Bhilali Bible
नीरगमन 34
दगड़ान नवला पट्या
(वेवस्थावीवरन 10:1-5)
अळी यहोवा मुसा काजे कह्यु, “पेहला पट्यान तसी अळी दुय दगड़ान पट्टी घड़ लेजी; चां चे बुल पेहला पट्या पर लिखला छे, तीनुक तु तुड़ नाख्यु चेत बुल मे हीना पट्या पर बी लिखीस। संदारे तीयार रवजु ने संदारे सीनाय बयड़ा पर चहड़ीन आपसी चटी पर मारे अगळ उबु हवजी। तार साते कुय नी जाणु चाहजे, बाकुन आखा बयड़ा पर कुय बी माणुस देखायणु नी चाहजे; ने नी गाडरा-बुकड़ा ने नी गावड़ी-बेल बयड़ा अगळ चरनु चाहजे।” ती मुसु पेहला पट्यान तसु बी अळी पट्या घड़्यु, ने संदारे उठीन आपसात हात मां दगड़ान तसा दुय पट्या लीन, यहोवान हुकुमेन साहरे सीनाय बयड़ा पर चहड़ गुयु।
ती यहोवा भगवान काजे वादळा मां उतारीन तेरे वाटे चां उबु हय्न, यहोवा नावेन परचार कर्यु। यहोवा तेरे अगळ माय्न असु परचार करतु गुयु, ने यहोवा, “यहोवा भगवान दयाळ्ळु ने गीण-दया करने करीन, ने रीस करने करीन ने धीरु रय्न रीसवायण्यु, ने गीणाळु ने खरलु छे,1 हजारु पीड़ी लग लगत दया करने वाळु, ने पाप-गुनु माफ करन्यु छे; बाकुन गुनाळा काजे काहनी बी रीती सी डंड आपसे ने आपसे। डाहा-डाहान पाप-गुनान डंड, तींद्रा पुर्याक ने पुर्यान-पुर्याक, ने पुर्यान-पुर्यान-पुर्याक लग आपे।” ती मुसु तत्यारुत धरती पर ढंगु वळीन वांद्यु। ने कह्यु, “ए मालीक, कदी तारी गीण-दया ने नींगा मारे पर हय, ती मालीक हामरे ईचमां हय्न चाले; जे माणसे एक हेट्या छे, तेबी हामरा पाप-गुना काजे माप कर दे। ने हामुक तारा माणसे समजीन आवरी ले।”
वायदा काजे फीर सी देखाड़नु
(नीरगमन 23:14-19; वेवस्थावीवरन 7:1-5; 16:1-17)
चु मुसाक कह्यु, सामळ, मे एक वायदु करो, तारा आखा माणसे अगळ मे एक बेसकु वारु काम करीस, जसा धरती पर ने आखी जाती मां कदी नी हया हय; ने चे आखा माणसे तींद्रे ईचमां तु रय रयु, यहोवा काम काजे देखसे; काहाकी जां मे तुंद्रे वाटे करने वाळु छे चो बेसको वारु काम छे। जु हुकुम मे आज तुहुंंक आपो तीनुक तुहुंं मान्जु, देखु मे तुंद्रे अगळ सी एमोरी कनानी, ने हीत्ती, परीज्जी, हीव्वी, ने यबुसी माणसे काजे नीकाळ देजी। हेरेसी तु चेतीन रवजी की तीना देस मां तु जाणे वाळु छे चां रहणे वाळा साते वायदु मां करजी; कांखुर मायन असो नी हंय जाय की, चे तार वाटे फंदु बण जासे। ने तींद्रा वेद्या काजे; उदार नाखजु ने तींद्रा पुजा पाटेन खम्बा काजे बी उदार नाखजु, ने तींद्री असेरी नावेन खाम्बा काजे बी उदार देजु;2
काहाकी तुहुंं दीसरा काजे बी भगवान करीन वांदणेन हुकुम नी हय, काहाकी यहोवा तेरो नाव रीस राखणे वाळु छे, चु रीस करीन उठणे वाळु भगवान छे,3 असो नी हवणु चाहजे की, तु तीना देस मां रवणे वाळा साते वायदु करे, ने तीना आपसात देवताम सी पछु हवणेन पाप करे, ने तींद्रे वाटे बी चड़ावु, ने कुय तुहुंंक नेवतो आपे, ने तु बी तीनुक बादा चहड़ावला जानवरेन सीकार खाय, ने तु तींद्री पुरे काजे तारा पुर्या वाटे ईयाव करने करीन लावे, ने तींद्रा पुर्या जे आपणा-आपणा देवताम सी पछा हवणे वाळा पाप करे, तारा पुर्या काजे बी आपणात देवताम सी पछा हवणेवाळा पाप कराड़ो।
तुहुंं देवतान मुरती घुण बणावु।4
बीना खमीरेन रुटा मां तीहवार वाळजु, जसु मे तुहुंंक हुकुम आपलु छे, तेरे साहरे तु अबीब महनान संय टेम पर सात दाहड़ा तक बीना खमीरेन रुटा खाया करजु काहाकी तु मीस्र देस मां सी अबीबेन महनाम नीकळी आवलु।5
जतरा बी आखाम सी पेहली अवल्यात छे, ने जु केवड़ु जु गाडरा, तारा जनवार मां सी जु नर आखा सी पेहला छे, चे आखा मारात छे।6 गदड़ान आखा सी पेहला पीलान बदले गाडरो आपीन तीनुक छुड़ावजी, कदी तु तीनुक छुड़ावणे हींडे ती तेरी नळी तुड़ देजी बाकुन आपणा आखा पुर्या काजे बदलु आपीन छुड़ावजी।7
मेसेक कुय बी माणसे ठारला हात मुंहडो नी बताड़े।
छव दाहड़ा ते मेहनत करजु, ने सातवे दाहड़े आराम करजु; तु हळ जुपणे ने मेर काटणीन टेमे बी आराम करजी।8
ने तु हाप्तान तीहवार वाळजी, जो पेहले एक्ठा करला गहुन तीहवार कहवाय तेलो, ने सालेन आखरी मां एक्ठो करनेन बी तीहवार वाळजी।9
साल मां तीन कावा तारा आखा अदमी ईस्रायलेन मालीक यहोवा भगवान काजे आपसो मुंहडो देखाड़े। काहाकी मे आड़जात्या काजे तारे अगळ सी नीकळीन तारी काकड़ काजे वदाड़ीस; ने जत्यार तु तारा यहोवा भगवान काजे आपसुत मुंहडो देखाड़ने करीन साल मां तीन कावा आया करसी, तत्यार काहनु बी तारी जागान लालच नी करे।
“मारी बादान लुही काजे खमीर भेळ मां चहड़ावजी, ने नी फसह तीहवारेन बादा मां सी काय बी संदारे तक मेकजी।”10
आपणी जागान पेहली मेरेन पेहलु वाटु आपणा यहोवा भगवानेन घर मां ली आवजी।
ने बुकड़ीन गीदल्या काजे तेरी माय्न दुद मां घुण रांदे।11
तत्यार यहोवा मुसा काजे कह्यु, “हीना बुलेन बुल लिख ले; काहाकी हीनात बुलेन साहरे मे तार साते, ने ईस्रायेल साते वायदु करलु छे।” मुसु चां यहोवा साते चाळीस दाहड़ा ने चाळीस रात रयु, ने चां तक चु नीते रुटा खादु, ने नी पाणी पीदु, ने चु तीना दगड़ान पट्या पर वायदान बुल मतलब दस हुकुम12 लिख देदु।
मुसु सीनाय बयड़ा पर सी नेचु उतरे
जत्यार मुसु सीनाय बयड़ा पर सी वायदान दुय पट्टी हात मां लीन उतरने बाजी रवलु, तत्यार यहोवा साते वात करनेन वजे सी तेरो मुंहडो चमकतेलो, बाकुन मुसु नी जाणतेलु की तेरा मुंहडो चमकणे बाजी रयो। जत्यार हारुन ने आखा ईस्रायेली माणसे मुसाक देख्या, तत्यार चे तेरा मुंहडो चमकणे बाजी रयो, ने तेरेन्चां जाणे बीही गुया। तत्यार मुसु तीनुक बुलायु, ने हारुनेन मंडळीन आखा मुख्या तेरे साते आया, ने मुसु तींद्रे साते वात करने बाजी गुयु। हेरे पछेन आखा ईस्रायेली माणसे धड़े आया, ने जतरा हुकुम यहोवा सीनाय बयड़ा पर मुसा साते वात करनेन टेमे आपला, चो आखो तीनुक देखाड़्यु। जत्यार तक मुसु तींद्रे साते वात नी कर लेदु, चां तक आपसा मुंहडाम फटकु पांगरी रयु। बाकुन जत्यार-जत्यार मुसु माहें यहोवा साते वात करने करीन तेरे अगळ जातलु, तत्यार चु तीना फटका काजे नीकाळेन टेम तक छेटु करीन राखतेलु, अळी बाहर आय्न जो-जो हुकुम तीनुक जड़तेलो तीनुक ईस्रायेली माणसे काजे कय देतलु। ईस्रायेली माणसे मुसान मुंहडो देखतेला की तेरा मुंहडाम सी चमक नीकळे; ने जत्यार तक मुसु यहोवा साते वात करने करीन माहें नी जातलु, चां तक चु तीना फटका काजे पांगरीन रवतेलु।
Source notes (12)
- Cross-reference नीरगमन 20:5,6; गिन्ती 14:18; वेवस्थावीवरन 5:9,10; 7:9,10; नहेम्याह 9:17; भजन सहीता 86:15; 103:8; 145:8; योना 4:2
- Cross-reference वेवस्थावीवरन 16:21
- Cross-reference नीरगमन 20:5; वेवस्थावीवरन 4:24; 5:9
- Cross-reference नीरगमन 20:4; लेवयवेवस्था 19:4; वेवस्थावीवरन 5:8; 27:15
- Cross-reference नीरगमन 12:14-20; लेवयवेवस्था 23:6-8; गिन्ती 28:16-25
- Cross-reference नीरगमन 13:2
- Cross-reference नीरगमन 13:13
- Cross-reference नीरगमन 20:9,10; 23:12; 31:15; 35:2; लेवयवेवस्था 23:3; वेवस्थावीवरन 5:13,14
- Cross-reference लेवयवेवस्था 23:15-21,39-43; गिन्ती 28:26-31
- Cross-reference नीरगमन 12:10; 23:18; लेवयवेवस्था 2:11
- Cross-reference नीरगमन 23:19; वेवस्थावीवरन 24:21; 26:2
- Footnote हुकुम बुल
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.