Bhilali Bible
नीरगमन 35
आरामेन दाहड़ाक मान्नेन नेम
मुसु ईस्रायेली माणसेन आखी मंडळी काजे भेळी करीन तीनुक कह्यु, “जीना काम काजे करने करीन हुकुम यहोवा आपलु छे, चो जो छे। छव दाहड़ा ते काम-काज करु, बाकुन सातवे दाहड़े तुंद्रे वाटे चुखलो ने यहोवा वाटे आखा सी आरामेन दाहड़ु ठेहरे; तीने दाहड़े जे काम-काज करे, तीनुक मुतेन डंड जड़से।1 तेरेमां आरामेन दाहड़े तुहुंं आपसा-आपसान घर मां आक्ठो तक घुण धपाड़ु।”
चुखला तम्बु वाटे भेट
(नीरगमन 25:1-9)
अळी मुसु ईस्रायेली माणसेन आखी मंडळी काजे कह्यु, “जीनी वातेन हुकुम यहोवा आपलु छे, चो जो छे। तुंद्रे धड़े सी यहोवा वाटे भेट लेवु, अळी जतरा आपणी-आपणी मरजी सी आपणे हींडे, चे यहोवा वाटे भेट लावे; मतलब सोनो, चांदी, पीतळ; नीळ्ळु, जामण्या, रात्लु, ने पातेळ्ळी सुतीन बणावला पुथल्या; बुकड़ान कान्या, रातला रंग सी रंगला गाडरान खालड़ो, सुईसो नावेन मट्ली माछीन खालड़ो; बाबळ्यान लाकड़ा, वीजाळो करने करीन तेल, ने अभीसेकन तेल, ने वारु गंधायण्या धुप वाटे गंदायण्यु मसालु, अळतेन एपोद ने छात्ये बांदणेन पुथल्या वाटे सुलेमानी दगड़ु ने मणी।
भगवानेन हजुरीन तम्बु वाटे भाती-भातीन चीज
(नीरगमन 39:32-43)
“तुंद्रे मां जतरा बी हुनरवाळा छे, चे आखा आवीन जी-जी चीज मे यहोवा भगवान बणावणेन हुकुम आपलु छे, ची-ची चीज बणावणु चाहजे। मतलब तम्बु, ने बरसादी भेळ रह्णेन जागु, ने तेरा हेकड़ा, चोवखट, डांडा, खम्बा, पाया; अळी डेंगा भेळ पेटी, ने पसतावान ढाकणो, ने ईचमां वाळु पड़दु; डेंगा ने आखी चीज भेळ टेबल, ने भेटन रुटा; चीज ने दीवा भेळ वीजाळो करने वाळो दीवान खुटु, ने वीजाळो करने करीन तेल; डेंगा भेळ धुप वेदी, ने अभीसेकन तेल, वारु गंदायण्यो धुप, ने रह्णेन जागान पड़दु; पीतळेन जाळी, ने डेंगा ने आखो चीज भेळ होम बादान वेदी, ने पाया भेळे मट्लो तपलो; खाम्बा ने तेरा पाया भेळे आंगणान पड़दु, ने आंगणान झपलान पड़दु; रह्णे जागु ने आंगणान खुटा, ने दुयड़ा; चुखला जागा मां सेवा करने करीन सजावला पुथल्या, ने पुजारान काम करने करीन हारुनेन पुजारान चुखला पुथल्या, ने तीना पुर्यान चुखला पुथल्या।”
माणसेन साहरे भेट लावणु
तत्यार ईस्रायेली माणसेन आखी मंडळी मुसा अगळ सी जाती रय। ने जतरा काजे आपणे लाग्यु ने जतरा मन मां असी वीच्यार आयु, चे मीळने वाळा तम्बुन काम करने, ने तेरी आखी सेवा काजे चुखला पुथल्या बणावणे करीन यहोवा भेट लावणे बाजी गुया। काय बायरा, काय अदमी, जतरान मन मां असो वीच्यार आयो चे आखा नथनी, टुकरी, मुंदी, ने कावळ्या, ने आखा दीसरा सोनान वजन लावणे बाजी ज्या, हीनी रीते जतरा माणसे यहोवा वाटे सोनान भेट आपणे वाळा हतला, चे आखा सोनो ली आया। ने जीनु-जीनु माणसे धड़े नीळ्ळा, जामण्या नीते रात्ला रंगेन पुथल्या, नीते बुकड़ान कान्या, नीते रातला रंग सी रंगलो गाडरान खालड़ो, नीते सुईसो नावेन मट्ली माछीन खालड़ी हतली, चे तीनुक ली आया। अळी जतरा चांदी, नीते पीतळेन भेट आपणे वाळा हतला, चे यहोवा वाटे भेट ली आया; ने जेरे-जेरे धड़े सेवान काहना काम वाटे बाबळ्यान लाकड़ा हतला, चे तीनुक ली आया। ने जतरा बायरा मन मां अक्कल वाळा हतला, चे आपसे हाते सुती काती-कातीन नीळ्ळा, ने जामण्या ने रात्ला दुरा कातन सुत काजे ली आया। जतरा बायरान मन मां असी अक्कल हतली, चे बुकड़ान कान्या बी कातर्या। ने मुखी माणसे एपोद ने छात्ये बांदणेन पुथल्या वाटे सुलेमानी मणी, ने बठाड़ने वाटे मणी, ने वीजाळो करने ने अभीसेकेन तेल ने धुप ने वारु गंदायण्यु मसालु ने तेल ली आया। जीनी-जीनी चीज काजे बणावणेन हुकुम यहोवा मुसा काजे आपलु, तेरे वाटे जो कांय चाहतेलु, तीनुक चु आखा अदमी ने बायरा ली आया, तींद्रा मन मां असु वीच्यार आयु। की हीने रीते ईस्रायेली माणसे यहोवा वाटे आपसी मरजी सी भेट ली आया।
मीळने वाळा तम्बु वाटे मीस्तरी
(नीरगमन 31:1-11)
ती मुसु ईस्रायेली माणसे काजे कह्यु, “सामळु, यहोवा यहुदान घराणान बसलेल काजे, जे उरीन पुर्यु ने हुरेन पुर्यान पुर्यु छे, नाव लीन बुलायु; ने चु तीनुक भगवानेन आत्मा सी असु पुरो भर्यु की आखी भातीन सजावट वाटे तीनुक अक्कल, समज, ने ग्यान जड़्यु। की चु असा-असा फुटक्या बणावे की, तीनुक सोनो, चांदी ने पीतळ पर बणाय सके, ने बठाड़ने वाटे मणी तुड़ सके, ने लाकड़ा पर फुटक्या नीकाळ सके, ने अक्कल सी आखी भातीन असा दीसरा काम बी कर सके। अळतेन यहोवा तेरा मन मां, अळी दानेन घराणान अहीसामाकेन पुर्या ओहोलीआबेन मन मां बी सीकाड़पण आपणेन ताकत आप्यु। तीनु दुयु जणान मन मां यहोवा असी अक्कल सी पुरा भर देदलु छे की, चे फुटुक नीकाळने ने घड़ने वाळा, ने नीळ्ळा जामण्या ने रात्ला रंगेन पुथल्या, ने पातेळ्ळा सुतीन बणावला पुथल्या मां सजवाणे वाळा, ने बणावणे वाळा रवे, ने आखा भातीन बणावणे मां, ने अक्कल सी काम करने मां आखी भातीन काम करे।
Source notes (1)
- Cross-reference नीरगमन 20:8-11; 23:12; 31:15; 34:21; लेवयवेवस्था 23:3; वेवस्थावीवरन 5:12-14
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.