Bhilali Bible
भजन सहीता 110
भगवान ने हेरु नेवाड़लु राजु
दावुदेन भजन
यहोवा भगवान मारा मालीक राजा काजे कह्यु,
“जत्यार लग मे तारा वेरीक, तारा पाय मेलनेन पयड़ी नी बणाय दम;
तत्यार लग, तु मारे जेवड़्ये आंग्ये बठ।”1
ए मालीक राजा, यहोवा भगवान तारा जुराक्ला राज-पाटेक, सीयोन सहर सी असु कहीन वदाड़से,
“तु तारा वेरीन ईचमां बी राज कर।”
तीने दाहड़े तु आपसा सीपायड़ाक भरती करसी,
तीने दाहड़े तारा असामी, तारी सात देसे।
तारा जुवान्या सीपायड़ा चुखले बयड़े सी संदारे पड़ला उसटान तसा भबळ्से।
ए मालीक-राजा, यहोवा भगवान तारे अगळ असु कहीन सगुन खादु,
“तु मेल्कीसेदेक्यान तसु, जलम लक मारु पुजारु छे।”
भगवान आपसु वीच्यार कदी नी बदले।2
ए मालीक राजा, भगवान-मालीक तारे जेवड़्ये आंग्ये उबु हंय रयु;
हेरसी चु आपसी रीसेन दाहड़े आखा वेरी राजाक भसम कर देसे।
चु जाती-जातीन माणसेन नीयाव करसे,
ने लड़ाय्न बयड़ा मां धड़ेन ढीग लागाड़ देसे,
चु आखी धरती पर वाळा पुडार्याक भसम कर देसे।
ए मालीक-राजा, तु वाट्ये वाळा झीरेम सी पाणी पीसी।
ने जीत हात करीन मुणको उचो करसे।
Source notes (2)
- Cross-reference मत्ती 22:44; मरकुस 12:36; लुका 20:42,43; नेवताळान काम 2:34,35; 1 कुरींथी 15:25; ईफीसीयो 1:20-22; कुलुस्यो 3:1; ईब्रानीयो 1:13; 8:1; 10:12,13
- Cross-reference ईब्रानीयो 5:6; 6:20; 7:17,21
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.