Bhilali Bible
भजन सहीता 109
काहनीक परेसानी मां पड़ला माणसेन दुवा
भगवान भीणी दुवा करे भजन-गावण्यान डाहला वाटे: दावुदेन मीसमर भजन।
ए यहोवा भगवान, मे ते तारात गुणे गाया करो; मारी दुवा सामळी ले, हुगु मां रवे!
काहाकी ढंगड़ा करन्या वेरी ते मेसेक झुट मेकला छे; चे कुहर्या ते मारे वीरुद दीसराक बी झुट मेकला छे।
तींद्रा मुंहडाम सी ते झुट, ढंगड़ा ने कुहराय्त नीकळे।
चे मार बाराम रीस करीन वात कर्या करे;
ने मार साते फालतु झगड़ु करे।
मे तीनुक परम कर्यु ने चे मार पर झुटु गुनु लागाड़्या,
बाकुन मे तींद्रे वाटे तार भीणी दुवा करतु आय रयु।
मे तींद्री भलाय करो, ती चे मार पर कुहराय करे, ने मे तीनुक परम करो,
ती चे परमेन बदले मारे भीणी रीस करे।
ए यहोवा भगवान, तु तीनु वेरीन मुख्या काजे काहनास जमेन साहरे डंड आप;
ने तेरे वीरुद गुनु लागाड़ने करीन एक वकील उबु कर।
जत्यार तेरो नीयाव हवसे, ती चु गुनाळु नीकळनु चाहजे,
ने तेरी दुवा पापेन गीणती मां आवणु चाहजे।
चु थुड़ाक दाहड़ा जीवणु चाहजे,
ने तेरो राज-पाट दीसरु ली लेणु चाहजे।1
तेरा पुर्या पुरायला हंय जाणु चाहजे,
ने तेरी बायर रांडाय जाणु चाहजे।
तेरा पुर्या-पारीन उजड़लो घर बी छुट जाणु चाहजे।
ने चे मांगण्या बणीन, भीक मांगता फीरनु चाहजे।
वाण्यु तेरो आखो ठगीन ली जात रवणु चाहजे,
ने अनजाण्या माणसे तेरो आखो कमायलो लुट लेणु चाहजे।
तेरे पर कुय बी दया नी करनु चाहजे,
ने तेरा पुरायला पुर्या-पारी पर बी कुय दया नी करनु चाहजे।
तेरी अवल्यात सर जाणु चाहजे;
दुसरी पीड़ी मां तेरो नावुत सर जाणु चाहजे।
ए यहोवा भगवान, तेरा डाहा-डाहान पाप तुसेक हेर रवणु चाहजे,
ने तेरी आय्सीन पाप लग तुसेक नी ईसरायणु चाहजे।
ए मालीक, तुसेक जलम तीनु पापेन हेर रवणु चाहजे।
चु नावे-नाव ईसराय जाणु चाहजे।
काहाकी चु ते दया करने रह्णी दीन गरीब काजे,
ने कसरायला काजे वेला पाड़्यु,
ने दुखी माणसे काजे मारने करीन तेर पछळ पड़लु रह्यु।
दीसराक सराप देणु तीनाक गमे, हेरसी ची गरा तेरेत पर आय पड़नु चाहजे।
दीसराक बरकत आपणे तीनाक नी गमे, हेरसी बरकत बी तेरे सी छेटी रवणु चाहजे।
सराप देणु ते तेरा मुंहडा पर रवे;
हेरसी ची गरा तेरा पेट मां पाणीन तसी जात रहणु चाहजे,
ने तेलेन तसी हाटकान गीर मां बी जात रहणु चाहजे।
ची गरा पट्टान तसी तेरा कमर मां जलम बांदायली रवणु चाहजे,
ने ची तेरे पर घड़सान तसी वेटळाय जाणु चाहजे।
मालीकेन, वीरुदी माणसे पर असीत गरा नाखणु चाहजे, जे मारे वीरुद मां बुले,
तीनु आखा पर असीत गरा आय पड़नु चाहजे।
बाकुन ए मालीक, तु तारा नावेन अनसारे मारे पर दया कर;
तारी दया ने परम ते बेसको मटो छे। हेरसी मेसेक छुड़ाय ले;
काहाकी मे गरीब ने कासरायलु छे,
ने मे जीव मां बेसकु दुखी छे।
मारी जीवाय ढळतेला साहळान तसी वीतणे बाजी रय; असो लागे की,
मेसेक टिड्डान तसा झाटकी देदा हय।
उपास रय-रय्न मारा मांडा गळ गुया;
ने मारी चरबी कम हवणेन वजे सी डील सुकतो जाय रह्यो।
मारा वेरी मारी नावबद्दी करे;
जत्यार चे मेसेक देखे ती मुणको डुलावे।2
ए मारा मालीक भगवान, मारी मदत कर,
तारा बुली करला परमेन अनसारे मेसेक बचाड़ ले!
हेरेन करीन की चे ज जाण लेय की,
यहोवा भगवान तुत मारे वगे वळीन तारा हातेन काम करलु छे, ने तारो बेसको काम छे।
भले चे सराप दीया करे, बाकुन तु संयबरकत आप।
चे ते उठतात सरम मां पड़ जाणु चाहजे;
बाकुन तारु चाकर्यु खुसी वाळनु चाहजे।
मारे वीरुद करन्यान अबरु जात रवणु चाहजे,
चे लाजवाय्न काळा कुस पड़ जाणु चाहजे!
मे यहोवा भगवान काजे बेसकु वारु कवीस,
ने बेसका माणसेन ईचमां मारा मुंहडा सी तेरी बड़ाय करीस।
काहाकी चु कसरायला माणसेन जेवड़्ये आग्ये उबु रह्यु;
करीन की चु, तीनाक मुतेन डंड आपण्या माणसे सी बचाड़े।
Source notes (2)
- Cross-reference नेवताळान काम 1:20
- Cross-reference मत्ती 27:39; मरकुस 15:29
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.