भजन सहीता 108

भगवानेन भलाय ने बड़ाय

(भजन सहीता 57:7-11; 60:5-12)

दावुदेन भजन

1ए भगवान, मारो मन तारेत मां घुळायलो छे;

मे गाय्‌स; मे मारी आत्‌मा सी बी,

तारा गुणे गाय्‌स।

2मे वीजाळो हवणे सी पेहेल जागीन गीत गाय्‌स।

ए रमथा ने झुणगा, तुहुं बी जाग जावु।

3ए यहोवा भगवान, मे जाती-जातीन माणसे मां तुसेक वारु कय्‌स;

देस-देसेन माणसेन ईचमां तारा गुणे गाय्‌स।

4तारी दया ने परम ते सरग सी बी उची छे,

ने तारी छाचाय सरग मंडळी काजे छीमे;

5ए भगवान, तु सरग मां सेक-सींगार भर्‌यु छे।

तारु सेक-सींगार ने धाक आखी धरती पर बी छावाय जाणु चाहजे।

6हेरेसी की तारा लाटेकला माणसे बच जाय। ए यहोवा भगवान मारी सामळी ले,

ने तारे जेवड़्‌ये हाते हामुक बचाड़ ले।

7भगवान आपसा चुखला मंदीर मां रय्‌न कह्‌यु,

“मे खुस हय्‌न सेकेम सहर वाट लीस,

ने सुक्‌कोतेन खुबारु मारा असामी वाटे नाप दीस।

8गीलाद देस ते मारोत छे, मनस्‌से कुळी बी, मारीत छे;

ने एप्‌रेम कुळीन माणसे मारा मुणकान हेलमेट-टुपु छे;

यहुदा कुळीन माणसे मारा राजेन डेंगु छे।

9मोआब देस मारा पाय धुवणेन ठाहरु छे,

एदोम देस पर मे मारो खासड़ो उराटीन नाखीस;

ए पलीस्‌ती देसेन माणसे,

तुंद्‌रे पर मारी जीतणे करीन मे कुर्‌राटीस।”

10अवारकुट वाळा सहर मां आपणुक कुण पुगाड़से?

एदोम सहर लग आपणुक कुण ली जासे?

11जु भगवान आपणुक छुड़ देदलु, जु भगवान आपणा सीपायड़ान सात छुड़ देद्‌लु,

हयुत भगवान आपणुक ली जासे।

12ए भगवान, वेरी साते लड़ायणे मां हामरी मदत कर;

काहाकी माणसेन मदत ते फालतु छे।

13भगवानुत आपणा वेरीक रंदळी देसे;

तेरेमां आपणु भगवानेन मदतेन साहरे हिम्‌मत देखाड़सुन।