Bhilali Bible
नीरगमन 29
हारुन ने तेरा पुर्यान पुजारान जागा वाटे नेवाड़नु
(लेवयवेवस्था 8:1-36)
तीनुक चुखला करने वाटे जो काम तुहुंंक तींद्रे साते करनु छे की, चे मार वाटे पुजारान काम करे, चो जो छे, एक बीन गुनाळा केवड़ाक ने दुय बीन गुनाळा गाडराक लावजु। ने खमीरेन रुटा ने तेल ती भुंजला मयदान खमीरेन पुरी, ने तेल सी चुपड़ला पापड़्या बी लावजु। जे आखा गहुन मयदान बणावजु। तु तीनुक एक चारली मां मेकजी, ने तीनुक तीनी चारली मां लावजी, तु केवड़ाक ने दुय गाडराक बी लावजी।
अळतेन हारुन ने तीना पुर्या काजे मीळने वाळा तम्बुन झपला धड़े लावजी, तीनुक पाणी सी उंघळावजी। तत्यार तीना पुथल्या काजे लीन हारुन काजे झगल्यो ने एपोदेन मटलो पुथल्यो पेहरावजी, ने एपोद ने चपरास बांदजी, ने एपोदेन बणावलु पट्टु बी बांदजी; ने तेरा मुणका पर पागड़ी मेकजी, ने पागड़ी पर चुखलु मुकुट बी मेकजु। तत्यार चुखला तेल लेजी ने तेरा मुणका पर नाखीन तीनुक अभीसेक करजी।
अळी तीना पुर्या काजे साते लावीन तीनाक पुथल्या पेहरावजी। ने तींद्रो मतलब हारुन ने आपसा पुर्यान कमर बांदजी ने तींद्रा मुंहडा पर टुप्या मेकजी, तेरेसी पुजारान जागा पर जलम तींद्रो हक रह्वे, हीने रीते हारुन ने तीना पुर्या काजे अभीसेक करजी।
तत्यार केवड़ा काजे मीळने वाळा तम्बु अगळ साते ली आवजी, ने हारुन ने आपसा पुर्या केवड़ान मुणका पर आपसा-आपसान हात मेके। तत्यार तीना केवड़ा काजे यहोवा अगळ मीळने वाळा तम्बुन झपले बादा चहड़ावजी। ने केवड़ान लुही मां सी थुड़ोक लीन आपसान आंगळी पर सी वेदीन सींगड़ा पर चुपड़जी, ने दीसरो आखो लुही काजे वेदीन पाया पर रेचवी देजी। ने तीनी चरबी सी आतड़ा ढाकायला रवतेला ने जी झीळ्ळी काळजान उपर रवतेली तीनुक ने दुय गुरदा काजे तींद्रे उपर वाळी चरबी भेळ लीन आखा काजे वेदी पर धपाड़जी। बाकुन केवड़ान सीकार, ने खालड़ो ने गुबर काजे तम्बु सी बाहर आक्ठा मां धपाड़ देजी; काहाकी जो पापेन बादा रह्वे।
अळी एक गाडरो लेजी, ने हारुन ने आपसा पुर्या तीना गाडरान मुणका पर आपसा-आपसान हात मेकजु। तत्यार तीना गाडरा काजे बादा चहड़ाजी, ने तीना लुही काजे लीन वेदी पर च्यारे-मेर छाटजी। तेरे पछेन तीना गाडरा काजे टुकड़ा-टुकड़ा करजी, ने तेरा आतड़ा काजे ने पाय काजे धुवीन तीना कुटका काजे तेरा मुणका पर मेकजी। ने तीना आखा गाडरा काजे वेदी पर धपाड़जी; चु ते यहोवा वाटे होम बादा रह्वे, चु वारु गंधायण्यु ने यहोवा वाटे वेदी रह्वे।1
“अळी दीसरा गाडरा काजे लेजी; ने हारुन ने आपसा पुर्या तीना मुंहडा पर आपसा-आपसान हात मेके। ती तीना गाडरा काजे बादा चहड़ावजी, ने तीना लुही मां सी थुड़ोक लीन हारुन ने तीना पुर्यान डाखरे भीणी कान्टान छीरा, ने तींद्रा जेवड़्यु हात ने जेवड़्यु पायन उमठा पर लागाड़जी, ने लुही काजे वेदी पर च्यारु मेर छाट देजी। अळी वेदी परुन लुही काजे ने तेल चुपड़ीन नेवाड़ लेदु, हीना दुय मां सी थुड़ोक-थुड़ोक लीन हारुन ने तीना पुथल्या पर, ने तीना पुर्या ने तींद्रा पुथल्या पर बी छाट देजी; ती चु तीना पुथल्या भेळ ने चे पुर्या बी आपसा-आपसान पुथल्या भेळ चुखा हंय जासे।”
अळतेन सींगड़ा वाळा गाडराक, पुजाराक नेवाड़ीन चुखो करनेन रीती-भाती मां कामे लावण्यो गाडरो समजीन तेरी चरबी, तेरी छेमटी, आतड़ा, काळजा पर चरबी रवे तेरे सुदेत, दुयु फुफसा, ने तेरो जेवड़्यो सातळ्यो बी लावजी। ने बीना खमीरेन रुटान मस्को जो यहोवा अगळ मेकलो रह्वे, तेरे मां सी बी एक, रुटा ने भुंजला मयदान एक पुड़ी, ने एक पापड़ लीन, हीनु आखा काजे हारुन ने तीना पुर्यान हात मां मेकीन हालाड़जी ने भेट ठेहरावीन यहोवा अगळ हालाड़जी। चां तीनी चीज काजे तींद्रे हात मां सी लीन होमबादान वेदी पर धपाड़ देजी, तेरे सी चु यहोवा भगवान अगळ वारु गंधायण्यो ठेहरे; चु यहोवा वाटे बादा कहवाये।
अळतेन हारुनेन अभीसेकन जो गाडरा रह्वे, तेरी छाती काजे लीन हालाड़ने वाळी भेट वाटे यहोवा अगळ हालाड़जी; ने चु तारु वाटु ठेहरे।
ने हारुन आपसा पुर्यान अभीसेकन जे गाडरा रह्वे, तेरे मां सी हालाड़णेन भेट वाळी छाती जो हालाड़नेन ने ईछणेन भेट वाळी छाती जे हालाड़नेन सातळयो ते हाकलनेन भेट रवसे, हीना आखा काजे चुखला ठेहरावजी। ने जी जलमकी नेमेन रीती पर ईस्रायली माणसे भीणी सी हारुन वाटे ने तेरा पुर्या वाटे रवसे; काहाकी जो चड़ावान मास; ईस्रायेली माणसे भीणी सी तींद्री मेलबादान चड़ावा मां सी यहोवा वाटे हाकलने वाळी भेट रवसे।
“हारुनेन जे चुखला पुथल्या रह्वे, चे तेरेत अळतेन तीना पुर्या ने पुर्यान ने पुर्यान तसा जड़ता रह्वे, तेरेसी तीनुक तीना पुथल्या पेहरलात तीनुक चुखला तेल सी चुखा करे। तीना पुर्या मां सी जे तीनी जागा पर पुजारु बणसे, चु जत्यार चुखला जागा मां सेवा चाकरीन काम करने करीन मीळणेवाळा तम्बु मां पेहले आवे चां तीना पुथल्यान सात दाहड़ा तक पेहरतात रह्वे।”
अळतेन पुजारान अभीसेकन जे गाडरा रह्वे, तेरी सीकार काहना चुखला जागा मां रांदजु। तत्यार हारुन आपसा पुर्या भेळ तीना गाडरान सीकार ने मसका माय्न रुटा, दुयु काजे मीळणे वाळा तम्बुन बारना मां खाजु। जी चीज सी तीनुक अभीसेक ने तीनुक चुखा करने करीन पसतावु करसे तीनुक ते चे खाय जाय, बाकुन दीसरी जातीन कुय तीनुक नी खावाय जाय काहाकी ची चीज चुखली रह्वे। कदी अभीसेक करली तीनी सीकार काजे नीते रुटा मां सी थुड़ोक संदारे तक बच रह्वे, चां चु बचलु ने आक्ठा मां धपाड़जी तीनुक खाणु नी चाहजे काहाकी चे चुखला छे।
मे तुहुंंक जु-जु हुकुम आपलु छे, तीना आखान अनसारे तु हारुन ने तीना पुर्या साते वेहवार करजु, ने सात दाहड़ा तक तींद्रु अभीसेक करजी। मतलब तु पाप बादान एक केवड़ु पसतावा वाटे दाहड़ीन चहड़ावजी। ने वेदी काजे बी पसतावु करनेन टेमे चुखी करजी, ने तीनुक चुखी करने करीन तीनुक अभीसेक करजी। सात दाहड़ा तक वेदी वाटे पसतावु करीन तीनुक चुखी करजी, ने वेदी तीनीत रीते पुरी-पुरी चुखली ठेहरे, ने जु काहनुक तीनुक छीमसे चु बी चुखु हंय जासे।
दाहड़ीन भेट
(गिन्ती 28:1-8)
जे तुहुंंक वेदी पर दाहड़ीन चड़ावु चहड़ावणु छे, चो जो छे; दाहड़ीन एक-एक सालेन दुय गाडरान गीदल्या। एक गाडरान पीला काजे ते संदारेन टेमे ने दीसरा गाडरान पीला काजे ते सांती वेळाय चहड़ावजु। ने गाडरान पेहला गीदल्या साते दुई लीटर तेल मां एक कीलु मयदु कुसणीन मयदान दसवु वाटु, ने पीयाला वाटे हीनेन चवथु वाटु अंगुरेन रस आपजी। ने दीसरा गाडरान गीदल्या काजे सांती वेळाय चहड़ावजु। ने तेरे साते संदारे रीतीन अनसारे अनबादा ने पाणी दुय-दुयु चड़ावजी, तेरेसी चो वारु गंधायण्यो ने यहोवा वाटे वेदी ठेहरे। तुंद्री पीड़ी सी पीड़ी मार अगळ, मतलब यहोवा अगळ मीळने वाळा तम्बुन बारनाम जलम असीत होमबादा कर्या करे, जी ची जागा छे, तेरेम मे तुंद्रे साते हेरेन करीन भेळु हया करीस, ने मे तुंद्रे साते वात करीस। मे ईस्रायेली माणसे काजे चाहान भेळु हया करीस, ने चु तम्बु मारा सेक-सींगार सी चुखलु हंय जासे। ने मे मीळने वाळा तम्बु काजे ने वेदी काजे चुखी करीस, ने हारुन ने आपसा पुर्याक बी चुखा करीस की चु मार वाटे पुजारान काम करे। ने मे ईस्रायली माणसेन ईचमां रह्वो ने तींद्रु भगवान ठेरीस। ने चे जाण लेसे की मे तींद्रु भगवान यहोवा छे, जे तीनुक मीस्र देस मां सी हेरेन करीन नीकाळीन ली आवला की तींद्रे ईचमां रह्वो; मेत यहोवा तींद्रु भगवान छे।
Source notes (1)
- Cross-reference ईफीसीयो 5:2; फीलीपीयो 4:18
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.