Bhilali Bible
भजन सहीता 8
भगवानेन सेक-सींगार ने माणसेन सेक
दावुदेन लिखलो एक मीसमर भजन; भजन गावण्यान डाहला वाटे गीत्तीन रेंगो मां गावजु।
ए यहोवा भगवान, ए मारा मालीक,
तारो नाव आखी धरती पर बेसकु सेकवाळु छे!
तारा गुण गावणेन अवाज सरग लग पुग गुय।
तु आपसा कुहर्यान वजे सी पुर्या ने
दुत पीण्या पुर्या सी ताकुतेन नेहु नाखलु छे,1
काहाकी तु ते वेरीक ने बदलु लेणे वाळा काजे रुकीन राखे।
जत्यार मे राती तार हात सी घड़ला सरग भीणी भाळो;
ने चांद ने तारान मंडळी काजे देखो, ती बेसकु चकराय जाम।
ने तत्यार मे माणसेन बारामां वीच्यार करो की, “माणुस कुण कवाये, तीनाक तु हेर करे?
ने माणसेन जात कुण कवाये, तेरी तु फीकुर करे?”2
कळ बणायु, तत्यार तु माणसेक असलु हक आप्यु, जु हक नीस्तु भगवानेन सरगेवाळा चाकर्या सी थुड़ुक नानु छे।
ने तु तेरा मुणका पर, हकेन ने ईज्जतेन पागड़ी बांदीन मेकलु छे।
तु माणसेक आखा घड़न्या पर राज-करन्यु बणाय देदु;
तार साहरे बणावली आखी चीजेक तेरा हक मां कर देदु।
आखा गाडरा-बुकड़ा ने गावड़ी-बेल ने जतरा बी जंगली जानवर्या,
ने सरगेम उडण्या चिरला ने भाती-भातीन माछा,
ने दर्याम जतरा बी जानवर्या छे, चे आखा माणसेन हक मां छे।
ए यहोवा भगवान, ए मारा मालीक,
तारो नाव आखी धरती पर बेसकु सेकवाळु छे।
Source notes (2)
- Cross-reference मत्ती 21:16; मत्ती 11:25
- Cross-reference अय्युब 7:17; 18; भजन सहीता 144:3; ईब्रानीयो 2:6-8
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.