Bhilali Bible
भजन सहीता 101
एक राजान वादु
दावुदेन मीसमर भजन
ए यहोवा भगवान, मे तारात गुणेन गीत गाय्स,
मे तारी दया ने परमेन नीयावेन गीत गाय्स।
मे अक्कल सी खरली वाटे चालीस।
तु मारे धड़े कत्यार आवसी?
मे आपणे घर मां मनेन खराय साते चालीस;
मे काहनी बी फालतु वाते पर मन नी लागाड़ो
मे ते कुहर्या माणसेन कामे भीणी घीण करो।
ने मे तींद्रा बीगेड़ला काम मां तींद्री सात नी दम;
मे पापी वीच्यार सी छेटु रवीस,
ने कुहराय काजे नी जाणो।
जु डुकाय डुकायन धड़े वाळान नाव-बद्दी करे,
तीना काजे मे सार नाखीस।
तींद्रा डुळा मां ने मन मां मटाय रवसे,
तींद्री मे सेण नी करो।
मे खरला माणसे पर नींगा करतु रवीस;
हेरेन करीन की, चे मारा सात देण्या बणीन,
मारे पुठ्ये रवसे।
खरले वाटे चालन्या मारा चाकर्या रवसे,
मे धुकु देण्या काजे मारा घराणा मां सेवा नी करने दम;
लुच्चाय मेकण्या काजे ते मारे अगळ टेकाये नी।
मे दाहड़ीन संदारे जम,
माणसे काजे खत्तम करतु रय्स,
तेरेसी आखा कुहर्या माणसे,
यहोवा भगवानेन सहर मां सी खत्तम कर दीस।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.