Bhilali Bible
नीरगमन 36
“बसलेल ने ओहोलीआब ने आखा अक्कल वाळा माणसे तीनुक यहोवा भगवान असी अक्कल ने समज आपलु छे की, तीना यहोवा भगवानेन आखा हुकुमेन साहरे चुखला जागान सेवा वाटे आखी भातीन काम करने जाणे, चे आखा जो काम करसे।”
माणसेन साहरे बेसकी भेट
तत्यार मुसु बसलेल ने ओहोलीआब ने आखा अक्कल वाळा काजे, तींद्रा मन मां यहोवा भगवानेन अक्कल ने समज आपलु, मतलब तीनु-तीनुक साते आवीन काम करनेन मन हयो तीनु आखा काजे बुलायु; ने ईस्रायेली माणसे जो-जो भेट चुखला जागान सेवान काम ने तीनुक बणावणे वाटे लावला हतला, तीनुक चे माणसे मुसान हात मां सी ली लेदा। तेबी माणसे दाहड़ीन संदारे तींद्रेन्चा भेट आपसीत मरजी सी लावता रया। ने जतरा अक्कल वाळा माणसे चुखला जागान काम करता रया, चे आखा आपसा-आपसान काम छुड़ीन मुसान्चां आया, ने चे कह्णे बाजी ज्या, “हीना काम काजे करनेन हुकुम यहोवा भगवान आपलु छे, तेरे वाटे जतरो चाहजे तेरे सी वदु चीज माणसे ली आवला छे।”
तत्यार मुसु आखा पड़ावाम हीना हुकुमेन परचार कर्यु, “आखा अदमी, ने बायरा, कुय बी चुखला जागा वाटे अळी भेट घुण लावु।” हीनी रीते माणसे अळी भेट लावणे सी बंद हंय गुया। काहाकी आखी चीज बणावणे वाटे जतरी चीज चाहजे, तेरे सी वदु चीज बणावणे वाळान्चां हंय गुयलो छे।
भगवानेन हजुरीन तम्बु बणावणु
(नीरगमन 26:1-37)
काम करने वाळा जतरा अक्कल वाळा माणसे हतला, चे रह्णेन जागा वाटे पातेळ्ळा सुतीन बणावला पुथल्यान, ने नीळ्ळा, जामण्या, ने रात्ला रंगेन पुथल्यान दस पड़दा काजे करुब नावेन फुटक्या बणाय्न सजाड़्या। एक-एक पड़दान लम्बाय बीस ने आठ हात, ने चोवड़ाय च्यार हात हतली; आखा पड़दा एकुत नापेन बण्या। बसलेल पांच पड़दा काजे एक दीसरा साते जुड़ देदु, ने दीसरा पांच पड़दा बी एक दीसरा साते जुड़ देदु। ने जां जे पड़दा जुड़ला हतला चांहान दुय कुर पर नीळ्ळा-नीळ्ळा, छेवड़ा लागाड़्या। चे दुय कुरे पचास-पचास छेवड़ा हीनी रीते लागाड़्या की, चे एक दीसरान आम्बा-साम्बा हतला। ने चु सोनान पचास आकड़ा बणाया, ने तेरे साहरे पड़दा काजे एक दीसरा साते असु जुड़्यु की, रह्णेन जागु पुरो एक बण गुयु। अळतेन रह्णेन जागान उपरना तम्बु वाटे चु बुकड़ीन कान्यान ग्यारे पड़दा बणाया। एक-एक पड़दान लम्बाय तीस हात ने चोवड़ाय च्यार हातेन हतली, ने ग्यारा पड़दा एकुत मापेन हतला। हींद्रेम सी चु पांच पड़दा अलग ने छव पड़दा अलग जुड़ देदा। ने जां दुय काजे जुड़्या चां नी कर्यु, चु पचास-पचास पड़दा लागाड़्या। ने चु पड़दा काजे जुड़ने करीन पीतळेन पचास आकड़ा बी बणाया तेरे सी पुरु तम्बु एक हंय जाय। ने चु तम्बु वाटे रातला रंग सी रंगला गाडरान खालड़ान एक आथरनेन ने तेरे उपर वाटे सुईसो नावेन मट्ली माछीन खालड़ान बी एक आथरन्यो बणाया।
तत्यार बसलेल रह्णे वाटे बाबळ्यान लाकड़ान चोवखट काजे उभा करने वाटे बणाया। एक-एक चोवखट लम्बाय दस हात ने चोवड़ाय डेड़ हातेन रह्णु चाहजे। एक-एक चोवखट मां एक दीसरा साते जुड़ायला दुय-दुय खाचा बणायु, रह्णेन जागान आखा चोवखट काजे चु हीनी रीते बणायु। चु रह्णेन जागान दखणाव भीणी वीस चोवखट बणायु। जे वीस आखा चोवखट तळे चांदीन चाळीस पाया, मतलब एक-एक चोवखट तळे तेरा दुय खाचा वाटे चु दुय पाया बणायु। ने रह्णेन जागान दीसरे भीणी मतलब धुराव भीणी वाटे बी चु वीस चोवखट बणायु। ने तींद्रे वाटे बी चु चांदीन चाळीस पाया, मतलब एक-एक चोवखट तळे दुय-दुय कुड़्च्या बणायु। ने रह्णे वाटे जागान पछली धड़े मतलब बुडनली आंगे वाटे चु छव चोवखट बणायु। ने पछला हीस्सा मां रह्णेन जागान खुणा वाटे चु दुय चोवखट बणायु। चे नेचा सी बी दुय-दुय वाटान बण्या ने दुयु वाटाम उपर सी मुंडेर तक एक-एक कड़ा मां भेसकायला हतला, ने चे दुय चोवखट काजे एक सारकात बणायु। हीनीत रीते आठ चोवखट हंय ज्या, ने तींद्रा चांदीन सुळ्ळे पाया हंय ज्या; मतलब एक-एक चोवखट तळे दुय-दुय पाया हया।
अळतेन चु बाबळ्यान लाकड़ान ढंड्यो बणायु, मतलब रह्णेन जागान एक भीणीन चोवखट वाटे पांच डांडा, ने रह्णेन जागान दीसरी धड़ेन चोवखट वाटे पांच ढंड्या, ने रह्णेन जागान कुर जी बुडनली भीणी पछली धड़े हतली, तेरे वाटे बी पांच डांडा बणायु। चु खाचान ईचमां वाळा डांडा काजे असु बणायु की चु रह्णेन जागान एक कुर सी दीसरी कुर तक पुग्या। ने चोवखट काजे चु सोना सी पालीस कर्यु, ने डांडान घरेन काम आवणे वाळा कड़ा काजे सोनान बणाया, ने डांडा काजे बी सोना सी पालीस कर्यु।
अळतेन चु नीळ्ळा, जामण्या ने रात्ला रंगेन पुथल्या काजे, ने पातेळ्ळा सुतीन बणावला पुथल्यान ईचमां वाळु पड़दु बणायु; चु तेरे पर वारु रीते करुबेन फुटक्या बणावीन सजाड़्यु। चु तेरे वाटे बाबळ्यान लाकड़ान च्यार खम्बा बणायु, ने तीनुक सोना सी पालीस कर्यु; ने तींद्रा छल्ला सोनान हतला, ने चु तींद्रे वाटे चांदीन च्यार पाया बणायु। चु तम्बुन बारना वाटे बी नीळ्ळा, जामण्या ने रात्ला रंगेन पुथल्यान, ने पातेळ्ळा सुतीन बणावला पुथल्यान सजावलु पड़दु बणायु; ने चु हेकड़ा भेळ तेरा पांच खम्बा बी बणाया, ने मुंहडा काजे जुड़नेन पट्टी काजे सोना सी रंग्या, ने तींद्री पांच पाया पीतळेन बणायु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.