Bhilali Bible
नीरगमन 31
तम्बु वाटे मीस्तरी
(नीरगमन 35:30—36:1)
अळतेन यहोवा मुसा काजे कह्यु, “सामळ मे उरीन पुर्या बसलेल काजे, जे हुरेन पुर्यान पुर्या काजे यहुदान घराणान छे, नाव लीन बुलाय रयु। ने मे तीनाक भगवानेन आत्मा सी जी अक्कल, चतयार, ग्यान, ने आखी भातीन कामेन समज आपणे वाळी आत्मा सी पुरोन-पुरो करलु छे, हेरेसी चु मीस्तरीन काम अक्कल सी बणाय-बणाय्न आखी भाती सी बणावणे मां, मतलब सोना-चांदीन, ने पीतळ मां, ने जड़ने वाटे मणी तुड़ने मां, ने लाकड़ा पर कुरनेन काम करे। ने सामळ मे दानेन घराणान ने अहसामाकेन पुर्या ओहोलीआब काजे तींद्रे साते नेवाड़ दम; ने जतरा अक्कल वाळा छे तींद्रा आखान मन मां मे, अक्कल आपो, तेरेसी जतरी चीजेन हुकुम मे तुसेक आपलु छे तीनुक आखा काजे बणावे। मतलब मीळने वाळा तम्बु ने गवान चिट्ठीन पेटी तेरे पर पसतावा वाळा ढाकणा ने तम्बुन आखी चीज, ने समान भेळ टेबल, ने आखी चीज भेळ चुखला सोनान दीवु मेकणेन खुटु ने चुखली धुपवेदी, ने आखा समान भेळ होमबादान वेदी, ने पाया भेळे मट्लो तपलो, ने सजावला पुथल्या, ने हारुनेन पुथल्या, ने तेरा पुर्यान पुथल्या तीनुक चु पुजारान काम करनेन टेमे पेहरे, ने चुखलो तेल, ने चुखला जागा वाटे वारु गंधायण्यु धुप, जो आखा काजे तीना आखा हुकुमेन अनसारे बणावे जे मे तुसेक आपलु छे।”
आरामेन दाहड़ु
अळी यहोवा मुसा काजे कह्यु, “तु ईस्रायेली माणसे काजे असु बी कह्जी, तुहुंं मारा आरामेन दाहड़ा काजे मान्जु, काहाकी तुंद्री पीड़ी सी पीड़ी तक मारी ने तुंद्रे ईचमां जु एक सहलाणी ठेहरलु छे, तेरेसी तुहुंं जी वात जाण रया की, यहोवा हामुक चुखु करन्यु छे। तेरेमां तुहुंं आरामेन दाहड़ा काजे मानजु, काहाकी चु तुंद्रे वाटे चुखलु दाहड़ु छे, जे तुहुंंक ईटाळे तीनुक नक्खी मार देसे, जो काय तीने दाहड़े काय बी काम काज करे, तीना माणसे काजे आपसात माणसे मां सी सारी देसे। छव दाहड़ा ते काम-काज करनु चाहजे, बाकुन सातवे दाहड़े आखा सी आरामेन दाहड़ु ने यहोवा वाटे चुखलु छे, करीन जे कुय आरामेन दाहड़े काम-काज करे, तीनुक नक्खी मार नाखसे।1 तेरेमां ईस्रायेली माणसे आरामेन दाहड़ा काजे मानसे, ने पीड़ी सी पीड़ी तक तीनुक जलमेन वायदान बारामां समजीन मान्या करे। चु मारे ने ईस्रायेली माणसेन ईचमां जलेमकी सहलाणी ठेरसे, काहाकी छव दीन मां यहोवा सरग ने धरती काजे बणायु, ने सातवे दाहड़े नवराय्न आराम करलु।”2
जत्यार भगवान मुसा साते सीनाय बयड़ा पर असी वात कर लेदु, ती चु आपसी आंगळी सी लिखली गवा देणे वाळी दगड़ान दुय पट्टी आप्यु।
Source notes (2)
- Cross-reference नीरगमन 20:8-11; 23:12; 34:21; 35:2; लेवयवेवस्था 23:3; वेवस्थावीवरन 5:12-14
- Cross-reference नीरगमन 20:11
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.