Bhilali Bible
नीरगमन 28
पुजारान चुखला पुथल्या
(नीरगमन 39:1-7)
“अळतेन तु ईस्रायेली मां सी तारा भाय हारुन, ने नादाब ने, अबीहु, ने एलीयाजर ने ईतामार नावेन तीन पुर्या काजे मारेन्चा लावजी की चे मार वाटे पुजारान काम करे। ने तु तारा भाय हारुन वाटे बड़ाय ने सुभा देणे वाटे चुखला पुथल्या बणावजी। ने जतरान मन मां अक्कल छे, तींद्रे मां अक्कल आपणे वाळी आत्मा सी पुरान-पुरा करला छे, तीनुक तु हारुनेन पुथल्या बणावणेन हुकुम आप की, चे मार वाटे पुजारान काम करने करीन चुखला बणे। जे पुथल्या तीनुक बणावणेन छे चे जे छे, मतलब छाती पर बांदणेन पुथल्या, ने एपोद ने लाम्बला पुथल्या, च्यारखुट्या कुड़ता, पागड़ी ने कमरेन पट्टु; जेत चुखला पुथल्या तारा भाय हारुन वाटे ने तेरा पुर्या वाटे बणावजी की चे मारे वाटे पुजारान काम करे। ने चे सोना ने नीळ्ळा ने जामण्या ने रात्ला रंग ने पातेळ्ळी सुतीन बणावळो पुथल्यो लेय।”
एपोद
“चे एपोद काजे सोनो ने नीळ्ळा ने जामण्या ने रात्ला रंगेन पुथल्या ने सणेन दुरीन पुथल्या सी बणावे, जे वारु रीते काठो काम करने वाळान हातेन काम रह्णु चाहजे। चु हेर वजे सी जुड़े की तीना दुय खाम्बान मुंहडा जुड़ायला रह्णु चाहजे। ने एपोद पर जे बणावलु पट्टु रवसे तेरे बनावट तेरेन तसीत रवणु चाहजे, ने चे दुयु जुड़ायला नी रवणु चाहजे, ने सोनान रवे, ने नीळ्ळा, जामण्या ने रात्ला रंग वाळा ने पातेळ्ळु सुतीन बणावला पुथल्या रवणु चाहजे। अळी दुय सुलेमानी मणी लीन, तींद्रे पर ईस्रायेलेन पुर्यान नाव लिखाड़जु। तींद्रा नाव मां सी छव नाव एक मणी पर, ने बचला छव नाव दीसरी मणी पर, ईस्रायेलेन पुर्यान पयदावारीन अनसारे लिखाड़जी। मणी खुदणे वाळान काम काजे जसा तसा छाप खुदीन बणावु, तसात चे दुय मणी पर ईस्रायेलेन पुर्यान नाव खुदाड़ीन लिखाड़जी; ने तीनुक सोनान खाचा मां बठाड़ देजी। ने दुय मण्या काजे एपोदेन खुबा पर लागाड़जी, चे ईस्रायेली माणसे काजे हेर करावणे वाळा मणी ठेहरे; मतलब हारुन तींद्रा नाव यहोवा अगळ आपसा दुय खांदा पर हेर कराड़ने करीन लागाड़ीन राखजी।”
“अळी सोनान खाचा बणावजु, तु दुयड़ान तसु गुथला दुय साकळ चुखला सोनान बणावजी; ने गुथला साकळ्या काजे खाचा मां जुड़ देजी।”
छात्ये बांदणेन पुथल्यो
(नीरगमन 39:8-21)
अळी नीयावेन छातीवाळी छात्ये बांदणे वाळा पुथल्या काजे बी सजाड़लो बणावजी, एपोदेन तसु सोनो, ने नीळ्ळा, ने जामण्या ने रात्ला रंगेन ने सणेन दुरीन पुथल्यान चो बणावजी। चु च्यार खुट्यु ने दुय गुणा रह्णु चाह्जे, ने ची लांबी ने चोवड़ाय एक-एक हेत रह्णु चाहजे। ने तेरेम च्यार लाईन मां मणी बसाड़जी, पेहली लाईन मां ते माणीक्य, ने पदमराग ने लालड़ी, ने दुसरी लाहर मां मरकत, नीळमणी ने हीरा: तीसरी हालर मां लसम, सुर्यकान्त ने नीलम; ने चोवथी लाईन मां फीरोजा, सुलेमानी मणी ने यसब हवणु चाहजे, जे आखा सोनान खाना मां लागाड़जु। ने ईस्रायेलेन पुर्यान जतरा नाव छे ततरी मणी रह्णु चाहजे, मतलब तींद्रा नावेन गीणती अनसारे बारे नाव लिखाड़जु, बारे पुर्या मां सी एक-एकेन नाव एक-एक मणी पर असा लिखाड़जु जसा छाप टुचीन बणावे। अळतेन छात्ये बांदणेन पुथल्या पर दुरीन तसो गुथला चुखला सोनान साकळ लागाड़जु; ने छात्ये बांदणेन पुथल्या पर सोनान दुय कड़ी लागाड़जु, ने दुयु कड़ी काजे छाती वाळी छात्ये बांदणेन पुथल्यान दुयु मुंहडा पर लागाड़जी। ने सोनान दुयु गुथला साकळ काजे तीनु दुयु कड़ी मां जो छात्ये बांदणेन पुथल्यो मुणका पर लागाड़जी। ने गुथली दुयु साकळेन दुयु बाकी मुणका काजे दुयु खाचा मां जुड़ीन एपोदेन दुय खांदान अगळ लागाड़जी। सोनान अळी दुय कड़ा बणावीन चपरासेन दुय मुंहडा पर, तेरे दुयु कुर पर जु एपोदेन माहेन्ली धड़े रह्णु चाहजे। ने अळी बी सोनान कड़ा बणावीन एपोदेन दुय खम्बान जुड़ पर, हेटा सी तेरे अगळ ने तेरे जुड़ेन्चां एपोदेन बणावला पट्टा पर लागाड़जी। ने चपरास काजे तींद्रा कड़ान साहरे एपोदेन कड़्या मां नीळ्ळा बंद सी बांदजी, ने हीनी रीते चु एपोदेन बणावला पट्टा पर रह्णु चाहजे, ने चपरास एपोद सी छेटे नी हवणु चाहजे।
जत्यार-जत्यार हारुन चुखला जागा मां जाय, तत्यार-तत्यार चु नीयावेन छात्ये बांदणेन पुथल्या पर आपसान छाती पर ईस्रायेल नाव काजे लागाड़ रह्णु चाहजे, तेरेसी यहोवा अगळ तेरी हेर सदा बन्ली रवे। ने तु नीयावेन चपरास मां उरीम ने तुम्मीम काजे मेकजी, ने जत्यार-जत्यार हारुन यहोवा अगळ आवे, तत्यार-तत्यार तेरा मन पर लागी रह्वे, हीनी रीते हारुन ईस्रायली माणसे वाटे यहोवा नीयाव काजे आपसा छाती पर लगत लागाड़ीन रह्णु चाहजे।1
दीसरा पुजारान पुथल्या
(नीरगमन 39:22-31)
“अळतेन एपोदेन मटला पुथल्या काजे आखा नीळ्ळा रंगेन बणावजी। तीनाक हीने रीते बणावे की तेरे ईचमां मुंहडो भरनेन डुचु रह्णु चाहजे, ने तीना डुचा मां च्यारे-मेर बख्तरेन डुचान तसी एक बणावली कुर रह्णु, चाहजे तेरेसी चु फाटणु नी चाहजे। ने चे हेट्ला घेरा मां च्यारु मेर नीळ्ळा, जामण्या ने रात्ला रंगेन अनार बणावजी, ने तेरे ईचमां च्यारु मेर सोनान घंटी लागाड़जी। मतलब एक सोनान घंटी ने एक अनार, हीनी रीते मटला पुथल्यान हेट्ला घेरा मां च्यारु मेर असुत रह्णु चाहजे। ने हारुन चो मट्लो पुथल्यो ने सेवान काम करनेन टेमे पेहर्या करे, की जत्यार चु चुखला जागा मां यहोवा अगळ जाय, नीते बाहर नीकळे, तत्यार घंटीन अवाज सामळायणु चाहजे, नीते चु मर जासे।”
“अळतेन चुखला सोनान एक पट्टी बणावजे, ने जसा छाप मां तसात हेरेमां मे हीना आकड़ा टुचीन बणावजी, मतलब यहोवा वाटे चुखो करलो।” ने तीनुक नीळ्ळा बंद सी बांदजी; ने चु पागड़ीन अगळना वाटा पर रह्णु चाहजे। ची पागड़ी हारुनेन मुंहडा पर रह्णु चाहजे, हेरेन करीन की ईस्रायली माणसे जो काय चुखलु ठेरावे, मतलब जतरी चुखली चीज चड़ावजी ची चुखली चीजेन गुनु हारुन हाकलीन राखे, ने पागड़ी जलम हारुनेन मुंहडा पर रह्णु चाहजे, तेरेसी यहोवा तींद्रे वाटे खुस रह्वे।
“पुथल्यो ने पातेळ्ळो सुतीन बणावलो पुथल्यान च्यार खाचा वाळो बणावजी, ने एक पागड़ी बी पातेळ्ळी सुतीन बणावला पुथल्यान बणावजी, ने हीरेन गुथलो एक कमरेन पट्टु बी बणावजी।”
“अळतेन हारुनेन पुर्या वाटे बी पुथल्यो ने कमरेन पट्टु ने टुप्या बणावजी; हीना पुथल्याक बी बड़ाय ने सुबा वाटे बणावजी। आपसा भाय हारुन ने तेरा पुर्या काजे हसात आखा पुथल्या पेहरावीन तीनुक नेवाड़जी ने वारु वेहवार करजु, ने तीनुक चुखा करजु की चे मार वाटे पुजारान काम करे। ने तींद्रे वाटे पातळ्ळो सुतीन पुथल्यान चड्या बणावजी जेरे सी तींद्रु डील ढाकायलु रवे, चे कमर सी सातळ्ये तक नाम्बा रवणु चाहजे। ने जत्यार-जत्यार हारुन ने तेरा पुर्या भगवानेन हजुरीन तम्बु मां जाय, नीते चुखला जागा मां सेवान काम करने करीन वेदीन्चां जाय, तत्यार-तत्यार चे ते चड्या काजे पेहरी रवे, असो नी हवणु चाहजे की चे गुनाळ्ळा ठेरे ने मर जाय। जी हारुन वाटे ने तेरी अळतेन तेरी अवल्यात वाटे बी जलमेन रीती ठेहरे।”
Source notes (1)
- Cross-reference गिन्ती 27:21; वेवस्थावीवरन 33:8; एज्रा 2:63; नहेम्याह 7:65
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.