Bhilali Bible
भजन सहीता 106
मालीकेन आपणा माणसे वाटे भलाय
यहोवा भगवानेन बड़ाय करु।
तीनाक बेसकु वारु कवु, काहाकी चु भलास्यु छे;
ने तेरी दया ने परम जलम छे।1
यहोवा भगवानेन जुराकला कामेन बारामां कुण देखाड़ सके?
तेरा गुण, पुरा-पुरा कुण गाय सके?
काय वारु छे, जे नीयावेन अनसारे वेहवार करे,
ने दाहड़ीन धरमेन काम कर्या करे!
ए यहोवा भगवान, तु तारा असामी पर दया करसी। तीनी टेमे मारी हेर करीन, मार पर बी दया करजी।
ने मेसेक बी छुड़ाय लेजी।
मे तीना दाहड़ा काजे देखणेन हेर करो, तीने दाहड़े तारा नेवाड़ला माणसे आखी बरकत हात करसे।
तारा असामी साते खुस हय्न खुसीन साजल्यु बणनेन हेर करीस;
ने मे तींद्रे भेळतु तारी बड़ाय करनेन ने तार साहरे मटाय करनेन हेर करो।
जसा हामरा आड़ा-बुड़ा पाप करला, तसात हामु बी पाप करला छे।
हामु गुनाळात छे; हामु बेसकी कुहराय करला छे।
हामरा आड़ा-बुड़ा मीसर देस मां हतला,
ती चे तारा चकराड़न्या कामेन मतलब नी समज्या।
चे तारी दया काजे हेर नी कर्या, ने रात्ला समुदर धड़ेत तारी वीरुद कर्या।2
तेबी तु तार नावेन करीन तीनुक बचाड़्यु;
तेरेसी तु तारी मट्ली जुरभरी ताकत उजेंती कर्यु।
तत्यार तु रात्ला समुदर काजे लड़्यु ने चो सुक गुयो;
ने तीनुक उंड्ला समुदर मायन असु चालाड़ीन ली जाती रयु,
जसु सुकली जागा मायन चालाड़ीन ली जाती रयु।
हेरेसी तु तीनुक तींद्रा वेरी सी बचाड़ लेदु।
खर करन्या वेरीन हातेम सी तीनुक छुड़ाय लेदु।
ने पाणी तींद्रा वेरीक डुबाड़ लेदो।
ने तींद्रे मायन एक बी, नी बच्या।
तत्यार चे भगवान, हामरा आड़ा-बुड़ा तारी वात पर भुरसु कर्या,
ने चे तारा गुणेन गीत गाया।3
बाकुन चे तेरा काम काजे छाटात वीसरी गुया,
ने चे तेरी अगवायन-बुल सामळने करीन वाट नी देख्या।
बाकुन बयड़ा मां बेसका हाय कर्या,
ने उजाड़्या बयड़ा मां भगवान काजे पारख्या।
हेरसी चु तींद्री मांगे काजे पुरी ते कर्यु,
बाकुन तींद्रे पर रुग मकलीन तींद्रे मायन बेसका जणा काजे मार नाख्यु।4
उजाड़्या बयड़ान डेरा मां एक कावा चे मुसा पर,
ने यहोवा भगवान पर चुखला पुजारा हारुन पर कुहराया।
तीनी टेमे धरती फाट गुई,
ने दातान ने अबीराम काजे तींद्रा टुळा भेळे गीळ गुय।
ने तींद्रा सात देण्या दीसरा टुळा मां आक्ठो लाग गुयो,
ने तीनु कुहर्याक बाळीन भसम कर देदु।5
चे होरेब बयड़ा धड़े, एक केवड़ान मुरती बणाया,
ने सोनान घड़ली मुरतीक वांदीन तेरी पुजा-पाट कर्या।
असा करीन चे सेक-सींगार भर्या भगवानेन बड़ाय करने रहणी दीन,
चारा खाण्या बेलेन मुरतीन बड़ाय कर्या।
चे तीनुक छुटकारु आपण्या भगवान काजे ईसरी गुया,
जु मीसर देस मां मटा-मटा काम करलु हतलु।
चु हाम जातीन देस मां, चकराड़न्या काम करलु,
जु रात्ला समुदरेन ईचमां बी बीहाड़े असा काम करलु।
हेरसी चु तीनुक कयु “तुहुंंक ते मे काय कत्यारुन मार नाखतु;
कदी मारु नेवाड़लु माणुस मुसा मारे ईचमां ने तुंद्रे ईचमां हुबु नी रवतु,
ने चु मारी रीस नी सेळेवतु, ती मे काय कत्यारुन तुंहुक मार नाखतु।”6
चे ते भगवानेन बुल पर भुरसु नी कर्या;
तत्यार चे तीनी वातेन नीकारु कर देदा।
बाकुन चे आपसा-आपसा तम्बुम रय्न कुर-कुर कर्या।
चे यहोवा भगवानेन वात नी मान्या।
हेरेसी चु तींद्रे बारामां जी सगुन खादु की,
मे ईनुक उजाड़्या बयड़ात मां मार नाखीस।7
ने तींद्री अवल्यात काजे आड़जात्या माणसे मां हीट पाड़ीस,
ने तीनुक देस-देस मां रावण्या-तीवण्या कर दीस।8
चे पोरवाळा मुलक मां पुजायण्या बाल देव काजे पुजणे बाजी गुया,
ने नी-जीव्या मुरत्यान चड़ावला जानवरेन सीकार खाय लेदा।
चे आपसा छीनाळ्या कामेन साहरेत भगवान काजे रीसवाड़्या;
ने तींद्रे पर रुग आय पड़्यु।
तत्यार पीनहास छीनाळो करन्या दुय जणाक उचकाणुन डंड आप्यु,
ने तत्यारुत रुग ढास पड़्यु।
पीनहासेन असो करनु,
पीड़ी-डीट जलम लक धरमेन काम गीणायो।9
चे, मरीबा नावेन झीर धड़े बी, यहोवा भगवान काजे रीसवाड़्या,
ने तींद्रे सी मुसान नुकसाण हयो;
काहाकी चे जीव-आत्मान वीरुद काम करला,
तीनी टेमे मुसु रीसवायन नी-वीचारे बुल पड़लु।10
वायदान देस मां पुगीन बी, चे तीनी जातीन माणसे काजे नी मार्या,
तीनु जाती काजे मारने वाटे यहोवा भगवान तीनुक हुकुम आपलु।
बाकुन चे तीनी जात मां भेसकाय गुया,
तींद्रे साते उठणे-बसणे करीन तींद्री रीती-भाती सीकी गुया;
ने चे तींद्रा मुरत्यान पुजा-पाट कर्या,
ने चे मुरत्यात तींद्री वाटे फांद बण गुया।11
बाकुन चे, भुतेन गाता अगळ,
आपसा कनानेन बेटा-बेटीक मारीन बादा चड़ाय देदा।12
असा करीन चे आपसा बीन-गुनाळा बेटा-बेटीन लुही, कनान देसेन ईनु मुरत्या पर बादान रीते चड़ाय देदा।
ने कनान देस तींद्रा लुही सी ईटळी गुयो।13
ने जे मुरती पुजण्या आपसात असला कामे करीन ईटळी गुया,
ने आपसा कामेन साहरे छीनाळ्या बी बण गुया।
तत्यार यहोवा भगवान, आपसा असामी पर रीसवाय पड़्यु,
ने चु आपसा माणसे भीणी छीट करने बाजी गुयु।
तत्यार चु तीनुक आड़जात्या माणसेन हक मां कर देदु,
ने चे आड़जात्या वेरीत तींद्रे पर राज कर्या।
चे वेरी तीनुक वेला पाड़्या,
ने जबरन दत-तथा काम कराड़ीन गुलामी कराड़्यु।
भगवान आपसा माणसे काजे अळी-अळीन तींद्रा वेरीन हातेम सी छुड़ायु,
बाकुन चे तेरी वीरुद मां युजना बणावतात गुया,
ने आपसात पापेन, भार मां डुबता गुया।
तेबी, चे गरान टेमे भगवान भीणी दुवा कर्या,
ती चु तींद्री दुवा सामळीन तींद्रे पर दया करतु रयु।
तींद्री भलायन बुली काजे हेर कर्यु,
ने आपसा नी-छेव्या दया करला परमेन अनसारेत तीनुक माफ कर देदु।
जे तीनुक धरीन ली जाय्न गुलाम बणायन ली गुयला,
तीनु आखा पर दया कर्या।14
ए हामरा यहोवा भगवान हामुक छुड़ाव,
ने हामुक आड़जात्यान राज्य-राज्य मां सी नीकाळीन भेळा कर,
हेरेन करीन की हामु तारा चुखला नाव काजे बेसकु वारु कवजे,
ने तारी बड़ाय करता जाय्न तारे करीन मटाय करजे।
ईस्रायली माणसेन यहोवा भगवान ते,
नी-छेवाय टेम सी चु, नी-छेवाय टेम लग जलम तक वारु छे।
आवु, तेरा आखा असामी कवता, “आमीन!”
हालेलुया कय्न यहोवा भगवानेन बड़ाय करु!15
Source notes (15)
- Cross-reference 1 ईतीहास 16:34; 2 ईतीहास 5:13; 7:3; एज्रा 3:11; भजन सहीता 100:5; 107:1; 118:1; 136:1; यीरम्या 33:11
- Cross-reference यीरम्या 14:10-12
- Cross-reference नीरगमन 14:21-31
- Cross-reference गिन्ती 11:4-34
- Cross-reference गिन्ती 16:1-35
- Cross-reference नीरगमन 32:1-14
- Cross-reference गिन्ती 14:1-35
- Cross-reference लेवयवेवस्था 26:33
- Cross-reference गिन्ती 25:1-13
- Cross-reference गिन्ती 20:2-13
- Cross-reference न्यायीयो 2:1-3; 3:5,6
- Cross-reference 2 राजा 17:17
- Cross-reference गिन्ती 35:33
- Cross-reference न्यायीयो 2:14-18
- Cross-reference 1 ईतीहास 16:35,36
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.