नीरगमन 37

वायदान पेटी काजे बणावणु

(नीरगमन 25:10-22)

1अळी बसलेल बाबळ्‌यान लाकड़ान पेटी बणायु, ने तेरी लम्‌बाय ढाय हात, ने चोवड़ाय डेड़ हात, ने उचाय डेड़ हातेन हतली। 2चु तीनाक माहें ने बाहर चुखला सोना सी झाळ्‌यु, ने तेरे च्‌यारे-मेर सोनान कुर बणायु। 3ने चु च्‌यारु पाया पर लागाड़ने करीन सोनान च्‌यार कड़ा बणायु, दुय कड़ा एक भीणी ने दुय कड़ा दुसरी भीणी लागे। 4अळतेन चु बाबळ्‌यान डेंगा बणायु, ने तीनुक सोना सी पालीस कर्‌यु। 5ने तीनुक पेटीन दुयु धड़ेन कड़ा मां नाख्‌यु, की तींद्‌रे साहरे पेट काजे हाकलसे। 6अळतेन चु चुखला सोना सी पसतावा वाळा ढाकणा काजे बणायु; तेरी लम्‌बाय ढाय हात, ने चोवड़ाय डेड़ हातेन हतली। 7ने चु सोनाक घड़ीन करुब पसतावान ढाकणान दुय मुंहडा पर बणायु। 8एक करुब एक मुंहडा पर ने दीसरो करुब दीसरा मुंहडा पर बणायु; चु तीनुक पसतावान ढाकणा भेळ एकुत टुकड़ान दुय मुंहडा पर बणायु। 9ने करुबेन पाखड़ा उपर सी फेल्‌ला बणायु, ने चु पाखड़ा पर पसतावान ढाकणो ढाकायलो बण्‌यो, ने तींद्‌रा मुंहडा पर आम्‌बा-साम्‌बा ने पसतावान ढाकणा भीणी करला बणायु।

चुखली टेबल काजे बणावणु

(नीरगमन 25:23-30)

10अळी चु बाबळ्‌यान लाकड़ान टेबल काजे बणायु; तेरी लम्‌बाय दुय हात, ने चोवड़ाय एक हात, ने उचाय डेड़ हातेन हतली; 11ने चु तीनुक चुखला सोना सी झाळ्‌यु, ने तेरे आड़े-धड़े सोनान कुर बणायु। 12ने चु तेरे वाटे च्‌यार आंगळ्‌या चोवड़ी एक पट्‌ड़ी, ने हीनी पट्‌ड़ी वाटे आड़े-धड़े सोनान एक कुर बणायु। 13चु टेबल वाटे सोनान च्‌यार कड़ा बणायन, तेरे च्‌यारु खुणाम लागाड़्‌यु, जो तेरा च्‌यारु पाया पर हतला। 14चे कड़ा चोवखट काजे चां टेबल काजे हाकलने करीन डेंगान खाचान काम देणे करीन बण्‌या। 15चु टेबल हाकलने करीन बाबळ्‌यान डेंगा काजे बणायु, ने सोना सी झाळ्‌यु। 16ने चु टेबल परुन चीज मतलब तळी, धुप देणेन ठाहरु, कटेवरा, रेचवणेन ठाहरा आखा चुखला सोनान बणायु।

सोनान दीवु मेकणेन खुटु बणावणु

(नीरगमन 25:31-40)

17अळतेन चु चुखलो सोनो घड़ीन पाया ने खुटा भेळ दीवु मेकणेन दीवाळ्‌यो बणायु; तीना फुलेन तसु, गाठ, ने फुल काजे असु आखो एकुत टुकड़ान बणायु। 18ने दीवु मेकणेन खुटा मां सी छव डाळखा नीकळी रवला, ने तीन डाळखा तेरे एक भीणी, ने तीन डाळखा दीसरे भीणी नीकळी रवला। 19एक-एक डाळखे बदामेन फुलेन तसो तीन-तीन फुल काजे तसा, एक-एक गाठ, ने एक-एक फुल बन्‌ला हतला; हीनी रीते दीवु मेकणेन पुरा छव डाळखा मां बी हतला। 20ने दीवु मेकणेन खुटान डांडा मां बदामेन फुलेन तसो आपणा-आपणान गाठ ने फुल भेळ च्‌यार फुलेन तसा हतला। 21ने दीवु मेकणेन खुटा मां सी नीकळ्‌ळा छव डाळखा मां सी दुय-दुय डाळखान नेची एक-एक गाठ दीवु मेकणेन खुटा साते एकुत टुकड़ान बन्‌ली हतली। 22गाठ ने डाळखा आखु दीवु मेकणेन खुटा भेळ एकुत टुकड़ान बन्‌ली हतली, आखु दीवु मेकणेन खुटु घड़ला चुखला सोनान ने एकुत टुकड़ान बणलो हतलो। 23ने चु दीवु मेकणेन खुटान सातु दीवा ने उलवण्‌या चीम्‌टा काजे चुखला सोनान बणायु। 24चु आखी चीज भेळ दीवु मेकणेन खुटा काजे तीस ने च्‌यार कीलु चुखला सोनान बणायु।

धुप-वेदीन बणावणु

(नीरगमन 30:1-5)

25अळतेन चु बाबळ्‌यान लाकड़ान धुप वेदी बी बणायु, तेरी लंबाय एक हात, ने चोवड़ाय एक हातेन हतली, ची च्‌यार खुणान बन्‌ली हतली, ने ची दुय हात उची हतली, ने तेरा सींगड़ा एकुत टुकड़ान बन्‌ला हतला। 26चु तेरे उपर वाळा ढाकणा काजे ने च्‌यारे-मेर सींगड़ा भेळ तीनी वेदी काजे चुखला सोना सी झाळ्‌यु, ने तेरे च्‌यारे-मेर सोनान एक कुर बणायु। 27ने ची कुरेन नेची तेरा दुय पल्‌ला पर चु सोनान दुय कड़ा बणायु, जे तीनाक हाकलनेन डेंगान खाचान काम करे। 28ने डेंगा काजे चु बाबळ्‌यान लाकड़ान बणायु ने सोनान झाळ चड़ायु।

धुप ने चुखलो तेल बणावणु

(नीरगमन 30:22-38)

29चु अभीसेकन चुखलो तेल ने वारु गंदायण्‌या चीजेन धुप वारु गंदाय तीनी रीतीन अनसारे बणायु।