Bhilali Bible
नीरगमन 30
धुप धपाड़नेन वेदी
(नीरगमन 37:25-26)
“अळी धुप धपाड़ने वाटे बाबळ्यान लाकड़ान वेदी बणावजी। तीनी वेदीन लंबाय एक हात ने चोवड़ाय एक हातेन रह्णु चाहजे, ची च्यार खुणान रह्णु चाहजे, ने तेरी उचाय दुय हातेन रह्णु चाहजे, ने तेरा सींगड़ा तीनात टुकड़ा सी बणावजी। ने वेदीन उपर वाळा ढाकणा ने तेरे च्यारु मेर ने धड़े वाळा काजे ने सींगड़ा काजे चुखला सोना सी पालीस करजी ने तेरे पर च्यारु मेर सोनान एक कुर बणावजी। ने तीनी वाड़ी तळे तेरे आंबा-सांबा दुय खुणा पर सोनान दुय-दुय कड़ा बणायन तेरे दुय धड़े लागाड़जु, चे वेदीक हाकलनेन डेंगान खाचान काम मां आवे। डेंगा काजे बाबळ्यान लाकड़ान बणावजी, ने तीनाक सोना सी पालीस करजी। ने तु तीनुक चां पड़दान अगळ मेकजी जे गवान चिट्ठीन पेटी अगळ छे, मतलब पसतावा वाळा ढाकणा अगळ जे गवान चिट्ठी उपर छे, चाहात मे तुसेक भेळु हया करीस। ने तीनीत वेदी पर हारुन वारु गंधायण्यु धुप धपाड़्या करे; ने दाहड़ीन संदारे जत्यार चु दीवा काजे वारु करे, ती चु दीवु वारु धपे। ने सांतेली टेमे जत्यार हारुन दीवु धपाड़े ती धुप धपाड़्या करे, ज धुप यहोवा अगळ तुंद्री पीड़ी सी पीड़ी तक जलम धपाड़्या करे। तीनी वेदी पर तुहुंं दीसरी भातीन धुप मां धपाड़जु, ने नी तेरे पर अनबादा ने नी होमबादा चहड़ावजी; ने नी तेरे पर पाणी चहड़ावजु। हारुन साल मां एक बार आपसा सींगड़ा पर पसतावु करे, ने तुंद्री पीड़ी सी पीड़ी साल मां एक बार पसतावान पाप बादान लुही पर सी हेरे पर पसतावु करनु चाहजे, जो यहोवा वाटे चुखो छे।”
जीवनेन छुटकारान वाटे फाळु
तत्यार यहोवा मुसा काजे कह्यु, जत्यार तु ईस्रायेली माणसेन गीणती करने बाजी जाय, ती गीणती करनेन टेमे तींद्री गीणती हंय जाय तीना आपसा आपसान जीवेन साहरे यहोवा काजे छुटकारान कीमत आपे तेरेसी जत्यार तु तींद्री गीणती करने बाजी रयु हंय तीनी टेमे काहनी बी गरा तींद्रे पर नी आय पड़े। जतरा माणसे काजे गीण देय चे चुखला जागान तोलेन अनसारे आदु सीक्कु आपे, यहोवान भेट आदु सीक्कु रह्णु चाहजे।1 बीस साल नीते तेरेसी वदु उमरेन जतरा गीणाय जाय, तींद्रे मां सी एक-एक जणु यहोवा काजे भेट आपे। जत्यार तुहुंं आपणा जीवेन पसतावा वाटे यहोवा भेट आपे, ती नीते मातला माणसे आदा सीक्का सी वदु आपे; ने नी गरीब माणसे तेरेसी कम आपे। ने तु ईस्रायेली माणसे धड़े सी छुटकारान कीमत लीन मीळने वाळा तम्बु मां कामे लागाड़जु; तेरेसी चु पयस्या यहोवा अगळ ईस्रायेली माणसे हेर करसे करीन सहलाणी ठेहरे, ने तींद्रा जीवनेन पसतावु बी रह्णु चाहजे।
पीतळेन मट्लो तपलो
यहोवा मुसा काजे कह्यु, “तु हात-पाय धुवणे करीन एक मट्लो तपलो, ने तेरु पायु बी पीतळेन बणावजी, तीनाक भगवानेन हजुरीन तम्बुन वेदीन ईचमां मेकीन तेरे मां पाणी भर देजी;2 ने तेरेमां हारुन ने तेरा पुर्या आपणा-आपणा हात-पाय धुया करे। जत्यार-जत्यार चे मीळने वाळा तम्बु मां जाय तत्यार-तत्यार चे हात पाय पाणी सी धुवे, नीते मर जासे; ने जत्यार-जत्यार तीनी वेदीन्चां सेवा चाकरी करनेन, मतलब यहोवा वाटे वेदी धपाड़्ने करीन जासे, तत्यार चे हात-पाय धुवे, नीते चे मर जासे। जी हारुन ने तेरी पीड़ी सी पीड़ी तक आपसी अवल्यात वाटे जलमकी रीती ठेहरे।”
चुखलो तेल
अळी यहोवा मुसा काजे कह्यु, तु वारु सी वारु गंधायण्यु मसालु लेजी, मतलब चुखला जागान सेकेलेन अनसारे पांच सोव सेकेल आपसुत नीकळळु गंधायण्यु रस, ने तेरु आदु, मतलब ढाई सोव सेकेल वारु गंधायण्या मसालान पुपड़ु, ने ढाई सोव सेकेल वारु गंदायण्यु मसालु, ने पांच सोव सेकेल तजपान्टा ने एक हीन3 मतलब चार लीटर जेतुनेन तेल लीन, तींद्रे धड़े अभीसेक करलो चुखलो तेल मतलब गंदाय तीनी रीती सी बणावलो वारु गंधायणयो तेल बणावजी; जु अभीसेकन चुखलो तेल ठेहरे। ने तेरेसी मीळने वाळा तम्बुन, ने गवान चिट्ठीन पेटी मां, ने आखी चीज भेळ टेबलेन, ने चीज भेळ दीवु मेकणेन खुटान, ने धुप वेदीन, ने आखी चीज भेळे होम बादान वेदी, ने पाया भेळे मट्ला तपला काजे सजाड़जी। ने तीनुक चुखा करजी, तेरेसी चु आखा सी चुखा ठेहरे, ने जु काहनुक तीनुक छीमाय जासे चु बी चुखु हंय जासे। अळी हारुन ने आपसा पुर्या भेळ अभीसेक करजी, ने तीनी रीती सी मार वाटे पुजारान काम करने करीन चुखा करजी। ने ईस्रायेली माणसे काजे मारो जो हुकुम सामळावजी, “जु तेल तुंद्री पीड़ी सी पीड़ी तक मार वाटे चुखलु अभीसेकेन तेल रह्वे। जु काहना माणसेन डील पर मां नाखजु, ने काय बी भेसकीन हेरेन तसो दीसरो तेल मां बणावजी; जु चुखलु छे, जु तुंद्रे वाटे बी चुखलु कह्वाये। जो काय हेरेन तसु काय भेसकीन बणावजी, नीते जो काय हेरे मां सी थुड़ोक दीसरी जाती वाळा काजे चुपड़े तीनुक आपसात माणसे मां सी खत्तम कर देसे।”
चुखलु गंदायण्यु मसालु
अळतेन यहोवा मुसा काजे कह्यु, “बुल, नखी, ने कुंदरु, जो गंधायणी चीज चुखला लोबान भेळ ली लेजी, जो आखो बराबर तोलन रह्णु चाहजे। ने हामरो धुप मतलब नण भेसकीन गंदाय तीनी रीतीन अनसारे वारलु ने चुखलो गंधायण्यो चीज बणावजी। अळतेन तेरेमां सी थुड़ोक दळीन बारीक कर देजी, चां तेरेमां सी थुड़ोक मीळणे वाळा तम्बु मां गवान चिट्ठी अगळ, जां मे तुहुंंक मीळ्या करीस, मेकजी चु तुंद्रे वाटे आखाम सी चुखलु कह्वायसे। जी धुप तु बणावसी तेरेत अनसारे तु काय भेसकीन तुंद्रे वाटे मां बणावजु, चु तुंद्रे अगळ यहोवा वाटे चुखलु कह्वाये। जो कुय सुंघणे वाटे तेरेन तसु काय बी बणावे, ती तीनुक आपणा माणसे मां सी खत्तम कर देसे।”4
Source notes (4)
- Cross-reference नीरगमन 38:25,26; मत्ती 17:24
- Cross-reference नीरगमन 38:8
- Footnote हीन चार लीटरेन आड़े-धड़े
- Cross-reference नीरगमन 37:29
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.