Bhilali Bible
भजन सहीता 9
भगवानेन नीयाव वाटे तीनाक बेसकु वारु कवणु।
दावुदेन लिखलो एक मीसमर भजन, भजन-गावण्यान डाहला: मुथ-लाब्बेनेन रेंग मां गावजु।
ए यहोवा भगवान, मे मारा आखा मन सी कहो: तु बेसकु वारु छे;
मे तार साहरे करला आखा चकराड़न्या वारु कामेन बारामां आखाक देखाड़ीस।
मे तारेम खुस हय्न गखळाय्स; ए आखाम उचे रवण्या भगवान!
मे गावतु जाय्न, तारोत नाव लीया करीस।
ए भगवान! जत्यार मारा वेरी तुसेक देखे, ती चे पछा फीरीन ढास जाय,
ने गरा मां पड़ीन, मरीन-सरी जाय।
काहाकी तु तारी राजगादी पर बठीन धरम सी खरलु नीयाव करन्यु छे;
हेरेसी तु मार अगळ हय्न मार वाटे नीयाव करलु छे।
तु ते कुहर्या राज्य-राज्येन माणसेक लड़ीन झीचकार्यु,
ने तीनुक खत्तम कर देदु;
अळतेन तींद्रे नावेन हेर बी जलमकीत खुय देदु।
मारा वेरी जलमकात सरी गुया, तु तींद्रा सहर काजे उजाड़ देदु,
ने तीनु कुहर्यान हेर करनी,
एक बी सहलाणी नी रय।
बाकुन यहोवा भगवान जलमकु राजा छे;
चु आपसी राजगादी पर नीयाव करने करीन बणायु।
चु आखी कळीन माणसेन नीयाव छाचाय सी करसे;
चु आखा देसन माणसेन खरलु नीयाव करसे।
यहोवा भगवान वेला पाड़ला माणसे वाटे आसरान कीलु छे,
चु गरान टेमे तींद्रे वाटे आसरान कीलु छे।
ए यहोवा भगवान, जे बी मदत लेणे तारेन्चा आवे, तीनुक तु खुळाम ली लेय;
अळी जतरा बी तारो नाव जाण लेसे, चे आखा तार पर भुरसु करसे।
यहोवा भगवान जु सीयोन मां रहे; तेरा गुण गावजु!
आखा माणसेन ईचमां यहोवा भगवानेन मटला कामेन बारामां परचार करु!
काहाकी एला पाड़ायला माणसेक भगवान हेर राखे;
चु तींद्री दुवा काजे नी ईसरे; ने जे ईनुक वेला पाड़े,
तीनु खुनी माणसेन भगवान बदलु लेसे।
ए यहोवा भगवान, मार पर दया कर!
मारा वेरी ते मेसेक वेला पाड़ रया।
तु ते माणसेक मरता-मरता बचाड़न्यु छे;
अळी मारी वेला काजे देखीन मेसेक मोत मां सी बचाड़!
तत्यार ते मे सीयोनेन1 बारनान्चां जाय्न,
चाहान माणसे अगळ तारा आखा गुण गाय्स ने जु छुटकारु तु मेसेक आपसी,
तीना छुटकारा वाटे मे खुस हय्न गखळाय्स।
दीसरा माणसे, जे तुसेक नी माने; चे तार वाटे खाडु खुद्या,
चेत तीना खाडा मां हीट पड़्या; ने चे तारा माणसेक जाळेम टुपणे करीन जाळ नाख्या, बाकुन चे आपसात तीनी जाळेम गुचवाय गुया।
यहोवा भगवान आपसा काजे उजेंतु करीन नीयाव करलु छे; की कुहर्यु आपसा कामो मां फसी जाय। (सीग्गायोन, सेला)
कुहर्या माणसे आखा मरलानकळ मां जाती रवसे;
ने चे आखा देसेन माणसे बी जे भगवान काजे ईसरी जाय।
गरीब माणसेक भगवान जलमकुत नी इसरे;
ने नीचळा माणसेन आस जलेमकी नी टुटे।
ए यहोवा भगवान, उठीन आव! माणसे ताकतवाळा नी हवणु चाहजे!
तीनु आखा माणसेन नीयाव तुत कर।
ए भगवान तीनु आखा माणसेक बीहाड़ दे,
ने आखा माणसे आपसा बारामां जो जाण लेणु चाहजे की, माणुस माणुसुत छे।
Source notes (1)
- Footnote सीयोनेन पुरे
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.