Bhilali Bible
भजन सहीता 104
कळ घड़न्यान बड़ाय करनु
ए मारा मन, यहोवा भगवानेन गुण गाव! ए मालीक ए भगवान, तु गुण भर्यु छे;
तु ते सेक-सींगारेन ने ईज्जतेन पुथल्या पेहर रयु।
तु ते वीजाळा काजे चादरान तसु पांगरी रयु।
ने सरग काजे तम्बुन तसु ताण रयु,
तु ते आपसु माळु सरग मां वादळा सी उपर बणाय रयु,
ने वादळा काजे आपसी घुड़ा-गाडी बणावे,
ने वाहळान पाखड़ा पर बसीन उडे;
तु आपसा सरगेवाळा चाकर्या काजे वाहळान तसु कामे लागाड़े,
तु आपसा पावर्या काजे आक्ठान लावळान तसु कामे लागाड़े।1
तु धरती काजे तेरा पाया पर जमाड़ देदु, हेरेन करीन की ची,
हाले पाखुर जलम टेकली रवे।
तु धरती काजे पुथल्यान तसु समुदरेन साहरे ढाक देदु;
ने समुदरेन पाणी, बयड़ा काजे ढाक देदलु।
बाकुन तु लड़्यु तत्यार पाणी ढास पड़्यु;
चो पाणी, तारो गाजणु सामळतात, उतवाळ्युत उय गुयो।
चु ते बयड़ा पर चहड़लो ते खरो बाकुन खयड़ा-खुबारा मायन उतरी बी गुयो,
ने तार साहरे नक्खी करले जागे उय्न जाती रयो।
तत्यार तु पाणीन काकड़ बांद देदलु,
हेरेसी की पाणी, काकड़ वेणकीन धरती काजे नी डुबाड़े।
ए भगवान, तुत खुदराम खकळु दीन झीरे उहवाड़े;
ने चे खुदरा सुसवु दीन बयड़ान ईचमां उय्न जाय;
तीनु खुदराम, बयड़ा, खयड़ाम रवण्या आखा जीव जनवार्या पाणी पीये;
जंगली गदड़ा लग पाणी पीये।
सरगेन चिरला बी तीनु खुदरा धड़े पुतरु बणावे;
ने चां वाळा झाड़कान डाळखा पर बसीन चीचवारीन गीते गावे।
तु तारे सरगेन माळे सी पाणी लाय्न बयड़ा काजे रेलवी देय,
ने धरती तारा छेलभात्या कामेन साहरे आफरीन नीळीकच हंय जाय।
तु जानवर्या वाटे चारु उंगाड़े,
ने माणसेन कामे आवण्या अन काजे उबजाड़े,
धरती मां सी आखी भातीन खाणेन चीजे उंगाड़े।
तु अंगुर उंगाड़े, तेरु लाहण्यु रस, चो माणसेन मन काजे खुस कर देय,
ने तेल उबजाड़े, ज्य माणसेन मुहंडो पीली-पीली कर देय।
ने अन बी उबजाड़े, जो माणसे काजे जीवणेन ताकत आपे।
ए यहोवा भगवान, लबानोन देवदारेन झाड़का तारा झाड़का कवाये;
तारे हाते उंगाड़ला झाड़कान रस पीन आफरी रवे।
तीनु झाड़का पर चिरला पुतरु करे,
सनोवरेन झाड़का पर मटला बगल्या रवे।
उचला बयड़ा जंगली बुकड़ा वाटे,
ने चापर्यान दरे, चापर्या मां रवण्या गुरखुदा जानवर्या वाटे आसरु छे।
चु नवला महनान उळखाण वाटे चांद उबजाड़्यु;
ने दाहड़ु बी तेरी बुडणेन टेम जाणे।
तु आंदारो कर देय ने रात पड़ जाय,
ने आखा जंगली जनवार्या फीरने बाजी जाय।
ने जुवान नाहार सीकार वाटे डकारे,
ने भगवान धड़े आपसो सीकार मांगे।
दाहड़ु उंगतात चे पछा आवती रवे,
ने आपसा गुफा मां भरायन पड़ रवे।
ने माणसे, संदारे उठीन आपसे-आपसे कामे जाती रवे,
ने चे सांता लग काठी मेहनत करने करीन चाल पड़े।
ए यहोवा भगवान, तारा घड़ायला ते गीणाये नी अतरा छे। ज्यो आखो तु,
तारी अक्कल सी बणायु;
धरती तारे मालधन सी भराय गुय।
समुदर बी मटो ने लांबो चवड़ो छे,
तेरेमां गीणाये नी अतरे जबर,
नाना-मटा पाणीम रवण्या जनवार्या छे, जे अथान-अथा फीर्या करे।
तेरेमां मटला ढंड्या बी आया जाया करे,
ने पाणी मां रवण्या जनवर्या काजे बी तु चां खेलने वाटे बणावलु।2
ए भगवान, हीनु आखान आसरु तुत छे,
काहाकी तुत हीनुक टेमे-टेमे खाणो आप्या करे।
तु ईनुक खाणो आपे, ने जे ली लेय;
तु पुसे-पुसे आपे, ने जे वारुत खायन आफरी जाय।
बाकुन तु आडु भाळी लेय, ती जे घाबराय जाय;
तु हींद्रु जीवणेन दम ली लेय,
ने जे मरीन पछा धुळाम भेसकाय जाय।
अळी तु जीवणेन दम मकली देय, ने घड़ाये;
असो करीन तु धरतीन सीकु नवलु बणाय देय।
यहोवा भगवानेन सेक-सींगार जलम काळ बणीन रवे,
यहोवा भगवान आपणा काम सी खुस हवे।
भगवान भाळे अतरुत ने धरती कापणे बाजी जाय;
चु टुचले अतरुत ने बयड़े सी कुळ्ळु नीकळने बाजी जाय।
मे ते जीवीस चां लग यहोवा भगवानेन गीत गाया करीस,
ने मरता लग, भगवानेन गुण गावीस।
मारो धीयान करनु भगवान काजे वारु लागे,
काहाकी मे ते यहोवा भगवानेन वजे सी खुस रय्स।
पापी माणसे धरती पर सी सर जाय,
ने तारु वीरुद करन्या बी एक नी रवणु चाहजे।
ए मारा मन, यहोवा भगवानेन गुण गाव।
हालेलुया कय्न यहोवा भगवानेन बड़ाय करतु रव।
Source notes (2)
- Cross-reference ईब्रानीयो 1:7
- Cross-reference अय्युब 41:1; भजन सहीता 74:14; यसाया 27:1
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.