Bhilali Bible
भजन सहीता 10
नीयाव वाटे दुवा
ए यहोवा भगवान, तु हामुक छुड़ीन, अतरु छेटे काहा उभु हंय र्यु? हामरे पर गरा आवे, ती काहा डुकाय रहे?
कुहर्या माणसे मटाय करीन वेला पाड़ायला काजे ढासाड़े;
ने चे बापड़ा तींद्री फालतु युजना मां गुचवाय जाय।
तत्यार ते कुहर्या माणसे मटाय करे,
ने चे, हायाळ्ळा माणसेक बी असात करने करीन सात देय, बाकुन यहोवा भगवानेन नाव-बद्दी करे।
कुहर्यु माणुस अतरु मटाय करे की, चु भगवान काजे नी माने;
चे असा बी कवे की, “भगवान हंय नी।”
कुहर्या माणुस काजे ते भगवान डंड आपसे, बाकुन चे जी डंडेन वात सामळीन फीकुर नी करे।
हेरेसी चे आपसा भुंड्ला वीच्यारेन अनसारेत जीवे;
ने चे तींद्रा आखा वीरुद करन्या भीणी जुर करीन जाय।
कुहर्यु आपसा मनेम वीच्यार करे, “मारो काय नी हवे;
मे जलम दुख मां सी बचीन रय्स।”
जत्यार बी कुहर्यु बुले तत्यार तेरा मुंहडाम सी, गरान, लुच्चाय ने कुहराय्न बुल नीकळे;
ने तेरा मुंहडाम सी नुकसाण करनेन, वात नीकळे।1
चु नी-गुनाळा माणसे काजे मारने करीन,
गांवे-गांवेन जागा मां डुकाय रवे।
ने चु बापड़ा माणसेक मारने करीन तकाय रवे।
जसु नाहार झाड़का मां डुकाय्न बठ रवे; तसुत वेरी बी बापड़ा माणसेक मारने वाटे तपासीन बठ रवे,
ने चु कुहर्यु, पारद्यान तसु बापड़ा माणसे पर जाळ नाखीन,
तीनाक जाळेम टुपीन धर लेय।
बापड़ु माणुस जाळेम फांदाय जाय, ने रंदळाय जाय,
ने कुहर्यु तीनाक आपसा ताकतवाळान हातेम धर लेय।
चु आपसान मनेम वीच्यार करे, “की भगवान ते मेसेक ईसरी गुयलु छे;
चु आपसो मुंहडो ढाक लेदलु छे, ने चु मेसेक कदी नी देखे।”
उठ ए यहोवा भगवान एला पाड़ायलाक मां ईसरे,
उठीन हामरी सात दे, छुड़ावणे करीन तारु हात उचु कर।
कुहर्यु माणुस ते भगवानेक नानु समजीन कुहर्या काम करतु रवे,
ने वीच्यार करतु रवे की, “भगवान ते मारी जीवाय्न हीसाब किताप मार धड़े नी मांगे?”
जो हंय रयो चो आखो तु देख रयु,
एला पाड़्न्या पर, ने एला पाड़ायला पर तु नींगा नाखे; नीयाव करन्यु ते तुत छे। ने जो करनु छे, चो तुत करसी,
बीन आसर्या माणसे तारे सुपरुत हंय रया।
तु ते पुरायलान जलम मदत करन्यु छे।
कुहर्या ने भुंडला माणसेन हातेन ताकत काजे तुड़ दे,
तींद्रेम सी जत्यार लग बुरफाय छेटे नी हवे,
तत्यार लग तीनुक डंड आप।
यहोवा भगवान, तु जलमकु राजा छे;
तुसेक नी मानन्या आखा राज्य-राज्येन माणसे,
तारा देसेम सी उजड़ी गुया
ए यहोवा भगवान, छाचलीन तु नीचळा माणसेन मरजी जाण लेदु,
तु मनेन वीचार जाणीन तींद्री सामळीन हर काजे पुरी करन्यु छे।
की पुरायला ने वेला पाड़लान नीयाव मां मदत करे,
काहाकी कुहर्या माणसे ते धुळान बणावला माणसेत छे,
पछेन नीचळा माणसेक बीहाड़णु नी चाहजे।
Source notes (1)
- Cross-reference रोमीयो 3:14
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.