाय्न ने खराय सी जीवतु जाय्न तारीत वाट देखो;
ने अळी मारी राखवाळी कर।
ए हामरा भगवान! ईस्रायली माणसेक
आखा दुखेम सी छुड़ाय ले।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.