नीरगमन 33

यहोवा ईस्‌रायेली माणसे काजे सीनाय बयड़ाम सी जाणेन हुकुम आपे

1अळतेन यहोवा मुसा काजे कह्‌यु, “तु हीना माणुस काजे तीनुक मीस्‌र देस मां सी छुड़ाय लावलु छे, तेरे साते लीन तीना देस मां जां, तेरे बारामां मे अब्‌राहम ईसाक ने याकुब काजे सगुन खायन कह्‌यु, की मे तीनुक तुंद्‌री अवल्‌यात काजे आपीस।1 2ने मे तारे अगळ-अगळ एक सरगदुत मकलीस ने कनानी, एमोरी, हीत्‌ती, परीज्‌जी, हीव्‌वी ने यबुसी माणसे काजे तुंद्‌रे अगळ सी नीकाळ दीस। 3तुहुंं तीना देस मां जावु तेरेमां दुद ने मुहाळेन झीर उह्‌वे; बाकुन तुहुंं एक हेट्‌या छे, करीन मे तुंद्‌रे अगळ-अगळ नी चालो, असो नी हंय जाय की, मे वाट्‌ये तुहुंंक मार नाखो।”2

4जी बुरी वात सामळीन चे माणसे कलपणे बाजी ज्‌या, ने कुय बी तींद्‌रो वजन पेहरीन नी रया। 5काहाकी यहोवा मुसा काजे कय देद्‌लु छे की, ईस्‌रायेली माणसे काजे मारी जी वात सामळाव, “तुहुंं ते एक हेट्‌या माणसे छे करीन, मे थुड़ीक वार वाटे तुंद्‌रे साते अगळ-अगळ चालो, ती तुहुंंक मार नाखीस। हेरेसी आपणो-आपणो वजन तुंद्‌रा डील सी नीकाळ देवु, की मे देखीस की तुंद्‌रे साते कांय करनु चाहजे।” 6करीन ईस्‌रायेली माणसे होरेब बयड़ान्‌चां सी अगा तक वजन नी पेहर्‌या।

मीळने वाळान तम्‌बु

7मुसु तम्‌बु काजे पड़ावा सी बाहर छेटे उबु कर्‌या करतेलु, ने तीनुक मीळने वाळा तम्‌बु कवतेला, ने जे कुय यहोवा काजे हेरतेला चु मीळने वाळा तम्‌बुन्‌चां जे पड़ावान बाहर हतलु नीकळीन जातला। 8जत्‌यार-जत्‌यार आखा माणसे उठीन आपसा-आपसात पड़ावान झपले उबा हंय जातला, ने जत्‌यार तक मुसु तीना तम्‌बु मां भराय नी जातला चां तक तेरे भीणी भाळ्‌या करतेला। 9जत्‌यार मुसु तीना तम्‌बु मां भरायतेलु, चां वादळान खम्‌बु उतरीन तम्‌बुन बारनाम उबु रय जातलु, ने यहोवा मुसा साते वात करने बाजी जातलु। 10ने आखा माणसे जत्‌यार वादळान खम्‌बा काजे तम्‌बुन बारनो उबु हंय रवतेला देखला, चां सी उठीन आपसा-आपसात पड़ावान बारने रयन वांद्‌या करतेला। 11ने यहोवा मुसा साते हीनी रीते आंबा-सांबा वात करतेला, तत्‌यार काहनुस भाय आपसा भाय साते वात करे, ने मुसु ते पड़ावा मां आवती रह्‌वे, बाकुन यहोसु नावेन एक जुवान, जु नुनेन पुर्‌यु ने मुसान चाकर्‌यु हतलु, चु तम्‌बु मां सी नीकळतेलु।3

भगवान आपसा माणसे साते वायदु करे

12मुसु यहोवा काजे कह्‌यु, “सामळ तु मेसेक कव, हीनु माणसेक लीन चाल बाकुन जु असु नी कह्‌यु, तु मार साते कुणीक मकलसी। तेबी तु कह्‌यु, ‘की मे तुसेक नाव सी जाणो, ने तारे पर मारी गीण-दयान नींगा छे।’ 13ने हंय कदी मारे पर तारी गीण-दयान नींगा छे, ती मेसेक तारी वाट सीकाड़ दे, तेरेसी मे जत्‌यार तारी अक्‌कल हात करो चां तारी गीण-दयान नींगा मारे पर बणीन रह्‌वे, अळतेन जो धीयान राख की आखा माणसे तारात माणसे छे।”

14यहोवा कह्‌यु, “मे खुदुत तारे साते चालीस, ने तुहुंंक आराम आपीस।”

15मुसु तीनाक कह्‌यु, “कदी तु खुद नी चाले ती हामुक जां सी अघु मां जाणी देय। 16जु कसु जाण्‌यु की तारी गीण-दयान नींगा मारे पर ने तारा माणसे पर छे? जु हेरेसी नी की, तु हामरे पुठे-पुठे चाले, तेरेसी मे ने तारा माणसे धरती परुन आखा माणसे सी अलग ठेहरे?”

17यहोवा मुसा काजे कह्‌यु, “मे जो काम बी तेरी तु वात करलु छे करीस, काहाकी मारी गीण-दयान नींगा तारे पर छे, ने मे तुसेक तारा नाव सी जाणो।”

18मुसु कह्‌यु, “मेसेक तारो सेक-सींगार देखाड़ दे।” 19यहोवा कह्‌यु, “मे तारे साते रय्‌न चालतु जाय्‌न, तुसेक मारी आखी भलाय देखाड़ीस, ने तार अगळ यहोवान नावे परचार करीस; ने तेरे पर मे गीण-दया करनु लागे तेरे पर करसी, ने तेरे पर दया करने हींडो तेरेत पर दया करीस।”4 20ने चु जो बी कह्‌यु, “तु मारा मुंहडा काजे बी नी देखी सकु; काहाकी माणसे मारो मुंहडो देखीन जीवतेला नी रय सके।” 21अळतेन यहोवा कह्‌यु, “सामळ मार धड़े एक जागु छे, जां तु तीनु चापर्‌या पर उबु हवसी। 22ने जां तक मारो सेक-सींगार तारे अगळ हय्‌न चालतो रह्‌वे, चां तक मे तुहुंंक ढाटान दर मां राखीस, ने जत्‌यार तक मे तारे अगळ सी नी नीकळी जाम चां तक मे तुहुंंक मारा हात सी ढाकीन राखीस। 23अळतेन मे मारु हात उबु कर लीस, चां तु मारा वासा काजे ते देखसी, बाकुन मारो मुंहडो देखणे नी जड़े।”