Bhilali Bible
भजन सहीता 105
भगवान ने तेरा माणसे
(1 ईतीहास 16:8-22)
यहोवा भगवान काजे बेसकु वारु कवु,
ने तेरो नाव लीन दुवा करु;
देस-देसेन माणसे मां तेरा मटला कामेन वात देखाड़ु।
तेरे वाटे गावु, तेरा गुण गावु;
तेरा आखा चकराड़न्या कामेन वात देखाड़ु।
तेरा चुखला नावेन बड़ाय करु;
यहोवा भगवान काजे हेरन्या माणसे तुंद्रो मन खुस रवणु चाहजे।
तुहुंं यहोवा भगवानेन ने तेरी ताकत काजे हेरु,
जलम तेरी हजेरीक हेरु।
तेरा करला चकराड़न्या काम काजे हेर करु,
हेरा चकराड़न्या काम ने फेसला काजे बी हेर करु।
ए तेरा चाकर्या अब्राहमेन अवल्यात,
तुहुंं ते हेरा नेवाड़ला याकुब्यान अवल्यात छे।
जुत आपणु यहोवा भगवान छे,
आखी धरती पर चु नीयाव करन्यु छे।
चु आपसान वायदा काजे जलम हेर राखे,
तीना बुल काजे हयु हजारु पीड़ी लग हेर राखे।
हयुत वायदु ते चु अब्राहम साते करलु,
ने तीनीत बुलीन वात लीन चु इसाक अगळ सगुन खादलु।1
ने तीनीत बुलीन वात याकुब साते कायदान तसु पाक्की कर्यु,
हयु ईस्रायल साते असु कय्न तेरी अवल्यात वाटे जलम बुली करलु,
“मे तुसेत काजे कनान देस आपीस,
जी जागा तुंद्री जाहगीरी बण जासे।”2
तीनी टेमे ते, ईस्रायली माणसे गीणती मां कमतास हतला,
बाकुन बेसका कमुस हतला, तीना राज मां पारका बणीन रवतेला।
तीनु दाहड़ाम, तीनुक एक जातीन्चां सी दीसरी जातीन्चां,
ने एक राजवाड़ाम सी दीसरा राजवाड़ाम फीरता रया।
बाकुन तेबी काहना बी माणसे तीनुक वेला नी पाड़्या,
काहाकी भगवान ते तींद्रे वगु वळीन राजाक लग असु कवतेलु,
“मारा नेवाड़ला माणसेन हात घुण लागाड़ु,
ने हामरा भगवानेन अघली वात बताड़न्या माणसेन नुकसाण घुण करु।”3
अळतेन चु तीना देस मां काळ पाड़्यु;
ने खाणान आसरु तुड़ देदु, ने तींद्रो आखो खाणो हापकी लेदा।4
चु तींद्रे सी पेहेल एक माणसे काजे मकल्यु,
तेरो नाव युसुफ हतलु। तीनाक तेरा भाय्स, गुलाम बणावणे करीन वेच देदला।5
अळतेन माणसे जेलेम तेरे पाये कड़ी पेहरावीन वेला पाड़्या,
ने तेरा गळाम लुहड़ान साकळ बांद देदा।
युसुफ काजे ते तीने दाहड़े लग जेलेत मां रवणु पड़्यो, तीने दाहड़े लग,
युसुफेन कवली वातेन अनसारे यहोवा भगवान, तेरे बारामां जु खरलु छे करीन गवा नी देदु।6
तत्यार बेसका पर राज-करन्यु मीसर देसेन राजु,
आपसा सीपायड़ाक मकलीन तीनाक जेलेम सी छुड़ायु।7
चु राजु, युसुफ काजे आपसा राज-घराणान मुखी,
ने आपसा आखा धनेन तज्बु करन्यु बणाय देदु।8
चु युसुफ, राजान सीपायड़ान डाहला पर हक जमाड़े,
ने आपणे सी मटला काजे अक्कलेन वात सीकाड़े।
अळतेन ईस्रायली बी, मीसर देस मां आयु, जो हाम खास देस हतलो;
असु करीन याकुब बी हाम देसे मां पारकु बणीन रवणे बाजी गुयु।9
ने भगवान ईनु आपसा माणसे काजे बेसकु वदाड़ देदु,
ने ईस्रायली माणसे मीस्रे देसेन माणसे सी वदु ताकतवाळा बण गुया, तेरेमां मीस्रे वाळा तींद्रा वेरी बण गुया।
भगवान मीसर वाळान मन बदली देदु, तेरेसी चे तेरा माणसे भीणी रीस करने बाजी गुया,
ने तींद्रे साते कदरे-कदरे वेहवार करने बाजी गुया।10
अळतेन भगवान आपसा चाकर्या मुसाक,
ने आपसा नेवाड़ला हारुन काजे मीसर-वाळानचां मकल्यु।11
ने चे दुयु चां मीसर मां, हाम देस मात,
भगवानेन वगे सी चकराड़न्या कामेन सहलाण्या देखाड़्या।
चु आंदारो कर देदु ने आंदारो हंय गुयो,
ने चे हेरी वात काजे नी टाळ्या;12
चु तींद्रा मीस्रेन आखा पाणी काजे लुहीं बणाय देदु,
ने तींद्रा माछा काजे मार नाख्यु।13
डेडरा तींद्रा देस मां अतरा जबर वद गुया की,
चे राजान ने राजान पावर्यान सुवण्या कमराम लग भराय गुया।14
भगवान हुकुम आप्यु ने चावण्या ढास्या हुड़ु-हुड़ु आय गुया।
ने मीसर देसेन आखा माणसेन पीसळा पड़ गुया।
चु तींद्रा देसेम पाणीन बदले गार पाड़्यु,
ने तींद्रा देस मां हळो-हळो ईजळी पाड़्यु।
असु करीन चु तींद्रा अंगुरेन वेला ने अंजीरेन झाड़का बी हीट पाड़्यु।
चां लग की देसेन आखा झाड़का भांज नाख्यु।15
चु हुकुम आप्यु, ती गीणाये नी अतरा टिड्डा आय गुया;
ने बेसका कीड़ा आय गुया;
ने चे तींद्रा देसेन आखा झाड़कान ने झाड़कान पान्टा खाय गुया;
ने आखी मेर काजे खाय गुया।16
चु मीसर देसेन आखा पेहेल खुळ्या पुर्याक मार नाख्यु।17
तत्यार भगवान ईस्रायली माणसे काजे सोना-चांदी भेळु मीसर देसेम सी नीकाळ लायु,
ने काहना बी माणसे काजे लथड़ने नी देदु।
चे जाती रया करीन, मीसर देसेम वाळा खुस हया,
काहाकी मीसर-वाळा, तीनुक बीही गुयला।18
चु दीसु तींद्रे वाटे वादळा करीन टुपारु कर्यु,
ने आक्ठान खाम्बान साहरे वीजाळो करीन राती बी वाट देखाड़्यु।19
चे सीकार मांग्या ती लावरा आप्यु,
ने तीनुक सरग सी खाणो आपीन बी आफराड़ देदु।20
चु चापर्याक फुड़ देदु, ती चापर्या मां सी पाणीन उकाळु फुट्यु;
ने उजाड़ी बयड़ा मां नदी उहणे बाजी गुय।21
चु आपसा चाकर्या अब्राहम काजे,
ने आपसा चुखला वायदाक हेर कर्यु।
चु आपसा माणसे काजे खुसी भेळु,
आपसा नेवाड़ला माणसे काजे जीतेन गीत गावाड़तु जाय्न नीकाळ लायु।
चु तीनुक आड़जात्या माणसेन देस पर हक आप्यु,
चे आड़जात्यान कमायला धन पर हक जमाड़ लेय।22
ने चे भगवानेन नेम-कायदाक माने,
ने वारु पाळे।
हालेलुया कय्न यहोवा भगवानेन बड़ाय करता रवु।
Source notes (22)
- Cross-reference उबजाणनी किताप 12:7; 17:8; 26:3
- Cross-reference उबजाणनी किताप 28:13
- Cross-reference उबजाणनी किताप 20:3-7
- Cross-reference उबजाणनी किताप 41:53-57
- Cross-reference उबजाणनी किताप 37:28; 45:5
- Cross-reference उबजाणनी किताप 39:20—40:23
- Cross-reference उबजाणनी किताप 41:14
- Cross-reference उबजाणनी किताप 41:39-41
- Cross-reference उबजाणनी किताप 46:6; 47:11
- Cross-reference नीरगमन 1:7-14
- Cross-reference नीरगमन 3:1—4:17
- Cross-reference नीरगमन 10:21-23
- Cross-reference नीरगमन 7:17-21
- Cross-reference नीरगमन 8:1-6
- Cross-reference नीरगमन 9:22-25
- Cross-reference नीरगमन 10:12-15
- Cross-reference नीरगमन 12:29
- Cross-reference नीरगमन 12:33-36
- Cross-reference नीरगमन 13:21-22
- Cross-reference नीरगमन 16:2-15
- Cross-reference नीरगमन 17:1-7; गिन्ती 20:2-13
- Cross-reference यहोसु 11:16-23
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.