भजन सहीता 7

नीयाव करने वाटे दुवा करनु

दावुदेन भजन: चु जो भजन यहोवा भगवान वाटे बीन्‌यामीनी कुस्‌यान साहरे सीग्‌गायोन रेंग मां गायु।

1ए मारा यहोवा भगवान, मे तार आसरे आय रयु; तु मारी राखवाळी कर,

जे मार पछळ पड़ रया, तींद्‌रा हातेम सी मेसेक छुड़ाव, ने वाचाय ले।

2कदी तु मेसेक नी बचाड़तु, तत्‌यार ते मारा वेरी मेसेक,

नाहरेन तसा फाड़ीन टुकड़ा-टुकड़ा कर देता!

तुत मेसेक बचाड़ सके, दीसरु काहनु नी।

3ए मारा यहोवा भगवान, दीसरा ते मार पर गुनु लगाड़ रया,

कदी मार हाते गुनु हंय गुयु हय,

4कदी मे मारा सात देण्‌या दुस्‌तीदार काजे,

धुकु दीन तेरा पीटेड़ला वेरीन सात देदु हय,

5ती मारा वेरी काजे मार पछळ पड़ने दे, ने चे मेसेक धर लेणु चाहजे;

ने चे मेसेक भुयमां रंदळीन मार नाखणु चाहजे;

ने मारी ईज्‌जत हळकी कर देणु चाहजे।

6ए यहोवा भगवान तु रीसवाय्‌न उठ,

मारा वेरीन रीस काजे फालतु कर दे;

मार वाटे तु नीयाव कर,

जसु तु नीयाव करनेन हुकुम आपलु छे।

7आखा राजेन माणसेन टुळु तार अगळ भेळा हवणु चाहजे;

ती तु तारी राजगादी पर बसीन अळी तींद्‌रे पर राज कर।

8यहोवा भगवान राज्‌य-राज्‌येन माणसेन नीयाव करे;

ए यहोवा भगवान, मे खरलु ने धरमी छे,

मारु नीयाव कर।

9ए धरमी भगवान, तु माणसेन मनेन वात,

ने वीच्‌यार काजे जान्‌नेवाळु छे,

अळी तु कुहर्‌यान कुहराय काजे सार दे,

बाकुन धरमी काजे काठु कर।1

10मारी ढाळ भगवानेन हातेम छे,

चु सुद्‌ला माणसेक ढाळे करीन बचाड़े।

11भगवान खरलु नीयाव करन्‌यु छे,

चु असु भगवान छे, जु कुहर्‌या पर जलम रीसवाये।

12कदी कुहर्‌यु माणुस पछतावु नी करे, ती भगवान आपसी तलवार काजे नीसाणसे;

चु छाचलीन आपसी धंद्‌ली चड़ाय्‌न, पीछ्‌याम बीलखी भरीन ताण लेदलु छे।

13चु आपसा मनार्‌यान हत्‌यार बी तीयार कर लेदु,

चु आपसा सर काजे धपाड़न्‌या बीलखा बणावे।

14देख, कुहर्‌यान ते कुहराय्‌न वेणा छुट रय,

तींद्‌रा कुखेम ते उदुम पुसाय रय,

ने चे झुट काजे पयदा करे।2

15कुहर्‌या दीसराक खाडा मां पाड़ने बेसकु उंडु खाडु खुद्‌या,

ने चे आपसात तीना खाडा मां हीट पड़्‌यु।

16तींद्‌रा भुंडला काम तींद्‌रेत माथे पड़से,

ने तींद्‌रु लड़ाय झगड़ु तींद्‌रे पर आय पड़से।

17मे यहोवा भगवान काजे, तेरात धरमेन कामे सी बेसकु वारु कय्‌स,

ने आखाम उचा रवण्‌या भगवानेन गुण गाय्‌स।