Bhilali Bible
भजन सहीता 111
यहोवा भगवानेन बड़ाय
हालेलुया कय्न यहोवा भगवानेन बड़ाय करु।
मे बी खरला माणसेन मंडळी ने बठक मां,
आखे मने यहोवा भगवान काजे बेसकु वारु कय्स।
यहोवा भगवानेन काम बेसका मटा छे, तेरा काम पर खुस रवण्या माणसे,
तेरा कामेत पर मन लागाड़्या करे।
तेरा कामे ते ठट-बुट भर्या ने सेक-सींगार भर्या छे।
तेरो धरम ते जलम टेकलो रवण्यो छे।
चु आपसा चकराड़न्या बेसका कामेक हेर कराड़णे करीन गाता बणाय मांगलु छे।
यहोवा भगवान बेसकु दयाळु छे।
जे तेरी बीहाणो माने, तीनुक चु खाणो खाणे आपे;
चु आपसी बुली जलम हेर राखे।
चु बेसका जातीन जाहगीरी आपसा असामीक आपीन,
आपसा कामेन जुर आपसा असामी अगळ उजेंतु करलु छे।
तेरा आखा कामे खरला ने नीयाव भर्या छे,
तेरी आखी सीकापण भुरसु करे असी छे।
तेरी सीकापण जलम टेकली रवे,
ची सीकापण ते छाचाय्न ने खराय्न अनसारे छे।
चु ते हेरा माणसे काजे छुड़ावलु छे,
चु आपसी बुली जलम वाटे नक्खी करलु छे;
तेरो नाव चुखलो ने धाकभर्यो छे।
यहोवा भगवानेन बीहाणो मान्नुत अकल सुरु हवणु छे;
जे तेरा नेम-कायदा पाळे, तीनु आखान समज बेसकी वारु रवे।
तेरी बड़ाय जलम हवती रवसे।1
Source notes (1)
- Cross-reference अय्युब 28:28; नीतीवचन 1:7; 9:10
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.