Bhilali Bible
भजन सहीता 112
भगवानेन भगतेन खुसी
यहोवा भगवानेन बड़ाय करु।
जे माणसे यहोवा भगवानेन बीहाणो माने,
ने तेरा हुकुम पाळनेम खुस रवे, चे बेसका बरकतवाळा छे।
असला माणसेन अवल्यात धरती पर ताकतवाळी रवसे;
खरला माणसेन अवल्यात बरकत हात करसे।
तींद्रा घरमां ते माल-धन रवसे।
ने तींद्रो धरम जलम टेकलो रवसे।
आंदाराला मां बी खरला माणसे वाटे वीजाळो भबळे;
तीनी टेमे बी चे दयाळा, बेसका-दयाळा ने धरमी रवे।
चे माणसे बेसका दया करीन उधार आपे, ने आपसा काम धंदा मां ईमानदार रवे,
ने तींद्रो भलो हवे।
चे दुखो मां बी, कदी लथड़ीन नी पड़े;
तीनु धरमी माणसेक, माणसे जलम हेर करता रवसे।
चे दुखेन खबर सामळीन, नी बीहे,
तीनुक ते यहोवा भगवान पर पुरु भुरसु छे, हेरसी तींद्रो मन काठो रवसे,
चे हिम्मतवाळा रवसे, ने चहड़ीन आवला वेरीन ढासणु देखता लग,
बेफीकर्या रवसे।
चे च्यारे-मेर आवता फीरे, चे गरीब-गुरबाक धरम करता फीरे, माणसे तींद्रा धरमेन-कामे जलम हेर करसे। ने तींद्री ईज्जत हवती रवसे। हेरसी तींद्रा मुणका उचलात रवसे।1
कुहर्या वेरी तींद्री ईज्जत हवतेली देखीन कुहरायसे;
चे रीसवाय्न दात ककड़ावसे, ने तींद्रा दातखीळ्या बठ जासे;
कुहर्यान हर कदी पुरी नी हवे।
Source notes (1)
- Cross-reference 2 कुरींथी 9:9
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.