Bhilali Bible
भजन सहीता 107
पांचवु भाग
(भजन सहीता 107—150)
गराम सी वाचणेन छुटकारु
यहोवा भगवान काजे बेसकु वारु कवु, “ए यहोवा भगवान, मे तुसेक बेसकु वारु कह्वो, काहाकी तु भलु छे;
ने तारी दया ने परम जलम लक रवे।”1
यहोवा भगवानेन हाते छुड़ावला ते,
हसात कवणु चाहजे,
तीनुक ते भगवान, वेरीन हातेम सी छुड़ाय लेदु;
ने उगुण ने बुडुण सी, ने धुराव ने दखणाव सी भेळा करलु छे;
चु देस-देस मां सी तीनुक भेळा करलु छे।
थुड़ाक माणसे ते रेतळा मां ने उजाड़्या बयड़ा मां भटकायता फीर्या;
ने तीनुक वसणे करीन काहना बी सहरेन वाट नी जड़ी।
चे भुकला ने तीसला घांगवाय गुया।
ने तींद्रु जीव बेसकु घाबराय गुयु।
तत्यार चे गरामां यहोवा भगवान सी वीनती कर्या,
ने चु तीनुक तींद्री गरामां सी छुड़ाय लेदु।
ने चु तीनुक सुदले वाट्ये चालाड़्यु,
हेरेसी की चु तीनुक गांव वसाड़े असी जागा मां ली जाय।
चे माणसे यहोवा भगवान दया ने परम वाटे, ने माणसे वाटे करला,
तेरा चकराड़न्या बेसका काम वाटे, तीनाक बेसकु वारु कह्यु!
काहाकी चु पीसलान पीस भांगे,
ने भुकला काजे वारु-वारु खाणे आपीन आफराड़ देय।
थुड़ाक माणसे ते आंधारलाम ने मुतेन साहळा मां बठी रवला,
ने चे गुलामीन साकळ्या मां बांदायन एला करतेला;
काहाकी चे भगवानेन बुलेन वीरुद करला,
ने आखाम उचे रवण्या भगवानेन वात काजे हेटी समज्या।
हेरेसी भगवान तीनुक गरामा पाड़ीन तींद्रो मन नीचळो कर देदु;
चे झटवाय्न हीट पड़्या, ने तीनुक मदत करन्यु कुय नी जड़्यु।
तत्यार चे गराम यहोवा भगवान भीणी आयड़ीन दुवा कर्या,
ने चु तीनुक तींद्री गराम सी छुड़ाय लेदु।
चु ते तीनुक आंदारलाम ने मुतेम सी नीकाळ्यु,
ने तींद्रा साकळ्या तुड़ देदु।
माणसे यहोवा भगवानेन दया ने परम वाटे, ने माणसे वाटे करला,
तेरा चकराड़न्या काम करला, तीनाक बेसकु वारु कवु!
काहाकी चु पीतळेन बारना काजे तुड़ नाखलु,
ने लुहड़ान कड़्या काजे काट नाखलु।
थुड़ाक माणसे ते भगवानेन नेम तुड़ीन डेड़-अकल्या बण गुया,
ने आपसात पाप करीन वेला कर्या।
चे आखी भातीन खाणा भीणी छीट कर्या,
ने चे मर्यात-मर्या हय्न मुतेन बारने जाय पड़्या।
तत्यार चे परेसानी मां यहोवा भगवान काजे आयड़तेला,
ने चु तीनुक तींद्री गराम सी छुड़ाय लेदु।
भगवान आपसान हुकुम मकलीन वारु कर्यु,
असा करीन चे मरने मां सी बच गुया।
ए छुड़ावला माणसे, यहोवा भगवानेन दया करला परम वाटे
ने माणसे वाटे करला, तेरा चकराड़न्या बेसका काम वाटे, तीनाक बेसकु वारु कह्यु!
ने भगवान वाटे असली बादा चड़ावु,
ने बड़ायन गीत गावता जाय्न तेरा चकराड़न्या कामेन वात माणसे काजे कह्वु।
थुड़ाक माणसे ते, मटला समुदर मां, मटला ढंड्या मां बसीन जातला,
ने पली पार जाय्न काम-धंधु करतेला;
चे समुदर मां यहोवा भगवानेन मटला काम काजे देख्या,
ने हीनु चकराड़न्या काजे जु चु उंडला समुदर मां करे, ने देखे,
काहाकी चु हुकुम आपीन बेसकी आंधी मकल्यु,
ने ची आंधी समुदर मां झलक लावी।
ने तींद्रो ढंड्यो बेसको उचो जात र्यो,
ने अळी पछो नेचो आय गुयो;
ईनी गरान साहरे तींद्रु जीवुत जात रवलु।
ने चे घाबराय जाय,
ने झांमा खायन छाकलान तसा हीट पड़्या।
तत्यार चे गरा मां यहोवा भगवान भीणी आयड़ीन दुवा कर्या,
ने चु तीनुक तींद्री आफत मां सी छुड़ाय लेदु।
चु आंधी काजे सेळी पाड़ीन हुगु राख देदु,
ने झलक बी हुगी रय गुई।
चे बेसका खुस हंय गुया।
ने भगवान तीनुक तीनी ठेसण पर पुगाड़ देदु, जां जाणेन चे हेर करला।
ए माणसे यहोवा भगवानेन दया ने परमेन वाटे, ने माणसे वाटे करला,
तेरा चकराड़न्या काम वाटे, तीनाक बेसकु वारु कह्वु!
ने भगवानेन माणसेन मंडळी मां, तेरा जीतेन गीत गावु,
ने डाहा-डाहान बठक मां भगवानेन बड़ाय करु।
चु नदी काजे जंगल बणाय नाखे,
ने पाणीन झीर काजे सुकली जागा कर देय।
चु फसल वाळी जागा काजे बेकार कर देदु,
काहाकी चां रवणे वाळान पापेन वजे सी हवे।
चु खरला भगत वाटे रेतळा वाळी जागाम पाणीन तळाव बणाय देदु,
ने सुकली जागाम पाणीन झीरे उहाड़ देय।
ईनी रीते तीयार करली जागा मां भगवान भुकलाक वसाड़ देय,
हेरेसी की, चे चां गांव वसाड़े,
ने खेत करे, ने अंगुरेन वाड़ी लागाड़े,
ने भाती-भातीन मेर पाकाड़े।
चु तीनुक संयबरकत आपीन बेसका वदाड़ देय;
ने तींद्रा ढुरे काजे कम नी हवणी देय।
जत्यार भगवानेन माणसे राज-करन्या राजान साहरे वेला ने दुख झेले,
ने मरीन कम हवता जाय ने डाबायता जाय,
तत्यार भगवान राज-करन्या राजान नाव-बद्दी कराड़ देय,
ने तीनुक बयड़ाम वाट नी हंय चां भटकाड़ देय।
बाकुन कसरायला काजे, दुख मां सी छुड़ावीन तीनुक जो चाहजे चो आपे,
ने तींद्री अवल्यात काजे गाडरान टुळान तसु वदाड़े।
जो आखो देखीन सुदला माणसे बेसका खुस हवसे;
बाकुन पाप करन्या माणसेन बुलती बंद हंय जासे।
जु कुय अकलवाळु हसे, चु ईनी कवली वाते पर मन लागाड़से;
ने यहोवा भगवानेन दया ने काम पर वारु वीच्यार करसे।
Source notes (1)
- Cross-reference 1 ईतीहास 16:34; 2 ईतीहास 5:13; 7:3; एज्रा 3:11; भजन सहीता 100:5; 106:1; 118:1; 136:1; यीरम्या 33:11
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.