नीरगमन 32

सोनान केवड़ु

(वेवस्‌थावीवरन 9:6-29)

1ने जत्‌यार माणसे देख्‌या की मुसा काजे बयड़ा पर सी उतरने मां वार हंय रय, ती चु हारुन काजे चां सी एक्‌ठा हय्‌न कह्‌णे बाजी ज्‌या, “आव हामरे वाटे देवता बणाव, जे हामरे अगळ-अगळ चाले: काहाकी चे माणसे मुसा काजे जे हामुक मीस्‌र देस मां सी नीकाळीन ली आवला छे, हामु नी जाणता की हामरो काय हवसे?”1 2हारुन तीनु कह्‌यु, “तुंद्‌रा बायरा ने पुर्‌या-पुरेन कान्‌टाम सोनान वाळी छे तीनुक आखाक नीकाळु, ने मारेन्‌चा ली आवु।” 3ती आखा माणसे तींद्‌रा कान्‌टाम सी सोनान वाळी नीकाळ्‌या ने हारुनेन चां ली आया। 4हारुन सोना काजे आपसा हातेम लेदु, ने एक टंकी मां नाख्‌यु, ने एक केवड़ान मुरती बणायु। चां माणसे कह्‌णे बाजी ज्‌या, ए ईस्‌रायेली माणसे,

तुंद्‌रु भगवान जु तुसेक मीस्‌र देस सी छुड़ाय लावलु छे, चो जुत छे।2

5जो देखीन हारुन तेरे अगळ एक वेदी बणायु, ने जो परचार कर्‌यु, “वाहणे यहोवा वाटे तीहवार रवसे। 6ने दीसरे दाहड़े माणसे संदारे, उठीन होमबादा ने मेलबादा ली आया ने अळतेन बठीन खादा पीदा, ने खेलने बाजी गुया।”3

7ने यहोवा मुसा काजे कह्‌यु, “बयड़ा पर सी नेचु उतरी आव, काहाकी माणसे, तीनुक तु मीस्‌र देस मां सी नीकाळ लावलु छे, चे बीगड़ी गुयला छे; 8ने तीनी वाट्‌ये चालनेन हुकुम मे तीनुक आपलु तीनी वाट सी अतरा छाटा भटकी ज्‌या, ने चे एक केवड़ान मुरती बणाय रया, ने तेरी भक्‌ती करने बाजी गुया, ने तेरे वाटे बादा नी चड़ाया, ने जो कवतेला, ‘ए ईस्‌रायेली माणसे, तुंद्‌रु देवतु जु, तुहुंंक मीस्‌र देस मां सी छुड़ाय लावलु छे, चु जुत छे।’” 9अळी यहोवा मुसा काजे कह्‌यु, “मे ईना माणुस काजे देख्‌यु, ने सामळ चे एक हेट्‌या छे। 10हंय मेसेक मां रुके, मारी रीस तुंद्‌रे पर आय लाग्‌ली छे, तेरेसी मे तुहुंंक सारी दीस, बाकुन मे तारेम सी एक मट्‌ली जाती बणावीस।”

11ती मुसु आपसा यहोवा भगवान अगळ असु कय्‌न दुवा करने बाजी ज्‌यु, “ए यहोवा तारी रीस तारा माणसे पर काहा आय पड़ली, तीनुक ते तारा सक्‌ती वाळा, ने ताकत वाळा हातेन साहरे मीस्‌री देस मां सी नीकाळ लावलु छे। 12मीस्‌री माणसे असा काहा कवणे बाजी रया, की तु हींद्‌रु गलत मकसद ती, बयड़ा पर तीनुक मारने करीन, धरती उपर सी तीनुक सार देणु करीन मीस्‌र देस मां सी नीकाळी लावलु हतलु? करीन तारी रीस काजे कम कर, ने तारा माणसेन नुकसाण मां करे। 13तारा चाकर्‌या अब्‌राहम ने ईसाक ने याकुब काजे हेर कर असु कह्‌यु, मे तुंद्‌री अवल्‌यात काजे वादळान तारान तसु बेसकु जादा करीस, ने हयो आखो देस तींद्‌रे सी वात करलु छे तुंद्‌री अवल्‌यात काजे आपीस की चे तेरा वारीस जलम बन्‌ला रवसे।”4 14तत्‌यार यहोवा आपसान माणसेन नुकसान करने सी ज्‌यु, चु कवलु तेरे सी मन फेरवी लेदु।

15तत्‌यार मुसु पछु फीरीन गवान जी दुय पट्‌टी काजे हात मां लीन बयड़ा पर सी उतरी गुयु, चु ती पट्‌टी पर दुय धड़े लिखलो हतलो। 16ने चां दुय पट्‌टी भगवानेन बणावली हतली, ने तेरे पर चे टुचीन लिखलो हतलो, चो भगवानेन लिखलो हतलो।

17जत्‌यार यहोसु काजे माणसेन लड़ायणेन कचाटु सामळायो, यहोसु मुसा सी कह्‌यु, “पड़ावान्‌चा सी लड़ायणे वाळान बुल सामळाय देदु।”

18मुसु कह्‌यु, “हेरो जो बुल छे, तेरी नीते जीतणे वाळान हय, ने नी हारने वाळान हय, मेसेक ते गावणे वाळान बुल सामळाय रयु।”

19पड़ावान्‌चा आवतेत मुसा काजे तीना केवड़ा ने नाचणु देखाव पड़्‌यो, चां मुसा काजे रीस लागी ने तीनी पट्‌टी काजे आपसात हात मां सी बयड़ान नेचु नाखीन तुड़ नाख्‌यु। 20ती चु तीनुक बणावला केवड़ा काजे लीन आक्‌ठा मां नाखीन झुळसी देदु, ने तीनुक दळी-दळीन बारीक कर देदु, ने तीनाक पाणी मां नाख देदु, ने ईस्‌रायेली माणसे काजे चु पाणी मां पीवाड़ देदु। 21ती मुसु हारुन काजे कह्‌णे बाजी ज्‌यु, “जु माणुस तार साते जो करलु की चे तीनुक अतरा बेसका मटा पाप मां फसाड़्‌यु?”

22हारुन जपाप आप्‌यु, “ए मालीक तारी रीस नी आपणु चाहजे, तु ते ईना माणुस काजे जाणे की जु गलत करने मां मन लागाड़ रयु। 23ने चु मेसेक कह्‌यु, हामरे वाटे देवता बणावजी हामरे अगळ-अगळ चाले; काहाकी चु माणुस मुसा काजे जे हामुक मीस्‌र देस मां सी छुड़ाय लावलु छे, हामु नी जाणजे की काय हयो?5 24ती मे तुहुंंक कह्‌यु, तेर-तेर धड़े सोनान वजन हंय चे तीनुक नीकाळ लावे, ने जत्‌यार चे मेसेक आप्‌या, ने मे तीनुक आक्‌ठा मां नाख देदु, तत्‌यार जु केवड़ु नीकळी गुयु।”

25हारुन तीनु माणसेन राखवाळी नी कर्‌यु, ने चे आपसात वीरुद करन्‌यान ईचमां हासी-ठट्‌ठा करने लायक बण गुया। 26ती चु पड़ावान झपलाम उबु हयु ने कह्‌यु, “जु हुकुम यहोवा भीणी सी छे, चे मारेन्‌चां आवे।” ती आखा लेवी जातीन माणसे तेरेन्‌चां एक्‌ठा हया। 27चु तीनुक कह्‌यु, “ईस्‌रायेलेन यहोवा असु कह्‌यु की आपणे-आपणे कमर तलवार टांगीन पड़ावा मां फीरी-फीरीन आपणा-आपणा भाय दुस्‌तीदार्‌या ने पुठ्‌ये वाळा काजे मारु।” 28मुसु कह्‌यु तेरे अनसारे लेवी माणसे कर्‌या, ने तीने दाहड़े तीन हजार माणसेन आड़े-धड़े मार नाख्‌या। 29तत्‌यार मुसु कह्‌यु, “तुहुं आज यहोवा वाटे पुजारान जागा वाटे टाळ्‌ला छे, काहाकी तुहुं आपसान सग्‌गा भाय ने पुर्‌यान वीरुद मां हतला। ने चु आजुन दाहड़े तुहुंक बरकत आपे।”

30दीसरे दाहड़े मुसु माणसे काजे असु कह्‌यु, “तुहुंं बेसको मटो पाप करला छे, हव मे यहोवा भगवान काजे चां उपर चहड़ जासे, जां हंय सके की, मे तुंद्‌रा पापेन पसतावु कर सको।” 31तत्‌यार मुसु यहोवा काजे चां जाय्‌न कह्‌णे बाजी गुयु, “गरा आय पड़से जे माणसे सोनान देवता बणायन बेसकु मटु पाप करला छे। 32तेबी हंय तु तींद्‌रा पाप काजे माप कर नीते तारी लिखली किताप मां सी मारो नाव काट दे।”6

33यहोवा मुसा काजे कह्‌यु, “जे मारा वीरुद मां पाप गुनु करलु छे तेरो नाव मे मारी जीवायन किताप मां सी काट दीस। 34आव तु जाय्‌न तीना माणसे काजे तीनी जागाम ली जा, तेरे बारामां मे वात तारे पुठ्‌ये करलु छे, देख मारो सरगदुत तारे अगळ-अगळ चालसे। बाकुन तीने दाहड़े मे डंड आपणे बाजी जायस, तीने दाहड़े हीनुक ईना बेसका पापेन बी डंड आपीस।”

35ने यहोवा तीनु माणसे पर मट्‌ली गरा मकल्‌यु, काहाकी हारुनेन बणावला केवड़ा काजे चेत बणाय मांगला।