Bhilali Bible
भजन सहीता 103
भगवानेन परम
दावुदेन भजन
ए मारा मन यहोवा भगवानेन गुण गाव;
ए मारा जीवेम वाळा आखा अंग तुहुं बी यहोवा भगवानेन गुण गावु।
ए मारा मन, यहोवा भगवानेन गुण गाव।
ने तेरो काहनो बी भलो काम घुण ईसरे;
मे आपसात काजे कवो, यहोवा भगवान ते तारा आखा पाप माफ करे,
ने तारी आखी मांदवाड़ छेटी करीन तुसेक वारु करे;
चु ते तारी जीवाय काजे मुतेन खाडाम सी बाहार नीकाळे,
ने तुसेक दया ने परमेन पागड़ी पेहरावे;
चु ते तारी भलाय करी करीन तुसेक खुस करे,
तेरेसी तारी जुवानी घुवड़ेन तसी नवली हंय जाय।
यहोवा भगवान ते वेला पड़ायला आखा माणसे वाटे,
धरमेन ने नीयावेन काम कर्या करे।
चु ते मुसा काजे, आपसान युजनान वाट देखाड़्यु,
ने आपणा ईस्रायली माणसे काजे आपसान बेसका काम देखाड़्यु।
यहोवा भगवान, दयाळु ने बेसकु दयाळु छे;
चु धीरु रय्न रीसवायणे वाळु ने दया करन्यु छे।1
चु जलम लड़तु नी रवे,
ने जलम रीसवायतु नी रवे।
चु आपणा पापेन अनसारे आपणे साते वेहवार नी कर्यु,
जतरु डंड हामु काजे आपणु हतलो ततरो नी आप्यु।
जसो सरग धरती सी बेसको उपर छे, तसोत तेरी दया ने परम बी,
तेरो बीहाणो मानन्या पर बेसको मटो छे।
उगवणो सी बुडवणो जतरो छेटे छे,
ततरे छेटे चु आपणा पाप छेटा कर देदु।
जसा आय्स ने बास आपसा पुर्या पर दया करे,
तसुत यहोवा भगवान, तेरो बीहाणो मानन्या पर दया करे।
काहाकी चु आपणु काजे जाणे की आपणु कसा घड़ायला छे;
तीनाक हेर रवे की, आपणु ते धुळुत छे।
माणसेन उमर चारान तसी छे;
जे जंगली फुलेन तसा बड़े ने फळे।
जे वाहळो लागतेत ठेहरी नी सके,
ने च अळतेन देखाव नी पड़े।
बाकुन यहोवा भगवानेन दया ने परम ते, तेरो बीहाणो मानन्या पर जलम रवे;
ने तेरु धरम तींद्रा पुर्यान-पुर्या पर जलम रवे।
यहोवा भगवानेन बुलीन अनसारे जीवण्या पर, तेरी सीकापण हेर करीन चालन्या पर,
तेरी दया ने नीयम जलम रवे।
यहोवा भगवान ते आपसान राजगादी सरग मां जमाड़ीन मेल्लु छे,
ने चु, चां रय्न आखा पर राज करे।
ए यहोवा भगवानेन सरगेवाळा चाकर्या,
तुहुंं जे डखी छे, तुहुंं ते तेरा बुल काजे सामळीन मानु,
तुहुंं तेरा गुण गाय्न, तीनाक वारु कवु।
ए यहोवा भगवानेन सीपायड़ान आखा टुळा, ए तेरा आखा पावर्या,
तुहुंं जे तेरी मरजी पुरी करे, तेरा गुण गाय्न, तीनाक वारु कवे।
ए यहोवा भगवानेन आखा घड़ायला तेरा राजेन,
आखा जागा मां रवण्या तेरा गुण गावु, ने तीनाक वारु कवु।
ए मारा मन, तु बी यहोवा भगवानेन गुण गावु!
Source notes (1)
- Cross-reference याकुब 5:11
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.