Bhilali Bible
भजन सहीता 102
गराम पड़लु माणुस आपसा छुटकारा वाटे दुवा करे
एक वेला पाड़ायला माणसेन दुवा जत्यार चु घाबराय्न तेरी वात यहोवा भगवान काजे कवे
ए यहोवा भगवान, मारी दुवा सामळ;
ने मारी लीलघायणु सामळीन मारी मदत कर।
मारी हीनी गरान टेमे आडु मां भाळे; तारा कांटा मारे भीणी लागाड़,
जत्यार बी मे तुसेक आयड़ीस,
ती छाटुस जपाप आपजी।
काहाकी मारा जीवाय्न दाहड़ा कुळ्ळान
तसा जाणे बाजी रया।
मारो डील आक्ठान तसो धप रयो।
मारो मन चारान तसो सुकी गुयलो छे;
ने मे खाणो खाणे तक ईसरी गुयलु छे।
मे दुख मां बेसकु कासर्यु,
हेरसी मे हारीन डीग-डीग हंय ज्यु।
मे बयड़ा मां एखला रवण्या घुबड़्यान तसु हंय र्यु;
ने उजेड़ला घरेम रवण्या गरावाळा घुबड़्यान तसु हंय रयु।
मे पड़्यु-पड़्यु फीकुर मां पड़ रवो मारी नींद लग नी आवे।
मे तीना चिरलान तसु हंय र्यु, ज्यो घरेन मुंडेवरी पर एखलो बस रवे।
मारा वेरी लायनबंद मारी नाव-बद्दी करे,
जे मारा वीरुदेन धुन मां गांडा हंय र्या, चे मारो नाव लीन सगुन खाय।
काहाकी मे रुटान तसु रखड़ु ने,
आंसळा भेसकीन पाणी पीदु।
तु ते मारे पर रीसवाय गुयलु, ज्यो ते तारी रीसेन सी हयो;
तु मेसेक ईछीन आसटी देदु।
मारा दाहड़ा ढळतेला साहळान तसा वीत र्या;
ने मे ते चारान तसु चीमाय र्यु।
बाकुन ए यहोवा भगवान, तु ते जलम राज करे;
ने तारो नाव पीड़ीडीत लेता रवसु।
तु उठीन सीयोन सहर पर दया कर,
काहाकी तेरे पर दया करनेन टेम आय गुयली छे,
टाकली सय टेम आय गुयली छे।
हामु जे तारा चाकर्या छे,
सीयोन सहरेन दगड़ान हेर कर्या,
जे उदेरला छे;
हामुक तीना सहरेन धुळा पर दया आवे।
हेरेसी राज्य-राज्येन माणसे यहोवा भगवानेन नावेन बीहाणो मानसे,
ने धरतीन आखा राजा तारा सेक सी बीहसे।
काहाकी यहोवा भगवान सीयोन सहर काजे अळी वसाड़से,
ने चु आपणी सेक-सींगार साते देखाव पड़से;
चु लाचारेन दुवा भीणी मुंहडो करे,
ने हींद्री दुवा काजे रीकामी नी समजे।
जी वात आवणे वाळी पीड़ी वाटे लिखाय जासे,
ने हंय लग माणसे नी घड़ाय जासे चीत यहोवा भगवानेन बड़ाय करसे।
काहाकी यहोवा आपणे उचला ने चुखला जागा सी,
ने हेरा डुळा सी सरग भीणी धरती पर देखसे।
चु केदड़ान आयड़नु सामळ्यु ने तीनु माणसे काजे छुड़ देदु,
जीनुक मारनेन सजा सामळावला;
हेरसी माणसे सीयोन सहर मां यहोवा भगवानेन नाव लेय;
ने यरुसलेम मां तेरी बड़ाय करता जाय्न तेरा गुण गावे।
जो तीने टेमे हवसे जत्यार देस-देसेन ने राज-राजेन माणसे,
यहोवा भगवानेन सेवा भक्ती करने चां भेळा हवसे।
यहोवा मारी जीवाय मां दुख लाय्न, मारी ताकत कम कर देदु;
ने मारी उमर कम कर देदु।
मे कह्यु, ए मारा भगवान,
तु ते पीड़ी-डीट जलम जीवतेलु रवसी;
हेरसी मेसेक आदी उमर मां घुण मारे।
तुत सुरु मां, धरती काजे बणायु,
ने आखी सरग मंडळी बी तारेत हाते बन्ली छे।
चे ते सर जासे, बाकुन तु तसुत बणीन रवसी;
आखी कळजुग पुथल्यान तसी जुनी हंय जासे;
जसा माणसे जुन्ला पुथल्या नाख दीन नवला पुथल्या पेहरे,
तसु तु जुन्ली कळ वाटे सारीन, नवली कळ बणावसी।
बाकुन तु ते, तुसन-तसु छे, कदी नी बदले,
ने तु जलम जीवतेलु रवसी।1
तारा चाकर्यान अवल्यात, ने तींद्री अवल्यात तारे अगळ टेकली रवसे।
हंय चे तारी हजरी मां बेफीकर्या हय्न जीवतेला रवसे।
Source notes (1)
- Cross-reference ईब्रानीयो 1:10-12
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.